ޖިންސީ ގޯނާގެ ބޮޑެތި ދައުވާތަކުން ފްރޭމްކުރީ ކަމަށް ވިދާޅުވެ ސަރުކާރަށާއި ކޯޓުތަކަށް އަދި ޕްރޮސިކިއުޓަ ޖެނެރަލް ހުސެއިން ޝަމީމަށް ބޮޑެތި އިންޒާރުތަކެއް ފުލުފުލުގައި ދިނުމަށް ފަހު، ނޫސްވެރިންގެ ބައްދަލުވުމެއް ބާއްވައި މިރޭ ހަގީގަތް ހާމަކޮށްދެއްވާނެ ކަަމަށް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ޝަރީއަތް ފަށާފައި ވަނިކޮށް ބޭސްފަރުވާގެ ބޭނުމަށް ކަމަށް ބުނެ ކްރިމިނަލް ކޯޓުން ޕާސްޕޯޓް ދޫކޮށްލުމާ އެކު އަލީ ވަހީދު ބޭރުގައި މިހާރު އުޅުއްވަނީ ކޯޓުތަކަށް ފިއްލަވައިގެންނެވެ. އޭނާގެ ކުށެއް ނެތް ކަމުގެ ވާހަކަތައް ދައްކަވަން މިދިޔަ މަހުގެ 25 ގައި ވެސް ނޫސްވެރިންގެ ބައްދަލުވުމެއް ބާއްވަން އުޅުނެވެ.
އެ ބައްދަލުވުމަށް ތައްޔާރުވެވަޑައިގެން އިންނަވަނިކޮށް، ޔޫކޭ ފުލުހުން އޭނާ ހައްޔަރުކުރީ އެވެ. އޯވަ ސްޓޭގެ މައްސަލައިގައި، އިނގިރޭސި ވިލާތުގެ ގެޓްވިކްގައި ހުރި ޖަލަކަށް ލާފައި ހުރި އަލީ ވަހީދު ނޫސްވެރިންނާ މިރޭ ބައްދަލުކުރައްވާނެ ކަމަށް ވިދާޅުވިއިރު އޭނާ ދޫވީ ކޮން އިރަކު ކަމެއް އަދި ސާފެއް ނުވެ އެވެ.
އެކަމަކު މީގެ ހަފުތާއެއްހާ ދުވަސް ކުރިން ފެށިގެން ސަރުކާރަށް ފާޑުވިދާޅުވެ ގިނަ ޓުވީޓްތަކެއް ގެންދަވަނީ ކުރައްވަމުންނެވެ.
އޭނާ މިއަދު ވިދާޅުވި ގޮތުގައި މިރޭގެ ނޫސްވެރިންގެ ބައްދަލުވުމުގައި ގިނަ ކަންކަމުގެ ހަގީގަތް ކިޔައިދެއްވާނެ އެވެ.
"މިރޭގެ ނިއުސް ކޮންފަރެންސްގައި އަޅުގަނޑު ފްރޭމްކޮށް އަޒަލުކުރި ގޮތާއި ރައީސް ޔާމީން ޖަލަށްލާން ނިންމި ނިންމުމާއި ޕީޖީއާ، އެެމްއެމްޕީއާރުސީގެ ހިޔާނާތާއި އޮތް ގުޅުމާއި އުތުރު ތިލަފަޅު ހިމެނޭ،" އަލީ ވަހީދު ވިދާޅުވި އެވެ.
މި ފަހުން އޭނާ ގެންދަވަނީ ސަރުކާރުގެ ސިޔާސަތުތަކާއި އެކި މިނިސްޓްރީތަކަށް އަމާޒުކޮށް ވެސް ތުހުމަތުތަކެއް ކުރައްވައި ފާޑުވިދާޅުވަމުންނެވެ. ކްރިމިނަލް ކޯޓުން އޭނާ ރާއްޖެ އިން ބޭރަށް ފުރުވާލިއިރު ޕްރޮސިކިއުޓަ ޖެނެރަލް ވެސް ތާއީދު ކުރެއްވީ އެގޮތަށް ކަމަށް އަލީ ވަހީދު ވިދާޅުވެފައިވެ އެވެ.
އަލީ ވަހީދު، މިނިސްޓަރު ކަމުން ވަކިކޮށް، ދައުލަތުން އޭނާގެ މައްޗަށް ދައުވާ އުފުލީ މަގާމުގައި ހުންނަވައި އެތަނުގެ ގިނަ މުވައްޒަފުންތަކަކަށް ޖިންސީ ގޯނާކުރި މައްސަލައިގަ އެވެ. އޭނާގެ މައްޗަށް ރޭޕްކުރުމުގެ ކުށުގެ ދައުވާ ހިމެނޭ ގޮތުން ޖުމްލަ ހަތް ދައުވާއެއް އުފުލާފައިވެ އެވެ.
މި ދައުވާތަކުގެ ޝަރީއަތް ފެށުމާ އެކު އޭނާ ރާއްޖެ އިން ބޭރަށް "ފުރުވާލުމުގައި"، ބޮޑެތި ގޯސްތަކެއް ހަދާފައިވާ ކަން ސުޕްރީމް ކޯޓާއި ހައި ކޯޓުގެ ހުކުމްތަކުން ސާފުވާނެ އެބަ އޮތެވެ. ޝަރީއަަތަށް ހާޒިރުނުވުމުން ސުޕްރީމް ކޯޓުން ދެ މަހުގެ ޖަލު ހުކުމެއް ވެސް އޭނާގެ މައްޗަށް ވަނީ އިއްވައިފަ އެވެ.
މި ހުކުމް ތަންފީޒުކުރަން އޭނާ ރާއްޖެ ގެނައުމުގެ މަސައްކަތް މޯލްޑިވްސް ކަރެކްޝަނަލް ސާވިސް އިން އެދިގެން ކުރަމުން އަންނަ ކަމަށް ފުލުހުން ބުނި ނަމަވެސް އޭނާ ގެނައުމުގެ މަސައްކަތެއް އެ މުއައްސަސާއަކުން ނުކުރެ އެވެ.
އެންމެ ފަހުން ބުނެފައި ވަނީ އިންޓަޕޮލް މެދުވެރިކޮށް އޭނާ ގެނައުމުގެ މަސައްކަތް ކުރަން ނިންމާފައިވާ ކަމަށެވެ.
