ރިހިވެލި ރިސޯޓު ހިންގަން ކުރިން ހަވާލުކުރި ފްރާންސްގެ ސޭވް ދަ ޑްރީމްގެ އަތުން އެތަން އަތުލާފައި ވާއިރު މިހާރު އެ ރިސޯޓްގައި ހުރި އެ ކުންފުނީގެ ހިއްސާދާރެއްގެ އަންހެނުން ކެތީ ކެލްބުގެ އުޅެނީ ނުކައި ނުބޮއި ރިސޯޓުގެ ކޮޓަރިއެއްގައި ތަޅުލައިގެން ކަމަށް އޭނާގެ ގާތް މީހުންނާއި ރިސޯޓާ ހަވާލުވެފައިވާ މާހަލް ޓުއާސް އިން ވެސް ބުނެފި އެވެ.
ސަރުކާރުން ރިހިވެލި ދޫކޮށްފައި ވަނީ މާހަލް އަށެވެ. މާހަލް އިން އެ ރަށް ހިންގަން ސަބްލީޒް ހަވާލުކުރީ ފްރާންސްގެ ސޭވް ދަ ޑްރީމް ކިޔާ ކުންފުންޏަކާ އެކު ހެދި 50-50 ޖޮއިންޓް ވެންޗާ ކުންފުނި "ސޭވް ދަ ޑްރީމް މޯލްޑިވްސް" އާ އެވެ. ސޭވް ދަ ޑްރީމް މޯލްޑިވްސްގައި މާހަލްގެ ހިއްސާދާރުން ވެސް ތިބެ އެވެ. ނަމަވެސް އެ ކުންފުނީގެ ފަރާތުން ރިސޯޓް އޮޕަރޭޓް ކުރުމުގައި އިސްކޮށް އުޅެނީ ފްރާންސްގެ ހިއްސާދާރު އަދި ސޭވް ދަ ޑްރީމް މޯލްޑިވްސްގެ ޑެޕިއުޓީ މެނޭޖިން ޑިރެކްޓަރު ކްރިސްޓިއަން ކެލްބްގެ އަންހެނުން ކެތީ ކެލްބެވެ.
މާހަލް އާއި ފްރާންސްގެ ހިއްސާދާރުންނާ ޖެހުނު މައްސަލަތަކަށް ފަހު މިދިޔަ އަހަރު މާހަލްއިން ސަބްލީޒް އެއްބަސްވުން ބާތިލުކުރީ ރަނގަޅަށް ކަމަށާއި މާހަލްގެ ރުހުމާ ނުލައި އެއްވެސް ފަރާތަކަށް ރަށުގައި ނުހުރެވޭނެ ކަމަށް ސިވިލް ކޯޓުން މިދިޔަ މަހު ހުކުމް ކުރުމުން މާހަލްއިން މިހާރު ވަނީ ރަށާ ހަވާލުވެފަ އެވެ. ނަމަވެސް، ސިވިލް ކޯޓުގެ ހުކުމް ހައި ކޯޓުގައި އިސްތިއުނާފުކޮށްފައިވާއިރު، ރަށުން ފައިބަން ދެކޮޅު ހަދައި ކެތީ އަދިވެސް ހުރީ ރިހިވެލީގަ އެވެ.
ކެތީއާ ގާތް، ރިހިވެލީގެ މުވައްޒަފަކު މިއަދު "މިހާރު" އަށް ބުނި ގޮތުގައި އެ ރަށުގައި ކެތީ ހުރީ އަސާސީ ހިދުމަތްތަކުން ވަނީ މަހުރޫމުކޮށްފަ އެވެ. މިހާރު ރިލިވެލިން ފުރައިގެން ގޮސް ހުރި އެ މުވައްޒަފު ބުނީ ކަރަންޓާއި ފެން އަދި ވައިފައި ވެސް ކަނޑާލާފައިވާ ކަމަށެވެ. އަދި ބޯ ފެން ވެސް ނުލިބޭ ކަމަށް ބުންޏެވެ. ކަރަންޓު ނެތުމުގެ ސަބަބުން ފޯނު ޗާޖުކުރަން އުނދަގޫ ވެގެން އުޅޭ ކަމަށާއި ރޭ ވެސް ފޯނު ޗާޖު ކުރީ ލެޕްޓޮޕަށް ޖަހައިގެން ކަމަށް ބުންޏެވެ.
