ދިރާސީ އާ އަހަރާ އެކު މިއަދު ހުޅުވި ޝަހީދު އަލީ ސްކޫލުން 2،000 އަށް ވުރެ ގިނަ ދަރިވަރުންނަށް ޖާގަ ދީފައިވާ ކަމަށާއި އޭގެ ތެރޭގައި އެންމެ ގިނައީ އަތޮޅުތަކުން އައިސް ތިބި ދަރިވަރުން ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
ހުޅުމާލޭގައި އަލަށް އިމާރާތްކުރި ސްކޫލް ހުޅުވަން ބޭއްވި ރަސްމިއްޔާތުގައި މިނިސްޓަރު ވިދާޅުވީ އިއްޔެގެ ނިޔަލަށް އެ ސްކޫލަށް ވަންނަން އެދިފައި ތިބި ކުދިންގެ ތެރެއިން 1،950 ދަރިވަރުންނަށް ޖާގަ ދިން ކަމަށެވެ. އެއާއެކު އެ ސްކޫލް މިއަދު ހުޅުވީ 2،100 ދަރިވަރުންނާ އެކުގައި ކަމަށް އިސްމާއިލް ވިދާޅުވި އެވެ.
ޝަހީދު އަލީ ސްކޫލްގެ މުހިއްމު ބައެއް މައުލޫމާތު
- 2،100 ދަރިވަރުން
- 230 ޓީޗަރުން
- 32 ކުދިންގެ ޖާގައިގެ 54 ކްލާސްރޫމު
- ގްރޭޑް 1-10 އަށް ކިޔަވައިދޭނެ
- 400 ކުދިންގެ އޮޑިޓޯރިއަމެއް
- ލައިބްރަރީ އާއި ކޮމްޕިއުޓަރު ލެބާއި ތިން ކެމިސްޓްރީ ލެބް
- އިންޑޯ ހޯލަކާއި އައުޓްޑޯ ހޯލެއް
މިއީ މާލެ ސަރަހައްދުގައި މިހާރު ހުރި ދެ ވަނައަށް އެންމެ ދަރިވަރުން ގިނަ ސްކޫލެވެ. އެންމެ ގިނަ ކުދިން ކިޔަވާ ހުޅުމާލެ ހުރަވީ ސްކޫލްގެ އާބާދީއަކީ 2،200 އެވެ.
މި ސްކޫލަކީ މުޅި ދިވެހި ރާއްޖޭގެ ހުރިހާ ރަށްތައް ޝާމިލްކުރާ ތަނެއްގެ ގޮތުގައި އޮންނާނީ.
"އެ 2،100 ދަރިވަރުންގެ ތެރެއިން 77 ޕަސެންޓް ދަރިވަރުންކީ އަތޮޅުތެރޭގެ ރަށްތަކަށް ނިސްބަތްވާ ދަރިވަރުން. އެހެންވީމަ އަޅުގަނޑު ދަންނަވާލަން ބޭނުންވަނީ މާލޭގައި މި ސްކޫލު ގާއިމް ވެފައި އޮތަސް ހުޅުމާލޭގެ ދެވަނަ ފިޔަވަހީގެ މި ތަނުގައި މި ސްކޫލު ހުޅުވި ކަމުގައި ވިޔަސްމެ، މި ސްކޫލަކީ މުޅި ދިވެހި ރާއްޖޭގެ ހުރިހާ ރަށްތައް ޝާމިލްކުރާ ތަނެއްގެ ގޮތުގައި އޮންނާނީ،" މިނިސްޓަރު ވިދާޅުވި އެވެ.
"77 ޕަސެންޓަކީ ވަރަށް ބޮޑު އަދަދެއް. މި ސްކޫލު ވެގެންދާނީ ހުރިހާ ރަށްތަކެއް، ހުރިހާ އަތޮޅުތަކެއް މި ސްކޫލުގެ ތެރެއިން ޝާމިލްވެގެންދާ، ޝޯކޭސް ކުރެވެިގެންދާ ސްކޫލަކަށް."
ހުޅުމާލެ 2 ގައި މި ސަރުކާރުން އިމާރާތްކުރި އެ ސްކޫލު ކިޔަވައިދެނީ ދެ ދަންފަޅިއަށެވެ. އެ ސްކޫލުގައި 230 ޓީޗަރުން ކިޔަވައިދޭނެ އެވެ.
މިވަގުތު މާލެ ސަރަހައްދުގައި އެންމެ ޒަމާނީ ފެންވަރަށް އިމާރާތް ކޮށްފައިވާ ސްކޫލަކީ މި ސަރުކާރުން މާލެ ސަރަހައްދުގައި އިމާރާތްކުރި ފުރަތަމަ ސްކޫލް ވެސް މެ އެވެ.
އާރުސީސީއާ ހަވާލު ކޮށްގެން އިމާރާތްކުރި ޝަހީދު އަލީ ސްކޫލްގެ މަސައްކަތް ރައީސް ޑރ. މުހައްމަދު މުއިއްޒު ރަސްމީކޮށް ފައްޓަވައި ދެއްވީ ޑިސެމްބަރު 2023 ގަ އެވެ. އެ ސްކޫލްގެ މަސައްކަތް އާރުސީސީއާ ހަވާލުކުރީ ޖޫން 27، 2021 ގަ އެވެ.
ގްރޭޑް 1-10 އާ ހަމައަށް ކިޔަވައިދޭ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ.
އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި ތިން ކެމިސްޓްރީ ލެބާއި އިންޑޯ ހޯލަކާއި އައުޓްޑޯ ހޯލެއް ވެސް ވަނީ ގާއިމްކޮށްފަ އެވެ. އޭގެ އިތުރުން 20 ކުދިންގެ ޖާގައިގެ ތިން ލިފްޓު ވެސް ވަނީ ހަރުކޮށްފަ އެވެ.
