ކޮވިޑް-19 އަށް ޕޮޒިޓިވްވެ ހުޅުމާލޭ މެޑިކަލް ފެސިލިޓީގައި ފަރުވާދެމުން އަންނަ ހާއްސަ އެހީއަށް ބޭނުންވާ އަންހެނަކަށް ނަރުހުން އަޅާނުލާކަމުގެ ތުހުމަތު އޭނާގެ އާއިލާއިންކޮށްްފި އެވެ.
އުމުރުން 27 އަހަރުގެ އެ އަންހެން މީހާ ކޮވިޑަށް ޕޮޒިޓިވްވެފައި ވަނީ މިދިޔަ މަހުގެ 29 ވަނަ ދުވަހު އައިޖީއެމްއެޗުގައި އޮޕަރޭޝަނެއް ކުރުމަށް ތައްޔާރުވަމުންދަނިކޮށް ހުން އައުމުން ނެގި ސާމްޕަލަކުންނެވެ. އެ އަންހެން މީހާއަކީ ވާހަކަ ނުދެއްކޭ، ހިނގާބިނގާވެ ނޫޅެވޭ މީހެކެވެ.
"ހަމަ ބޭއްވި ގޮތަކަށް އޮތުންް ފިޔަވައި އިތުރު ހަރަކާތެއް ދަރިފުޅަކަށް ނުކުރެވޭނެ. ހަމަ ދުނިޔޭގައި އޮތް ކުއްޖެއް އެއީ. އިތުރު ކަމެއް ނުކުރޭވެނެ." އޭނާގެ ބައްޕަ، މުހައްމަދު ލަތީފް "މިހާރު" އަށް ކިޔައިދިނެވެ.
މިދިޔަ މަހުގެ 26 ވަނަ ދުވަހު އަންހެން މީހާ ޕޮޒިޓިވްވެ، ހުޅުމާލޭ މެޑިކަލް ފެސިލިޓީއަށް ބަދަލުކުރިއިރު އޭނާއާ އެކު މަންމަ ވެސް ދިޔަ އެވެ. އަދި ޖެހިގެން އައި ދުވަހު މަންމަ ނެގި ސާމްޕަލުން ޕޮޒިޓިވްވިއިރު މަންމަ އުޅެނީ ބޭރަށް ހިންގާތީ ވަރަށް ހާލުގައި ކަމަށް ލަތީފު ކިޔައިދިނެވެ.
"އެ ކުއްޖާ އެކަނި ނުފޮނުވަންވެގެން އޭނާގެ މަންމަ އާދޭސްކޮށްގެން ގެންދިޔައީ. ދިޔަ ފަހުން ކޮވިޑަށް ޕޮޒިޓިވްވެ ވަރަށް ހާލުގައި މި އުޅެނީ. އަންހެނުން ބޭރަށް ހިންގާތީ ގައިގައި ވަރު ނެތިގެން އުޅެނީ. އެވަރުން ވެސް އެތަނުގައި ތިބި ނަރުހުން ކުއްޖާގެ ސާފުކޮށް ފެންވަރުވައެއް ނުދޭ،"
"އެ ކުއްޖާ އެކަނި ނުފޮނުވަންވެގެން އޭނާގެ މަންމަ އާދޭސްކޮށްގެން ގެންދިޔައީ. ދިޔަ ފަހުން ކޮވިޑަށް ޕޮޒިޓިވްވެ ވަރަށް ހާލުގައި މި އުޅެނީ. އަންހެނުން ބޭރަށް ހިންގާތީ ގައިގައި ވަރު ނެތިގެން އުޅެނީ. އެވަރުން ވެސް އެތަނުގައި ތިބި ނަރުހުން ކުއްޖާގެ ސާފުކޮށް ފެންވަރުވައެއް ނުދޭ،" ލަތީފް ބުންޏެވެ.
