ސްކޫލް ޗުއްޓީއަކަށް ފަހު ތައުލީމީ އާ އަހަރުގެ ކިޔެވުން ފެށުމާއެކު، ސްކޫލެއްގެ ދަރިވަރުންތަކެއް ނޯޓިސްބޯޑުގައި ތަތްކޮށްފައިވާ ޓައިމް ޓޭބަލްއެއް ބަލަނީ-- ފޮޓޯ: ނިޝާން އަލީ /މިހާރު
17 މާޗް 2022 - 08:28
111 comments
ކީ-ސްޓޭޖް އެކެއްގައި ކިޔަވާ ދަރިވަރެއްގެ ބެލެނިވެރިޔަކު އޮއްސާލީ ޝަކުވާތަކެވެ. ކުއްޔާއި ގޭތެރޭގެ ހަރަދުތައް އަމިއްލަ އަށް ބަލަހައްޓަމުންދާއިރު، ހުރި ހަމައެކަނި ދަރިފުޅުގެ ސްކޫލް ހަރަދުތައް އަތްނުފޯރާފަށަށް މައްޗަށް ދިއުމެވެ.
އޭނާ ބުނާ ގޮތުން، މާލެ ސަރަހައްދުގައި ހިންގާ އެ ސްކޫލްގެ އެކި ގަޑިތަކަށް ބޭނުންވެގެން ކޮންމެ ދުވަހަކު ކަހަލަ ގޮތަކަށް އެއްޗެއް ގަންނަން ޖެހެ އެވެ.
"މިހާރު އެބަޖެހޭ އާޓް ގަޑިއަށް ވަކިން އެއްޗެހި ގަންނަން. އަދި އެ ދުވަހެއްގައި އޮންނަ މާއްދާ އަށް ވެސް ވަރަށް ގިނައިން ޖެހޭ އެއްޗެހި ހޯދަން،" އެ ބެލެނިވެރިޔާ ބުންޏެވެ.
މި ފަހުން ވެސް ކަޕް ކޭކަކާ އެކު، ކަޕް ކޭކު ހަދަން ބޭނުންވާ ހުރިހާ ސާމާނެއް ސްކޫލަށް ގެންދަން ޖެހުނެވެ.
"އޭގެ ކުރިން ދުވަހު ސޭންޑްވިޗް ހަދަން ޗީޒާއި މަސްދަޅާ ދެން އެއަށް ބޭނުންވާ ހުރިހާ އެއްޗެއް ގެންދިޔައީ،" އޭނާ ބުންޏެވެ.
"މިއަދު ބޮތްކާއި ބެޓެރިއާ ކަރަންޓު ނަރު ގެންދަންޖެހޭ."
އެ ސްކޫލުން ވަނީ ހުނަރު ދަސްކޮށްދިނުމަށް ހާއްސަ ޕްރޮގްރާމެއް ފަށައި، އޭގެ ކްލާސްތައް ނަގައިދެމުންނެވެ. އެ ހަރަކާތުގައި ބައިވެރިވާން މަޖުބޫރުކޮށްފައި އޮތުމުން ބޮޑު ހަރަދެއް ދިޔަ ނަމަވެސް އިތުރު ގޮތެއް ނެތެވެ.
"އާޓް ކްލާހަށާއި ސްކިލް ޕްރޮގްރާމަށް ބޭނުންވާ އެއްޗެހި ގަންނަން މަހެއްގެ މައްޗަށް އެބަދޭ 500 ވަރަކަށް ރުފިޔާ. ގޭގައި، އަތުގައި ނުހުންނަ އެއްޗެހި މި ގަންނަނީ، އެހެން ގޮތެއް ނޯވޭ،" އެ ބެލެނިވެރިޔާ ބުންޏެވެ.
އޭނާ ގަބޫލުކުރާ ގޮތުގައި ކޮންމެ ދުވަހަކު މި ގޮތަށް އެއްޗެހި ނުހޯދައި ވެސް ދަރިވަރުންނަށް ބޭނުންވާ އެކި ހުނަރުތައް ދަސްކޮށްދެވިދާނެ އެވެ. ބޮޑު ހަރަދެއް ކޮށްގެން އެކި ކަންކަން ދަސްކޮށްދޭ ނަމަ ދަރިވަރުންނަށް ވެސް މި ދައްކައި ދެވެނީ ގޯސް މަންޒަރެއް ކަމަށް ބައެއް ބެލެނިވެރިން ގަބޫލުކުރެ އެވެ.
