މޫދަށް އެރެން ގޮސް، ހަތް އަހަރުގެ ހަސަން އަލްމާން ސުޖާއު، ފުރަތަމަ ކުރާ ކަމަކީ އުކާލާފައި ހުންނަ ޕްލާސްޓިކް ފުޅިތަކާއި ސުޕާރީ ޕެކެޓް ފަދަ ތަކެތި ހޮވައި ޑަސްބިނަށް އެޅުމެވެ. އޭނާ މޫދަށް ފައިބާނީ މޫދުގެ ދިރުންތަކަށް ރައްކާތެރިކަން ލިބުނު ކަމުގެ ހިތްހަމަޖެހުން ލިބުމުންނެވެ.
"މޫދުގައި އުޅޭ ފިޝްތައް މަރުވާނެ. ކުނި އަޅަންވާނީ ޑަސްބިނަށް. ކީއްކުރަން ބޮޑު މޫދު ޑަސްބިނަށް ހަދަނީ؟،" އަލްމާން ފެށީ ގޮނޑޮދޮށަށް ކުނި އެޅުމުން ދެރަވާ ވާހަކަ އިންނެވެ.
"ވީޑިއޯއަކުން ފެނުނީ ޓާޓަލްގެ ނޭފަތަށް އިނީ ހޮޅިއެއް ވަދެފައި. ކުނި ނާޅަންވީ އެހެންވެ."
ގަޑިއެއްހާއިރު ތެރޭގައި ކުޑަކުޑަ އަލްމާން ދެއްކީ ކަނޑުގެ ދިރުންތަކަށް ގެއްލުން ލިބެމުންދާ ކަމުގެ ބޮޑެތި ވާހަކަތަކެވެ. ދުނިޔެ ހޫނުވާ ސަބަބާއި ރާއްޖެއަށް ވެސް އޭގެ ނުރައްކާ އޮތް ކަމެވެ. އެކަމުގައި އަހަރެމެންގެ ވެސް ޒިންމާ އޮތް ކަމެވެ.
ތުއްތުއިރު، އެއްގަމާއި ކަނޑުގެ ދިރުންތަކުގެ ވީޑިއޯ ބެލުމުގެ ޝައުގާ އެކު ތިމާވެށި ދެކެ ވެވުނު ލޯބީގައި އޭނާއާ ދިމާވާ ކޮންމެ މީހަކާ ހިއްސާކުރަނީ އެ ވާހަކަތަކެވެ. އަލްމާން ބޭނުންވަނީ މޫސުމަށް އަންނަ ބަދަލުތަކާއި ތިމާވެށި ހިމާޔަތްކުރުމުގެ ވާހަކަތައް އޭނާ އަށް މިހާރު އެނގޭ މިންވަރު މުޅި ދުނިޔެއަށް އަޑުއިއްވުމަށެވެ.
މޫދުގައި ނެގި ވީޑިއޯއެއް ވައިރަލްވެ އޭނާއަށް އެ ފުރުސަތު ފަހިވީ އެވެ.
"ވަރަށް އުފާވޭ. އެތަނަށް ގޮސް އެންމެން ގާތު ބުނާނަން އަލްމާންގެ މެސެޖް ފޯރުކޮށްދޭށޭ."
މި މަހުގެ 31ގައި، ސްކޮޓްލެންޑްގެ ގްލާސްގޯގައި ފަށާ ސަމިޓުގައި ދުނިޔޭގެ ލީޑަރުންނަށް އަލްމާން ދޭން އޮތީ ބޮޑު މެސެޖެކެވެ. މޫސުމަށް އަންނަ ބަދަލުތަކަށް ހައްލެއް ނުހޯދައިފި ނަމަ އޭނާ އާއި ރާއްޖެ އާއި ދުނިޔެއަށް ވެސް ރައްކާތެރިކަމެއް ނެތް ކަމެވެ.
"އަލްމާން އެދޭނީ ރާއްޖެ އާއި ދުނިޔެ ސަލާމަތްކުރަން. ވަގުތުން ފިޔަވަޅު އަޅަން،"
މަޖީދިއްޔާ ސްކޫލުގެ ގްރޭޑް 1 ގައި ކިޔަވަމުން އަންނަ އަލްމާންގެ މަންމަ ބުނި ގޮތުގައި ކޮޕަށް ދާން ފުރުސަތު ފަހިވީ ވިލިނގިލީގައި ނެގި ވީޑިއޯއެއް އާއްމުކުރުމުންނެވެ. ޔޫޓިއުބް ޗެނަލެއް ހެދުމުގެ ވިސްނުމާ އެކު ކޮވިޑުގެ ކުރިން ނެގި އެ ވީޑިއޯ އާއްމުކުރުމުން އަލްމާންގެ މެސެޖް ކަމުދިޔަ މީހަކު ސޯޝަލްމީޑިއާގައި ޝެއާކުރީ އެވެ.
"އެ ވީޑިއޯ ޔޫއެންޖީއޭ ޕްރެޒިޑެންޓް [ރާއްޖޭގެ ފޮރިން މިނިސްޓަރު އަބްދުﷲ ޝާހިދު]ގެ އެކައުންޓުން ޓުވީޓްކުރުމުން ގިނަ ބައެއްގެ ސަމާލުކަން ލިބުނީ," ބައްޕަ ކިޔައިދިނެވެ.
މި ވީޑިއޯ އާއްމުވުމުން އެންވަޔަރަމަންޓް މިނިސްޓަރު އައިޝަތު ޝައުނާއާ ވެސް ވަނީ އަލްމާންއާ ބައްދަލުކުރައްވައިފަ އެވެ. އެ ބައްދަލުވުމުގައި ގަނޑެއްގައި ކުރަހައި މިނިސްޓަރަށް ކިޔައިދެއްވީ ތިމާވެއްޓަށް ލިބޭ ގެއްލުންތަކާއި ސަލާމަތްވާން ކުރަން އޮތް މަސައްކަތްތަކެވެ.
މި ވާހަކަތަކާ އެކު އަލްމާން އެންމެ ބައްދަލުކުރަން ބޭނުންވަނީ އެމެރިކާގެ ރައީސްއާ އެވެ. އެ ބައްދަލުވުމުގައި ވެސް ބުނަން އޮތީ ކުޑަކުޑަ ރާއްޖެ ސަލާމަތްކުރަން އެހީބޭނުންވާ ވާހަކަ ކަމަށް އަލްމާން ބުންޏެވެ.
އަލްމާން އެންމެންނަށް ބުނަން އޮތީ ކީކޭ އެހުމުން ބުނީ މިހެންނެވެ.
"އަހަރެމެންގެ މި ރީތިރީތި ގައުމު ހަޑިކޮށްނުލައްޗޭ."