ތަމްރީންތަކުގައި އުޅެނިކޮށް މަރުވި ރާފިއު: އޭނާ ތަމްރީނަށް ފުރިއިރު ވެސް ހުރީ ހުން އައިސްފައި.
14 މާޗް 2022 - 12:03
73 comments
ސިފައިންގެ ތަމްރީނަށް ޅ. މާފިލާފުއްޓަށް ފަތިހު ފުރުމުގެ ކުރިން ޖެޓީގައި ހުރެ ދަރިފުޅު، މުހައްމަދު ރާފިލް ބައްޕައަށް ގުޅި އެވެ. ފުރާ ވާހަކަ އާއި އެ ރަށަށް ދެވުމުން ގުޅާނެ ކަމަށް ބުންޏެވެ. ދެން ގުޅީ އެ ސަލާމަތުން އެތަނަށް ފޯރައިފި ކަމުގެ ޔަގީންކަން ދިނުމަށެވެ. ތަމްރީނުތަކުގައި ބިޒީވާނެތީ ފޯނަށް ދެން ނުގުޅޭނެ ވާހަކަ ބުންޏެވެ. އިމަޖެންސީގައި ގުޅޭނެ ނަމްބަރު ދީފައި ފޯނު ބޭއްވީ އެވެ.
އެއީ، އުމުރުން 19 އަހަރުގެ ދަރިފުޅުގެ ފަހު ކޯލެވެ.
"އޭގެ ފަހުން މާފިލާފުށިން ލިބުނީ ދެ ކޯލް. ފުރަތަމަ ފަހަރު ބުނީ ދަރިފުޅުގެ ހާލު ސީރިއަސްވެގެން ފަރުވާދޭން ގެންގޮސްފިއޭ ނައިފަރު ހޮސްޕިޓަލަށް. ދެން ލިބުނީ މަރުގެ ހަބަރު،" ބައްޕަ އަހްމަދު ރަބީލް ކިޔައިދިނެވެ.
"ކުޑަ ވަގުތުކޮޅެއްގެ ތެރޭގައި މި ހުރިހާ ކަމެއް ހިނގައި ދަރިފުޅު ވަކިވެގެން މިދިޔައީ."
ދަރިފުޅުގެ މި ވަކިވުމުގައި، އޭނާ މިހާރު ތުހުމަތުކުރާ ގޮތުގައި، އިހުމާލުތަކެއް އެބަހުއްޓެވެ.
އެކަމަކު، މި ތުހުމަތުތަކާ ގުޅިގެން އެމްއެންޑީއެފުން ޖަވާބެއް ނުދިނެވެ. އެތަނުގެ މީޑިއާ އޮފިޝަލަށް ގުޅުމުން ވިދާޅުވީ "ކޮމެންޓެއް ނެތް" ކަމަށެވެ. ދެން ވިދާޅުވީ ތަމްރީނުތަކުގައި ދިމާވާ ކަންކަމާ ގުޅިގެން ކުރިން ބަޔާނެއް ނެރެފައި އޮތް ކަމަށެވެ. އެ ވިދާޅުވީ އެމްއެންޑީއެފުން މީޑިއާއަށް ފޮނުވި މެސެޖެއްގެ ވާހަކަ އެވެ.
އަސްކަރީ ތަމްރީންތަކެއްގައި ސިފައިން ބައިވެރިވަނީ. - ފޮޓޯ: އެމްއެންޑީއެފް
ރާފިލްގެ މަރާއި ތަމްރީންގައި އުޅުނު އިތުރު ދެ މީހެއްގެ ހާލު ސީރިއަސްވުމާ ގުޅިގެން އެމްއެންޑީއެފުން މީޑީއާތަކަށް ފޮނުވި މެސެޖުގައި އޮތީ، އަސްކަރީ ތަމްރީނުތަކަކީ އޭގެޒާތުގައި ބުރަ އަދި ރިސްކުހިމެނޭ ތަމްރީނުތަކަކަށް ވާތީ އެކަމަށް ކުދިން ހޮވަނީ ވެސް ފިޒިކަލް އަދި މެޑިކަލް ޓެސްޓުތަކެއް ހެދުމަށް ފަހު ޓްރެއިނިންގތަކުގައި ބައިވެރިވެވޭ ގާބިލްކަން ހުރިކަން ޔަގީންކޮށްފައި ކަމަށެވެ. "ތިން ކުއްޖެއްގެ މެޑިކަލް މައްސަލަތަކެއް ދިމާވެ، އޭގެތެރެއިން އެއް ކުއްޖަކު ނިޔާވެ، ދެވަނަ ކުއްޖަކަށް އައިސީޔޫ ގައި ފަރުވާކުރަންޖެހި އަދި ތިންވަނަ ކުއްޖަކު އެޑްމިޓްކޮށް ފަރުވާދޭން ޖެހުމަކީ، އެމްއެންޑީއެފް އިން މިކަމާ ކަންބޮޑުވެ ހިތާމަ ކުރާކަމެކެވެ." އެ މެސެޖެއްގައި ބުންޏެވެ. އެތަނުން ބުނީ ހިނގައިދިޔަ ކަންކަމާ ގުޅިގެން ބަލަންޖެހޭ ކަންކަން ބެލުމަށް އެކި ދާއިރާތަކުގެ އެކްސްޕާޓުން ހިމެނޭގޮތަށް ކޮމިޓީއެއް އެކުލަވާލާފައިވާ ކަމަށާއި އެއްޗެއް ބުނަން އެނގޭނީ ކޮމިޓީގެ މަސައްކަތް ނިމުމުން ކަމަށެވެ.