އެނގިފައިވާ ގޮތުގައި އޭނާ ކޮޓަރިން ނުނުކުމެ ހުރީ ދޮރުމަތީގައި އަބަދު ވެސް މާހަލްގެ ދެ މީހަކު ތިބޭތީ، ކޮޓަރިން ނުކުމެއްޖެ ނަމަ އެނބުރި ކޮޓަރި އަށް ނުވަދެވިދާނެ ކަމުގެ ބިރު އޮތުމުންނެވެ. އެހެން އުޅޭތާ މިހާރު 24 ގަޑިއިރު ފާއިތުވެއްޖެ ކަމަށް އޭނާގެ ބައެއް އެކުވެރިން ބުނެ އެވެ.
ކެތީ މި ވަގުތު ހުރީ ވަރަށް ބޮޑު ނުރައްކަލެއްގައި ކަމަށް ބުނެ އޭނާގެ ގާތް ބައެއް މީހުން ދަނީ ސޯޝަލް މީޑިއާގައި ވާހަކަ ދައްކަމުންނެވެ. އަދި އެ މީހުން ވަނީ ކެތީ ކުރި ބައެއް މެސެޖުތައް ވެސް ހިއްސާކޮށްފަ އެވެ.
"އެ މީހުން އަަހަރެން މަރާލަފާނެ،" ކެތީ އޭނާގެ ރައްޓެއްސަކަށް ކޮށްފައިވާ މެސެޖެއްގައި ލިޔެފައިވެ އެވެ.
ކެތީގެ ވަކީލު ނާޒިމް ސައްތާރު ވިދާޅުވީ ކެތީ އުޅެނީ އެއްވެސް އެއްޗެއް ނުކައިނުބޮއެ ކަމަށެވެ. އެކަމާ ހެދި ފުލުހުން މިއަދު ރިހިވެއްޔަށް ދާން ހަމަޖެހިފައިވާ ކަމަށް ވެސް ވިދާޅުވި އެވެ. މީގެ ދެ ދުވަހެއް ކުރިން ފުލުހުން ވަނީ އެ ރަށަށް ގޮސް އޭނާއާ ވާހަކަ ދައްކައިގެން ރަށުން ފައިބާތޯ މަސައްކަތް ކޮށްފަ އެވެ. ނަމަވެސް، ކެތީ ވަނީ އެއްބާރުލުން ނުދީ ރަށުން ފައިބަން ދެކޮޅު ހަދައިފަ އެވެ.
ރިހިވެލީގައި ހުރި މާހަލްގެ އޮފިޝަލަކު "މިހާރު"އާ ވާހަކަ ދައްކަމުން ވަނީ އެ ތުހުމަތުތައް ދޮގުކޮށްފަ އެވެ. އޭނާ ބުނީ ކެތީއަށް ނުރައްކަލެއް ނެތް ކަމަށާއި ހިދުުމަތްތައް ކަނޑާނުލާ ކަމަށެވެ. އޭނާގެ ރައްކާތެރިކަން ކަށަވަރު ކުރަން ކޮޓަރި ކައިރީގައި ދެ މީހަކު ބައިތިއްބާފައި ހުންނަ ކަމަށް ވެސް ބުނެފައިވެ އެވެ.
އޭނާ ކާން ބޭނުން ނަމަ ރަށުގެ ސްޓާފް އޭރިއާއަށް ގޮސް އެއްވެސް ހުރަހެއް ނެތި ކެވޭނެ ކަމަށް ވެސް އަންގާފައިވާ ނަމަވެސް، އެތަނަށް ކާން ނުދާ ކަމަށް އޮފިޝަލު ބުންޏެވެ.
