މާދަމާ ފަށާ ދިރާސީ އާ އަހަރާ އެކު، ހުޅުވަން ނިންމާފައިވާ ޝަހީދު އަލީ ސްކޫލުން 1،900 އަށް ވުރެ ގިނަ ކުދިންނަށް ޖާގަ ދީފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ހުޅުމާލެ 2 ގައި ސަރުކާރުން އިމާރާތްކުރި އެ ސްކޫލް ހުޅުވުމުގެ އެންމެ ފަހުގެ ތައްޔާރީތަކާ ގުޅޭގޮތުން ނޫސްވެރިންނާ ވާހަކަ ދައްކަވަމުން މިނިސްޓަރު ވިދާޅުވީ، އެ ސްކޫލްގައި ކިޔެވުމަށް 1،950 ދަރިވަރަކަށް ޖާގަ ދީފައިވާ ކަމަށެވެ.
ދެ ދަންފަޅި އަށް ކިޔަވައިދޭން ނިންމާފައިވާ އެ ސްކޫލުގައި 230 ޓީޗަރުން ތިބޭނެ ކަމަށް ވެސް އިސްމާއިލް ވިދާޅުވި އެވެ.
މި ވަގުތު މާލެ ސަރަހައްދުގައި އެންމެ ޒަމާނީ ފެންވަރަށް އިމާރާތް ކޮށްފައިވާ ސްކޫލަކީ ޝަހީދު އަލީ ސްކޫލުކަން ފާހަގަ ކުރައްވަމުން މިނިސްޓަރު ވިދާޅުވީ، މާދަމާ ކިޔެވުން ފަށާއިރު އެއްވެސް ދަތިކަމެއް ކުރިމަތި ނުވެ އެ ސްކޫލުގައި ކިޔަވައިދެވޭ ވަރަށް ތައްޔާރު ވެފައިވާ ކަމަށެވެ.
ޝަހީދު އަލީ ސްކޫލަކީ މި ސަރުކާރުން މާލެ ސަރަހައްދުގައި އިމާރާތްކުރި ފުރަތަމަ ސްކޫލް ވެސް މެ އެވެ.
އާރުސީސީއާ ހަވާލު ކޮށްގެން އިމާރާތްކުރި ޝަހީދު އަލީ ސްކޫލްގެ މަސައްކަތް ރައީސް ޑރ. މުހައްމަދު މުއިއްޒު ރަސްމީކޮށް ފައްޓަވައި ދެއްވީ ޑިސެމްބަރު 2023 ގަ އެވެ. އެ ސްކޫލްގެ މަސައްކަތް އާރުސީސީއާ ހަވާލުކުރީ ޖޫން 27، 2021 ގަ އެވެ.
ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ.
އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި ތިން ކެމިސްޓްރީ ލެބާއި އިންޑޯ ހޯލަކާއި އައުޓްޑޯ ހޯލެއް ވެސް ވަނީ ގާއިމްކޮށްފަ އެވެ. އޭގެ އިތުރުން 20 ކުދިންގެ ޖާގައިގެން ތިން ލިފްޓު ވެސް ވަނީ ހަރުކޮށްފަ އެވެ.
އެޑިއުކޭޝަން މިނިސްޓަރު މިއަދު ވިދާޅުވީ، ދޮޅުމަސް ދުވަހުގެ ބަންދަކަށް ފަހު، މާދަމާ ފަށާ ދިރާސީ އާ އަހަރުގެ ކިޔެވުމަށް ސްކޫލުތަކުން ތައްޔާރު ވެފައިވާ ކަމަށެވެ.