މާލެ ސަރަހައްދުގެ ސްކޫލެއްގެ އެހެން ބެލެނިވެރިޔަކު، ގްރޭޑު އެކަކާއި ފަހެއްގައި ކިޔަވާ ދެ ކުދިން ސްކޫލަށް ފޮނުވަމުން ވެސް ކުރަނީ ހަމަ އެއް ތަޖުރިބާ އެވެ.
އެ ބެލެނިވެރިޔާ ގަބޫލުކުރާ ގޮތުގައި ދަރިވަރުންގެ އެކި ކަންކަމަށް ސްކޫލްތަކުން ބޮޑު ހަރަދެއް ކުރުވަނީ ސަރުކާރުގެ ސްކޫލްތަކުގައި ފީ ނުނަގާތީ އޭގެ ބަދަލެއްގެ ގޮތުގަ އެވެ.
"ގާނޫނުގައި މި އޮންނަނީ ހިލޭ ކިޔަވައިދޭން ޖެހޭނެއޭ. އާން، އެކަންތައް އެބަކުރޭ. އެކަމަކު ދެ ތިން ހަތަރު ދަރިން ގޮވައިގެން ކިހިނެއް ކޮންމެ ދުވަހަކު މިހެން އެއްޗެހި ގަނެލަގަނެލަ ހުންނާނީ،" އޭނާ ބުންޏެވެ.
ސްކޫލަށް ގަންނަން ޖެހޭ އެއްޗެހި ގިނަވުމުން އޭނާ ވަނީ އެކަމުގެ ޝަކުވާ ވެސް ކޮށްފަ އެވެ. އެކަމަކު، ޖަވާބު ލިބުނީ ދަރިންގެ ކިޔެވުމަށް އެއްބާރުލުން ނުދޭ ކަމަށް ބުނެ، ނުރުހުމުގެ ނަޒަރަކުންނެވެ.
"ޝަކުވާ ކުރީމަ ގޯސް ވަނީ. ބުނަނީ ބެލެނިވެރިން އެއްބާރުލުން ނުދެއޭ، ދަރިންގެ ކިޔެވުމަށް އިސްކަންދޭށޭ،" އޭނާ ބުންޏެވެ.
އެއާއެކު، މާދަމާ އަށް ބޭނުންވާ ތަކެތީގެ ލިސްޓު މިއަދު އެންގުމުގެ ބަދަލުގައި އެ ސްކޫލުން ދެން ބަދަލުކުރީ، ހަފުތާ ފެށޭއިރަށް އެ ހަފުތާއަކަށް ބޭނުންވާ ތަކެތީގެ ލިސްޓެއް ކްލާހުގެ ވައިބާ ގްރޫޕަށް ލާށެވެ.
"ކޮންމެ ކުއްޖަކަށް އެބަޖެހޭ މަދުވެގެން 300ރ. ގެ އެއްޗެހި ގަންނަން. އެގޮތަށް ގަންނަ އެއްޗެހި އިތުރަކަށް ބޭނުމެއް ނުކުރެވޭ. އެންމެ ފަހަރަކު މި ބޭނުންކުރެވެނީ. ގިނަ ފަހަރަށް ގޭގައި ނުހުންނަ އެއްޗެހި މި ބޭނުންވަނީ."
އަންހެނަކު، ކުޑަ ދެ ކުއްޖަކާއެކު ހިނގާފައި ދަނީ.- ފޮޓޯ: ފަޔާޒު މޫސާ/ މިހާރު
"އަހަރެމެން ވެސް ސްކޫލަށް ގޮސްގެން ކިޔެވިން. އެކަމަކު މިހެންނެއް ނޫން. އޭރު ބޮޑު ވަރަކަށް ވެސް ބުނާނީ ކުދިކޮށް އަލުވި ކޮށައިގެން ސްޓޭމްޕްކުރަން."
ސްކޫލަށް ކޮންމެ ދުވަހަކު ކުރާ ހޭދައިގެ އިތުރުން، ސްކޫލްގެ ކޮންސެޓަށް ވެސް ބެލެނިވެރިން ބޮޑު ހޭދައެއް ކުރުވަ އެވެ. ބައެއް ސްކޫލުތަކުގައި ސްކޫލަށް ބޭނުންވާ އަސާސީ ބައެއް ސާމާނު ވެސް ބެލެނިވެރިން ގަނެދޭން ޖެހެ އެވެ.