ކެތީއާ ހަވާލާދީ އޭނާގެ ރަހުމަތްތެރިޔާ ބުނީ ސްޓާފް އޭރިއާއަށް ކާން ދާން ކެތީ ދެކޮޅު ހަދަނީ އޭނާ ކޮޓަރިން ނުކުމެއްޖެ ނަމަ އޭނާ ނެތް ގަޑީގައި ކޮޓަރި ތަޅުލައި އެތަނަށް ނުވަދެވޭނެ ގޮތް ހަދާފާނެތީ އެވެ.
މާހަލްގެ އޮފިޝަލު ބުނި ގޮތުގައި ކެތީ އޮންނަނީ ކޮޓަރިން ނުނުކުމެ އެވެ. އެތާ ތެރޭގައި ކާ އެއްޗެހި ހުރި ކަމެއް ނުވަަތަ ނޫން ކަމެއް ކަށަވަރު ނުވާ ކަމަށް ބުނެފައިވެ އެވެ. ނަމަވެސް، ކެތީގެ ރަހުމަތްތެރިޔާ ބުނީ ކޮޓަރި ތެރޭގައި ދަޅުމަސް ހުންނާނެ ކަމަށާއި އޭނާ ހުރީ ހަމައެކަނި ދަޅުމަސް ކައިގެން ކަމަށެވެ. އަދި ބޯފެން ނުލިބޭ ކަމަށެވެ.
މާހަލްއިން ބުނާ ގޮތުގައި، ކެތީގެ ކޮޓަރިން ކަރަންޓު ކެނޑުމުން، އެހީވެ ބްރޭކަރު ވެސް އަރުވައިދިނެވެ. ނަމަވެސް، އެއީ ކަރަންޓު ކަނޑާލަން އުޅުނު ކަމަށް ބުނެ ވީޑިއޯކޮށް ސޯޝަލް މީޑިއާއަށް ލާފައިވާތީ އެކަން ހުއްޓާލީ ކަމަށް ބުންޏެވެ.
ހުކުމް ހައި ކޯޓުގައި އިސްތިއުނާފުކޮށް، ތަންފީޒު ކުރުން ފަސް ކުރުމުގެ ވަގުތީ އަމުރަކަށް ވެސް ކެތީމެންގެ ފަރާތުން ވަނީ އެދިފަ އެވެ. އިސްތިއުނާފު ކުރި މައްސަލަ ހައި ކޯޓުން ބަލައިގެންފައިވާ ނަމަވެސް، އަދި ވަގުތީ އަމުރެއް ނުނެރެ އެވެ. މާހަލްއިން ބުނަނީ ވަގުތީ އަމުރެއް ނެތީސް ކެތީއަށް ރަށުގައި ނުހުރެވޭނެ ކަމަށެވެ.
ކެތީ މީގެ ކުރިން "މިހާރު"އަށް ބުނެފައި ވަނީ އޭނާ ގަސްތު ކުރަނީ ޝަރުއީ ހުރިހާ މަރުހަލާއެއް ނިމެންދެން ރަށުގައި މަޑު ކުރަން ކަމަށެވެ. އޭނާ ދެއްކި ވާހަކަތަކުން އެނގުނު ގޮތުގައި ކޯޓުގެ ވަގުތީ އަމުރެއް އޮތް ކަމަށް އޭނާއަށް ގަބޫލު ކުރެވެ އެވެ. މާހަލްގެ މީހުން ވެސް ބުނަނީ ވަގުތީ އަމުރެއް ނެތް ކަމަށާއި ރަށުގައި މަޑުކުރުމުގެ ހައްގެއް އޭނާއަށް ނެތް ކަމަށް ކިޔައިދިނަސް އޭނާ އެކަން ގަބޫލު ކުރަން ބޭނުން ނުވާ ކަމަށެވެ.
