ކުރިއަށް އޮތް ހަތަރު އަހަރު ތެރޭގައި ރާއްޖެއިން ޓިއުބަކަލޯސިސް ނުވަތަ ޓީބީ ބަލި އެއްކޮށް ނައްތާލުމަށް އަމާޒު ހިފައިފި އެވެ.
މިކަން ހާމަކުރީ ދެކުނު އިރުމަތީ އޭޝިއާ ސަރަހައްދުގައި ޓީބީ ބައްޔާބެހޭ މަސައްކަތްތައް ހަރުދަނާކޮށް، ސަރަހަށްދުން ޓީބީ ނައްތާލުމާ ގުޅޭގޮތުން މިއަދު ބޭއްވި ހައިލެވެލް ބައްދަލުވުމެއްގަ އެވެ.
ޓީބީ ނައްތާލުމާ ގުޅުންހުރި މުހިންމު މަޝްވަރާތަކެއް ކުރިއަށްދިޔަ އެ ބައްދަލުވުމުގައި ހެލްތު މިނިސްޓަރު އަހުމަދު ނަސީމް ވިދާޅުވީ ރާއްޖެއިން ޓީބީ ނައްތާލުމަށް ސަރުކާރުން ވަރަށް ބޮޑު އަހައްމިއްޔަތުކަމެއް ދޭ ކަމަށެވެ.
މި ސަރަހައްދުގެ އެހެން ގައުމުތަކާ އަޅާބަލާއިރު ރާއްޖޭގައި ޓީބީ ޖެހޭ މިންވަރު މަދުކަން މިނިސްޓަރު ފާހަގަކުރެއްވި އެވެ. އަދި ޓީބީ ދެނެގަތުމަށް ހަރުދަނާ މަސައްކަތްތަކެއް ފަށާފައިވާ ކަމަށް ވިދާޅުވި އެވެ.
މިނިސްޓަރު ވިދާޅުވީ 2025 ވަނަ އަހަރު ނިމޭ އިރު ރާއްޖެއިން ޓީބީ ނައްތާލުމަށް އަމާޒުހިފައި މަސައްކަތް މިހާރު ވެސް ކުރިއަށްދާ ކަމަށެވެ.
އޮންލައިންކޮށް މިއަދު ކުރިއަށް ގެންދިޔަ ހައިލެވެލް ބައްދަލުވުމުގައި ދެކުނު އިރުމަތީ އޭޝިއާގެ ސަރަހައްދުގެ ގައުމުތަކުގެ ސިއްހަތާ ބެހޭ ވަޒީރުންނާއި ހާއްސަ މަންދޫބުންގެ އިތުރުން ދުނިޔޭގެ ސިއްހަތު ޖަމިއްޔާގެ އިސްވެރިން ބައިވެރިވެ ވަޑައިގެންނެވި އެވެ.
އެ ބައްދަލުވުމުގައި ދެކުނު އިރުމަތީ އޭޝިއާ ސަރަހައްދުން ޓީބީ ނައްތާލުމާއި އެކަމާ ގުޅޭ މަސައްކަތްތައް ހަރުދަނާ ކުރުމަށް އެ ގައުމުތަކުގެ ސިއްހަތާ ބެހޭ ވަޒީރުން "ސްޓޭޓްމަންޓް އޮފް ކޮމިޓްމަންޓް" އެއްގައި ސޮއި ކުރި އެވެ. އެގޮތުން 2030 ވަނަަ އަހަރު ޓީބީ ބަލި ނައްތާލުމަށް ޓާގެޓު ކަނޑައަޅައި އެކަމަށް މަސައްކަތް ކުރުމަށް އެ ސްޓޭޓްމަންޓުގައި އެއްބަސް ވެފައި ވެ އެވެ.