ޕްރައިވެޓް ބައެއް ސްކޫލުތަކުގައި އިތުރު ހަރަދެއް ނެތް
ދަރިވަރުންގެ މަހު ފީ ފިޔަވައި، ޣިޔާސުއްދީން ސްކޫލުން ބެލެނިވެރިންގެ އަތުން ކުރާ އިތުރު ހޭދައެއް ނެތޭ ބުންޏަސް ރަނގަޅުވާނެ އެވެ.
އެ ސްކޫލްގެ ފުރަތަމަ ޕްރިންސިޕަލް ތޯހާ ސަލީމް ވިދާޅުވީ ދަރިވަރުން ސްކޫލަށް ވަންނަ ހިސާބުން އެ ސްކޫލްގެ ބެލެނިވެރިންނާ ބައްދަލުކޮށް، އެ ތަނުގައި އަމަލުކުރާ އާއްމު އުސޫލުތަކުގެ މައުލޫމާތު ދޭ ކަމަށެވެ. އޭގެ ތެރޭގައި ކޮންސެޓަށް އަމާޒުކޮށް ބޮޑެތި ހެދުން ފެހުމަކީ ޣިޔާސުއްދީން ސްކޫލުން ދުރު ކަންތައްތައް ކަމަށް ތޯހާ ވިދާޅުވި އެވެ.
"ސްކޫލުން އެޕްރޫވްކުރާ މިންވަރަކަށް ކޮންސެޓަށް ވެސް ހެދުން ފެހޭނީ. ކޮންސެޓުގެ ބޭނުމަކީ ކުދިންގެ ކިބައިގައި ހުރި ގާބިލްކަން ދެއްކުން. އެއީ ފެޝަން ޝޯއެއް ނޫން."
"ސްކޫލުން އެޕްރޫވްކުރާ މިންވަރަކަށް ކޮންސެޓަށް ވެސް ހެދުން ފެހޭނީ. ކޮންސެޓުގެ ބޭނުމަކީ ކުދިންގެ ކިބައިގައި ހުރި ގާބިލްކަން ދެއްކުން. އެއީ ފެޝަން ޝޯއެއް ނޫން،" އޭނާ ވިދާޅުވި އެވެ.
"ފީ ދެއްކުމުގެ ކުރިން ވަކި ވަކިން ބެލެނިވެރިންނާ ބައްދަލުކޮށްފައި ބުނަން ކޮންމެ މުބާރާތަކަށް ޖޯޒީއެއް ނުގަންނާނެއޭ. ސްކޫލްގެ އެކްޓިވިޓީ ޔުނީފޯމޭ ބޭނުންކުރާނީ ބިބާއެކު މުބާރާތްތަކުގައި ކުޅެން."
ޓީޗަރުންގެ ދުވަހު ވެސް އެންމެ ބޮޑު ވަރަކަށް ވެސް ދެވޭނީ ކާޑެއް ކަމަށާއި ދަރިވަރެއްގެ އުފަން ދުވަހެއް ނަމަ ކްލާހުގައި ގިނަ ވެގެން ކުއްޖަކަށް ދެ މެޓާ ދެވޭނެ ކަމަށް އޮންނަނީ އަންގައިފަ އެވެ.
"އިތުރު ހަރަދު ނުކުރާ ސަގާފަތް އުފައްދަން ބޭނުންވަނީ ކުދިންގެ މަސައްކަތުން ތަފާތު ދައްކައިދިނުމަށް،" ތޯހާ ވިދާޅުވި އެވެ.
އަސާސީ ތައުލީމް ހިލޭ ފޯރުކޮށްދިނުމަށް ސަރުކާރުގެ މައްޗަށް ގާނޫނުން ފަހިކޮށްދިނަސް، ސަރުކާރުގެ ސްކޫލްތަކުގެ ބެލެނިވެރިންގެ އެންމެ ބޮޑު ކަންބޮޑުވުމަކީ ސްކޫލްތަކަށް ކުރަންޖެހޭ ހަރަދު ބޮޑުވުމެވެ. ނަމަވެސް މި ހޭދަތަކާ ގުޅޭގޮތުން އެޑިއުކޭޝަން މިނިސްޓްރީގެ ބަހެއް ނުލިބުނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަރަކައިބޯ
21 March 2022
އެއީ ފަތަރާސިކަން އެހެންނޫންނަމަ ބޮޑު ޚަރަދެއް ކުރަން ޖެހިގެން ނުވާނެ
ޒަހާ22
19 March 2022
ސުކޫލަށް އެއްޗެއް ގަންނަން ނުޖެހޭ ގޮތް އެއީ ނެތް ގޮތެއް. ޓީޗަރުން ހަމަ ލިސްޓް ހަދަހަދާފަ ދޭންވީ ބެލެނެވެރިން ނުގަނެ ކީއްކުރާނީ ދަރިވަރު ސްކޫލަށް ފޮނުވަންޏާ. އެޑިއުކޭޝަން މިނިސްޓްރީން އެބަޖެހޭ މިކަމަށް ހައްލެއް ގެންނަން.