އެ ހާލުގައި އަންހެން މީހާ ދަރިފުޅުގެ ކަންކަން ބަލަމުންދާތީ ކަމާ ބެހޭ ފަރާތްތަކުގައި "އާދޭސް" ކޮށްގެން އެތަނަށް އެ މީހުންގެ އިތުރު ދަރިއަކު ގެންދިޔަ އެވެ. އެއީ ކުއްޖާގެ ކަންކަމުގައި އިތުރަށް އެހީވެވޭތޯ އެވެ.
އެކަމަކު އިރުއިރުކޮޅާ ބޭރަށް ހިންގާތީ ސާފުކުރުމާއި ފެންވެރުވުމަށް އެ މީހުން އިތުރަށް އެހީ ބޭނުންވި ނަމަވެސް އެކަމަށް އެދުމުން އެތަނުގައި ތިބޭ ނަރުހުން ބުނަމުން އަންނަނީ "ދެ ބައިސްޓޭންޑާ އެބަ ތިބި" ކަމަށެވެ. އެހެންވެ، ހާއްސަ އެހީއަށް ބޭނުންވާ އަންހެން މީހާގެ ކަންކަން ނަރުހުން ނުކުރެ އެވެ.
"ނަަރުހުން ކުރާ ވެސް ކަމަކީ އިންޖެކްޝަން ޖެހުމާއި އައިވީ ގުޅުން. އިތުރު ކަމެއް ނުކުރޭ. ބަނޑު ދިޔާވާތީ އިރުއިރުކޮޅާ ފާހާނާ އަށް ދާން ޖެހޭތީ އޭނާ ގެންދަން އުނދަގޫވެގެން އެކަމުގައި އެހީއަށް އެދުނީމަ ވެސް ނުކޮށްދިން."
ލަތީފް ވެސް ކޮވިޑަށް ޕޮޒިޓިވްވެފައިވާއިރު އޭނާ މި ވަގުތު ހުރީ ފަރުކޮޅުފުށީގައި ކަރަންޓީނުކޮށްފަ އެވެ. ހުޅުމާލޭ މެޑިކަލް ފެސިލިޓީގައި އޮތް ކުއްޖާ އާއި އަނބިމީހާގެ ގާތަށް ބަދަލުކޮށްދިނުމަށް އެދުމުން ވެސް އެކަން ކޮށްދީފައިި ނުވާ ކަމަށް އޭނާ ބުންޏެވެ.
"އެ މީހުން ބުނީ ވަކި ކެޓަގަރީއެއްގެ ބައެކޭ އެތަނަށް ލާނީ. އެކަމަކު އަންހެން ހުރީ ހަދާނެ ގޮތް ހުސްވެފައި. އެހެންވެ އަޅުގަނޑު އެތައް ފަހަރަކު އެދުނިން އެތަނުގެ ފިރިހެނުންގެ ބަޔަށް ނަމަވެސް ގެންގޮސް ލައިދޭށޭ. ފެންނަ ހިސާބެއްގައި ތިބީމަ ހިތްހަމަޖެހުން ލިބޭނެއޭ."
އެކަމާ ގުޅިގެން ސުވާލުކުރުމުން ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނީ އެތަނުގައި ބަލި މީހާއާ އެކު ކުއްޖާގެ ދައްތަ ވެސް އެބަތިބި ކަމަށެވެ. އިތުރު އެއްޗެއް ނުބުނެ އެވެ.
މި މައްސަލަ ކުއްޖާގެ އާއިލާގެ ފަރާތުން މޯލްޑިވްސް އެސޯސިއޭޝަން އޮފް ޕާސަންސް ވިތު ޑިސްއެބިލިޓީސްއާ ވެސް ހިއްސާކުރި އެވެ. އެ އެސޯސިއޭޝަނުން ވެސް ވަނީ ކުއްޖާ އަށް އެހީވެދޭން ތަކުރާރުކޮށް އާއިލާއިން ނަރުހުންގެ ކިބައިން އާދޭސް ކުރަމުން އަންނަ ކަމަށް ބުނެފަ އެވެ. އެކަމަށް ހާއްސަ ސަމާލުކަމެއް ދިނުމަށް އެޗްޕީއޭ އަށް އެ އެސޯސިއޭޝަނުން ގޮވާލަ އެވެ.