ދޮޅުމަސް ދުވަހުގެ ބަންދަކަށް ފަހު، މާދަމާ ފަށާ ދިރާސީ އާ އަހަރުގެ ކިޔެވުމަށް ސްކޫލުތަކުން ތައްޔާރު ވެފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
"މިހާރު" އަށް ދެއްވި އިންޓަވިއުއެއްގައި މިނިސްޓަރު ވިދާޅުވީ ހުރިހާ ސްކޫލުތަކަށް ބޭނުންވާ ފޮތްތައް ފޮނުވައި، ނިންމާފައިވާ ކަމަށެވެ. އަދި ޓީޗަރުން ވެސް ސްކޫލުތަކަށް ހަމަވެ، ސްކޫލުތައް ދިރާސީ އާ އަހަރަށް ތައްޔާރު ވެފައިވާ ކަމަށް އޭނާ ވިދާޅުވި އެވެ.
ނަމަވެސް ރަށްރަށުން މާލެ ބަދަލުވުމަށް އެދޭ ކުދިންގެ ފޯމުތައް އަދި ވެސް ލިބެމުން އަންނަ ކަމަށާއި ހާއްސަކޮށް ބިދޭސީ ބައެއް ޓީޗަރުން ނާންނާނެކަން ފަހު ވަގުތު އެންގުމުން ކުރިމަތިވާ ދަތިތަކެއް އެބަހުރި ކަށް އިސްމާއިލް ވިދާޅުވި އެވެ.
"ދަރިވަރުންނަށް ދޭން ޖެހޭ ފޮތްތައް ހުރިހާ ސްކޫލަކަށް ފޮނުވައި މިހާރު އެ ތަން ވެސް [ފޮތްތައް ބަހައްޓާތަން] ތަޅުލައިފިން. ދެން ލަސްވަނީ ދަރިވަރު މި ބަދަލުވަނީ މާލެ، ފޮތް ރަށަށް ފޮނުވީމަ އަނެއްކާ މި ޖެހެނީ މާލެ ގެންނަން ފޮތްތައް. އެ ލަސްކަން އުޅެދާނެ،" މިނިސްޓަރު ވިދާޅުވި އެވެ.
"ޓީޗަރުން ނިކުންނަ ޖެހޭ ދުވަހަކީ އިއްޔެ. އެކަމަކު ބޭރުން އަންނަ ޓީޗަރުންގެ ލަސްތަކެއް އުޅޭ ބައެއް ފަހަރަށް. އެންމެ ފަހު ވަގުތު ސްކޫލަށް ނުނިކުތުމުން ބަލާއިރު ވެސް އެބަ އެނގޭ ބައެއް ފަހަރަށް އެ ޓީޗަރު ނާންނަނީ ކަން. އަނެއްކާ އެ ވަގުތު ޓީޗަރެއް ހޯދަން ދަތިވުން ކަހަލަ ކަންކަން އުޅެދާނެ."
މި އަހަރުގެ ދިރާސީ އަހަރުގެ ކިޔެވުން ފަށާއިރު ސަރުކާރުގެ 219 ސްކޫލެއްގައި ކިޔަވައިދޭނެ އެވެ. އެ ސްކޫލުތަކުގައި 80،715 ދަރިވަރުން މި އަހަރު ތައުލީމު ހާސިލް ކުރާނެ އެވެ. އެ ދަރިވަރުންނަށް ކިޔަވައިދޭން 9،952 ޓީޗަރުން ހަރަކާތްތެރިވާނެ ކަމަށް މިނިސްޓްރީގެ ތަފާސްހިސާބުން ދައްކަ އެވެ.
އެޑިއުކޭޝަން މިނިސްޓްރީން މިދިޔަ ހަފުތާގައި އާންމުކުރި ތަފާސްހިސާބުތަކަށް ބަލާއިރު ދިރާސީ އާ އަހަރު ސަރުކާރު ސްކޫލްތަކުގެ ގްރޭޑު އެކެއްގައި ކިޔެވުމަށް 4،790 ދަރިވަރުން އެދިފައިވެ އެވެ. އެއީ އަތޮޅުތަކުގެ ރަށްތަކުން ގްރޭޑު އެކަކަށް ވަނުމަށް އެދުނު 3،042 ދަރިވަރުންނާއި މާލެ ސަރަހައްދުގެ ސްކޫލްތަކުގައި ގްރޭޑު އެކަކުން ޖާގަ އަށް އެދުނު 1،748 ދަރިވަރުންނެވެ.
މި އަހަރު ވެސް އަތޮޅުތަކުން މާލެ އަށް 1،530 ދަރިވަރުން ބަދަލުވެފައިވާއިރު މާލެ އިން ހުޅުމާލޭގެ ސްކޫލްތަކަށް ބަދަލުވުމަށް 836 ދަރިވަރުން އެދިފައިވެ އެވެ.
ދިރާސީ އާ އަހަރުގެ ކިޔެވުން މާދަމާ ފަށާއިރު، ދަރިވަރުންނަށް މިދިޔަ އަހަރުގެ ބޮޑު ޗުއްޓީ ދިނީ ކުރިން އޮތް ގޮތަށް ޑިސެމްބަރު މަހު އެވެ. ކޮވިޑް 19އާ ގުޅިގެން އެ ބަދަލު ގެނައީ 2021 ވަނަ އަހަރު އެވެ. ބެލެނިވެރިން އެދުމުގެ މަތިން ރައީސް ޑރ. މުހައްމަދު މުއިއްޒު އެ ބަދަލު ގެންނަވައި ޑިސެމްބަރުގައި ބޮޑު ޗުއްޓީ ލިބޭ ގޮތަށް ބަދަލު ކުރެއްވުމުން، އެއީ ޑިސެމްބަރުގައި ޗުއްޓީ ލިބުނު ފުރަތަމަ އަހަރެވެ.