120687
18 March 2022
ދުވަސް ދުވަސް ފާހަގަ ކުރަން ބެލެނެވެރިން މެދުވެރިކޮށް ކުރާ ހޭދަތައް ހުއްޓާލަންޖެހޭ. މިއީ ވ ބޮޑު ނުއެދެވޭ ސަގާފަތެއް. ޚާއްޞަކޮށް ޕްރީސްކޫލުތަކުގެ މިކަންތައް ވަކިން ބޮޑު. ކޮންމެ އިވެންޓަަކަށް އަގު ބޮޑު ހެދުމާއި އެތައްއެތައް ޚަރަދެއް. ސުކޫލުތައް އެޑިއުކޭޝަން މިނިސްޓްރީއަށް ރަނގަޅަށް ރެގިއުލޭޓު ނުކުރެވޭކަން މިއިން އެނގެނީ.
ސްކޫލު
18 March 2022
ސްކޫލު ހިންގުމުގެ ވައްޓަފާޅި ބަދަލު ކޮށްގެން ބައެއް ކަންކަން ރަނގަޅު ކުރެވިދާނެ. މާދަރީ ދުވަހުގެ މާނައަކީ އަބަދު ހެދުން ލައިގެން ދައްކާ އެއްޗެއް ކަމުގައި ވާކަށް ނުޖެހޭ. ޚަރަދު ކުރަން ނުޖެހޭ ފަދަ ސަގާފަތެއް އަށަގަންނުވަން ޖެހޭނީ. މީގައި ސްކޫލު އެކަންޏެއް ނޫން، ބައެއް ބެލެނިވެރިންގެ ނުފޫޒުންވެސް ޚަރަދުބޮޑު ކޮށް ކަންކަން ކުރާގޮތަށް އެބަ ނިންމާ. އޭގެ އުނދަގޫ އެހެން ބެލެނިވެރިންނަށް އެބަ ދިމާވޭ. ދުރާލާ ކަންކަން ޕްލޭން ކުރުމުން، ޚަރަދުކުޑަ ވެފަ ފަސޭހަ
ވިކިލީކުސް
18 March 2022
އަހަރެންގެ އަންހެނުން މަސައްކަތް ކުރަނީ އެޑިޔުކޭޝަން މިނިސްޓްރީގެ ބަޖެޓުގަ. އޭނަ ބުނީ ރާއްޖޭގެ ކޮންމެ ސްކޫލަކަށް ބޮޑުސިންގާ ބަޖެޓެއް ދީފަ އޮންނަނީ ކުދިންގެ ތައުލީމީ ކަންތަކަށް މަގުފަހިކުރުވާ ޚަރަދުތަކަށް ބޭނުންކުރުމަށް. އޭގެތެރޭގަ ބިޑްކޮށްގެން އަގުހެޔޮކޮށް އޭފޯ ރީމާއި އެނޫންވެސްކުދިންނަށް ބޭނުންވާ ތަކެތި ހޯދައިދިނުމަކީސްކޫލްގެ މެނޭޖްމަންޓުގެ ކަމެއް. އާޓް ގަޑިއަށް މަސްދަޅެއް ގަތަސް ސްކޫލުން އެކަން ކުރަންޖެހޭނީ. ތިއީޕްރިންސިޕަލުންގެ މައްސަލަ.
