އިންޑިއާގެ ޕޫނާގައި އަސްކަރީ ތަމްރީނު ހަދަނިކޮށް، ދިވެހި ޒުވާން ސިފައިންގެ މީހާ މިއަދު މަރުވީ ތަމްރީނުތަކުގައި އުޅެނިކޮށް ކުއްލި ގޮތަކަށް ވެއްޓިގެން ކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން މިރޭ ބުނެފި އެވެ.
"މިހާރު" އިން ސުވާލު ކުރުމުން ޑެޕިއުޓީ ހައި ކޮމިޝަނަރު ރޯހިތު ރަތިޝް ވިދާޅުވީ، ނޭޝަނަލް ޑިފެންސް އެކަޑެމީގެ ތަމްރީނުތަކުގައި މިއަދު މެންދުރުފަހު އުޅެނިކޮށް އުމުރުން 22 އަހަރުގެ މުހައްމަދު ސުލްތާން ކުއްލި ގޮތަކަށް ވެއްޓި މަރުވީ ކަމަށެވެ.
"އޭގެ ކުރިން އޭނާގެ ފަރާތުން އެއްވެސް ކަމެއް ފާހަގައެއް ނުވޭ. ގްރެޖުއޭޝަންގެ ކުރިން ބޭއްވި އެންމެ ފަހުގެ ތަމްރީނުތަކުގައި އުޅެނިކޮށް މަރުވެގެން ކުއްލިއަކަށް ވެއްޓުނީ،" ކަމާ ބެހޭ އޮފިޝަލުންނާ ހަވާލާ ދެއްވައި ރޯހިތު ވިދާޅުވި އެވެ.
"އެއީ ވަރަށް ބުރަ، އުނދަގޫ ތަމްރީނުތަކެއް."
އެމްއެންޑީއެފުން ފަހުން މީޑިއާގައި ބުނިގޮތުގައި، މިއަދު އޮތް "އެންޑިއުރެންސް ރަން" އެއް ފުރިހަމަ ކުރުމުގެ ތެރޭގައި ސުލްތާން ކުއްލި ގޮތަކަށް ވެއްޓުމުން މެންދުރު 1:58 ހާއިރު އިމަޖެންސީގައި ހޮސްޕިޓަލަށް ގެންދިޔައިރު ވެސް އޭނާ ވަނީ މަރުވެފަ އެވެ.
އިންޑިއާގެ ނޭޝަނަލް ޑިފެންސް އެކަޑެމީގައި އޮފިސަ ކެޑޭޓް ކޯހުގެ ތަމްރީނުތަކުގައި ސުލްތާން ގުޅުނީ މި އަހަރުގެ މާޗު މަހު ކަމަށް ވާއިރު، އޭނާގެ ކޯސް ނިމޭނީ މާޗު 2024 ގަ އެވެ. މިއަދު ހަދަމުން ދިޔައީ ފުރަތަމަ އަހަރުގެ ދެވަނަ ޓާމުގެ ފިޒިކަލް އެންމެ ފަހުގެ ތަމްރީނުތައް ކަ،މަށް ވެ އެވެ.
އެ ތަމްރީނުތަކަށް ފަހު، ދެވަނަ ޓާމުގެ ގްރެޖުއޭޝަން ބާއްވަން ކަނޑައަޅާފައި އޮތީ އަންނަ މަހު އެވެ.
ރޯހިތު ވިދާޅުވީ، ލާންސްކޯޕްރަލްގެ ރޭންކުގައި ހުރި އއ. ހިމަންދޫ ރޯޒް މީޑް ސުލްތާންގެ ހަށިގަނޑު މާލެ ގެނައުމުގެ ކަންކަން ދިއްލީގައި ހުންނަ ރާއްޖޭގެ ހައި ކޮމިޝަނާ ގުޅިގެން ކުރިއަށް ގެންދާ ކަމަށެވެ.
"މިއީ ވަރަށް ހިތާމަވެރި ހާދިސާއެއް. އާއިލާ އަށާއި ދިވެހި ގައުމަށް މި ލިބުނު ހިތާމައިގައި އަޅުގަނޑުމެން މި ތިބީ އެ މީހުންނާއެކު. ސިފައިންގެ މީހާގެ އާއިލާ އަށް ހައި ކޮމިޝަންގެ ނަމުގައި ތައުޒިޔާ ކިޔަން،" ރޯހިތު ވިދާޅުވި އެވެ.
އޭޕްރީލް 8، 2018 ގައި ސިފައިންގެ ހިދުމަތާ ގުޅުނު ސުލްތާން، އޮފިސަ ކެޑޭޓް ކޯހަށް ދިއުމުގެ ކުރިން މަސައްކަތް ކުރީ އިންޓަގްރޭޓެޑް ހެޑްކްއާޓާސް (ޖޭ-1) ގައި ކަމަށް އެމްއެންޑީއެފުން ބުންޏެވެ.