ކެތީ ރަށުން ބޭލުމަށް މަޝްވަރާ ކުރަން އޭނާގެ ފަރާތުން ވަކީލު މުހުތާޒު މުހުސިން ވެސް ރިހިވެއްޔަށް މިދިޔަ ހަފްތާގައި ވަޑައިގެންނެވި އެވެ. އެކަމަކު، މާހަލްގެ ވަކީލުންނާއެކު ރަށުގެ ދިގު ފާލަން މަތީގައި ކުރި މަޝްވަރާއިން އެއްވެސް ނަތީޖާއެއް ނުނެރެވުނެވެ.
މާހަލްއިން ބުނާ ގޮތުގައި ސަބްލީޒް އެއްބަސްވުން ބާތިލު ކުރި މައިގަނޑު ސަބަބަކީ އެއްބަސްވުމުގެ ދަށުން ދައްކަން ޖެހޭ ހެޑްލީސް ރެންޓާއި ސަބްލީސް ރެންޓު ސޭވް ދަ ޑްރީމް މޯލްޑިވްސްއިން ނުދެއްކުމެވެ. ހެޑްލީސް ރެންޓު ނުދެއްކުމުން މީރާއިން ނޯޓިސް ފޮނުވަމުން ގޮސް އެންމެ ފަހުން "ރެޑް ނޯޓިސް" ވެސް ފޮނުވާފައިވާ ކަމަށް މާހަލް އިން ބުނެފައިވެ އެވެ.
ހެޑްލީސް ރެންޓުގެ ގޮތުގައި 323،188 ޑޮލަރު އަދި ސަބްލީސް ރެންޓުގެ ގޮތުގައި އެއް މިލިއަން ޑޮލަރު އަދިވެސް ނުދައްކާ ކަމަށް އެ ކުންފުނިން ބުނެފައިވެ އެވެ. ސިވިލް ކޯޓުން އެއްބަސްވުން ބާތިލު ކުރި މައިގަނޑު ސަބަބަކީ ވެސް މި އެވެ.
އެހެން ނަމަވެސް، މި ތުހުމަތުތަކަށް ފްރާންސްގެ ހިއްސާދާރުން ދޭ ޖަވާބަކީ ސޭވް ދަ ޑްރީމް މޯލްޑިވްސްއިން ކުންފުނީގެ ދިވެހި އެމްޑީ ހުސެއިން ޝިހާމް ވައްކަން ކޮށްފައިވާ ކަމަށެވެ. އެގޮތުން އެ ކުންފުނީގެ އެކައުންޓަށް ފްރާންސްގެ ހިއްސާދާރުން ޖަމާ ކުރި 550،000 ޑޮލަރު ހުސެއިން ޝިޔާމް ފްރާންސްގެ ހިއްސާދާރުންނަށް އެންގުމަކާ ނުލައި ކުންފުނީގެ އެކައުންޓުން ނަގާފައިވާ ކަމަށް ބުނެ އެ މައްސަލަ ވެސް ކޯޓަށް ހުށަހެޅި އެވެ. ފްރާންސްގެ ހިއްސާދާރުން ބުނަނީ 50-50 ހިއްސާ އޮންނަ އިރު ފައިސާ ނެގޭނީ ދެ ފަރާތުގެ ވެސް ސޮއި ހޯދައިގެން ކަމަށެވެ.
ކުންފުނީގެ އެމްޑީގެ ހައިސިއްޔަތުން އެކައުންޓުން ފައިސާ ނެގުމުގައި ގޯހެއް ނޯންނާނެ ކަމަށް މާހަލްއިން ބުނާއިރު ކޯޓުން ވެސް ނިންމީ އެ ފައިސާއަކީ ހުސެއިން ޝިހާމް އަމިއްލަ ބޭނުމަށް ނެގި ފައިސާ ކަމަށް ނުބެލެވޭނެ ކަމަށެވެ.