އިބްނި މުޙަންމަދު
18 March 2022
ކޮންމެ މީހެއްގެ މައްސަލައެއް ކަމަށް ވިޔަސް ބެލެނިވެރީންނަށް ތަކުލީފު އުފުއްލާން ޖެހެނީ. ޕްރިންސިޕަލަކީ ވަކި ސަރުކާރެއްތަ؟ ކަންކަން ބަލައި މޮނިޓާރކުރާ ވަކި ޑިޕާޓްމަންޓެއް އޮތުމުގެ ބޭނުމަކީ ޕްރިންސިޕަލްގެ މައްސަލައެއް އުޅެންޏާ އެކަން ވެސް ރަނގަޅުކުރާކަށް ނޫންތޯއެވެ؟
އިބރޭ
18 March 2022
ތިކަންތައް ކުރުވަނީ މިނިސްޓްރީ އޮފް ޢެޑިއުކޭޝަނުން ޕްރިންސިޕަލުން މެދުވެރިކޮށް ޓީޗަަރުންލައްވާ. މިނިސްޓްރީ އިން ޒިންމާ ނަގަންވާނީ. މިނިސްޓްރީ އުސޫލާ އެއްގޮތްވީމާ ބީރު ކަންފަތެއް މިނިސްޓްރީއިން ދެނީ
ހީނާ
18 March 2022
ސްކޫލް ގެ ޓީވީ ގަނެ ހަދަން ޖެހެނީ ވެސް ބެލެނި ވެރިން،
ޑރ. އާސިޔަތު
18 March 2022
އަންގާފައި އޮންނަނީ ސޯޝަލް މީޑިއާށާއި ގްރޫޕްތަކުގައި އެވާހަކަ ނުދެއްކުމަށް. ކޮންމެ ކުއްޖަކު އަތުން 200 ރުފިޔާ ހޯދި. އަދި ޓީވީއެއް ނުފެނޭ.
އައިސަ
18 March 2022
ސަރުކާރު ސްކޫލެއްގައި ބެލެނިވެރިން ލައްވާ ވާހަކަ ފޮތާއި ފޮތް ރެކް އެބަގަނުވާ. ފޮތް ވެސް ގިނައިން ގެންނަ ކުއްޖަކަށް ބެޖް ދޭ ގޮތަށް. އަތްމަތި ދަތި ބެލެނިވެރިންނަށް ގިނައިން ފޮތް ނުދެވުނު ކުއްޖަކަށް ބެޖެއްނުލިބޭނެ. މީ އަހަރެން ދެކޭގޮތުގައި އެމޯޝަނަލް އެބިއުސް. ގަނާ ކުރުމުގެ ވެސް ވައްތަރެއް. މީ ވެރިން ޓީޗަރުން ލައްވާ ކުރުވާ ކަންތައް.
ޑެން
18 March 2022
މަޝަށް މާ ހަަރަދު ބޮޑު އިންޓާވަލް...ކޮންމެ ދުވަހަކު ރަނގަޅު އެއްޗެއްކުއްޖައަށް ދޭންވިއްޔަ އެބަ ދޭ ދުވާލަކަށް 50-60 ރުފިއާ.
ނޭނގުނު
18 March 2022
އަމިއްލަ ދަރިއަށް ރަނގަޅު އެއްޗެއް ކާންދޭން ޖެހުނީމަ އެއީ މައްސަލައެއްތަ؟
ޑަންޑަން
18 March 2022
ބުނަން! ކަލޭ ބިރިޔާނި ގަންނަންޏާ ތިވަރު ގޮސްދާނެ އެވެ. އެކަމަކު އިންޓަވަލް އެއް ގަންނާކަށް ތިވަރު ހޭދައެއް ކުރާކަށް ނުޖެހޭނެ އެެވެ. ޑްރިންކް އަކާއި ކާލާނެ އެއްޗެއް -/20ރ އިން ހަމަ ރަނގަޅަށް ވެސް ގަނެވޭނެ އެވެ. އިޤްތިޞާދު ކުރަން ކަލެއަށް ނޭނގުން އެއީ އެހެންބަޔަކު ކުށްވެރި ކުރަން އޮތް ހުއްޖަތެއް ނޫނެވެ.
އަބްޑޫޅް
18 March 2022
ބައެއް މައިންބަފައިންނަށް އެބަ ޖެހޭ، މިސްގެ ހުޅުމާލޭ ފުލެޓުގެ ކުލީ ފައިސާ ދޭންވެސް. ކޮންމެ ދުވަހަކު ސޯ ގެ ގެއަށް އާފަލު ކިލޯއެއް ފޮނުވަންވެސް އެބަ ޖެހޭ. އެހެން މިސް އެއްގެ ކަރަންޓު ފީ ގަވައިދުން ދައްކާދޭ މައިން ބަފައިންގެ ދެމީހަކުވެސް އެބަ އުޅޭ.