ރާފިލްގެ ބައްޕަ ބުނި ގޮތުގައި ޓްރޭނިންއަށް ފުރިއިރު ވެސް ހުން އައިސްފައި ހުރި ދަރިފުޅަށް އެކަށީގެންވާ ފަރުވާ މަރުވުމާ ހަމައަށް ވެސް ލިބިފައެއް ނުވެ އެވެ. މާފިލާފުށީގައި ސިއްހީ ފަރުވާދޭނެ ތަނަކާއި ޑޮކްޓަރުން ތިބެ ފަރުވާ ނުލިބުމާއި ބަލިވެ އުޅޭކަން އެނގި ހުރެ ބުރަ ތަމްރީނުތަކުގައި ބައިވެރިކުރުމަކީ މައްސަލައެއްގެ ގޮތުގައި އޭނާ ނަގަ އެވެ.
މި ތުހުމަތު އޭނާ ކުރީ ދަރިފުޅުގެ ފޯނުން ފެނުނު މެސެޖްތަކާއި ފަހު ކޯލްގައި ދެއްކި ވާހަކަތަކުގެ އިތުރުން ފަރުވާއާ ގުޅޭ ގޮތުން އޭނާއަށް ލިބުނު މައުލޫމާތުތަކުންނެވެ.
ހުން އައި ވާހަކަ މެސެޖްކޮށް، 11 ފަހަރު ގުޅި!
ބައްޕަ "މިހާރު" އަށް ކިޔައިިދިން ގޮތުގައި، ސްކޫލްގައި އުޅުނުއިރު ކެޑޭޓަށް ދަރިފުޅު ވަނީ ވެސް ސިފައިންގެ ހިދުމަތާ ގުޅެން ޝައުގުވެރިވާލެއް ބޮޑުކަމުންނެވެ. އޭ ލެވެލް ނިމުމާ އެކު އިތުރު ކޯހެއްގެ ވިސްނުމެއް ނެތި ވެސް ބޭނުންވީ އަވަހަށް އެމްއެންޑީއެފަށް ވަންނާށެވެ. ތަމްރީނަށް މީގެ ހަފުތާއެއްހާ ދުވަސްކުރިން ފުރަން ޖެހުނީ، މެޑިކަލް ހަދައި ފާސްވެގެން ވަޒީފާ ހަމަޖެހުނުތާ ކުޑަ ދުވަސްކޮޅެއްގެ ތެރޭގަ އެވެ.
"އަބަދުވެސް ބުނާ ވާހަކައެއް އެއީ، އަޒުމަކީ ގައުމަށް ހިދުމަތްކޮށްދިނުމޭ،" ބައްޕަ ބުންޏެވެ.
މި އުއްމީދުގައި ފުރަން ގާތްވެފައި ވަނިކޮށް ހުން އައީ އެވެ.
"ދަރިފުޅު މި ވާހަކަ އެބައޮތް [އެމްއެންޑީއެފުން ހަވާލުވެ ހުންނެވި] ސާ އަށް މެސެޖްކޮށްފައި. ފުރަން ޖެޓީގައި ހުރެ 11 ފަހަރު ގުޅާފައި ވެސް އެބައޮތް. މި ރެކޯޑު ފޯނުގައި އެ އޮތީ ފެންނަން،" ބައްޕަ ބުންޏެވެ.
"އެ ކުއްޖާ އެބަހުރި ސިއްހީ ހާލަތު ގޯސްކަން ބުނެދޭން ވަރަށް މަސައްކަތްކޮށްފައި. އޭނަ ކުރި މެސެޖްތައް ބަލާފައި ހުރީ ވެސް،"
އެމްއެންޑީއެފް ޓްރެއިނިން ދިޔަތަނުން މަރުވި ރާފިލް
މާފިލާފުށީގައި ވެސް ޑޮކްޓަރުން ތިބޭއިރު، ހުން އައިސްފައި ތިބޭއިރު ތަމްރީނަށް ނެރުމުގެ ކުރިން ފުރަތަމަ ކަމަކަށް ވާން ޖެހޭނީ އެތަނުގެ ޑޮކްޓަރަށް ދައްކައިގެން ވެސް ފަރުވާދިނުން ނޫންތޯ ބައްޕަ ސުވާލު އުފެއްދި އެވެ.
"މާފިލާފުއްޓަށް ދިޔަތާ ޖެހިގެން އައި ދުވަހު ތަމްރީންތަކަށް މި ނެރުނީ، ތިންސަތޭކައެއްހާ ކުދިން އެއްފަހަރާ ތަމްރީންތަކެއް ފަށާއިރު ބަލަންވާނެ ނޫންތޯ އެ ކުދިންގެ ސިއްހީ ކަންކަމަށް ވެސް. އެ ކުއްޖާ އެ ދުވަހު ތަމްރީނުތަކުގައި ބައިވެރިކުރުމާ މެދު މެޑިކަލް ޓީމުން ގޮތް ނިންމަން ޖެހިފައި އޮތް ހާލަތެއް ނޫންތޯ އެއީ ގަދައަށް ހުން އައިސްފައި ހުރުން،" ބައްޕަ ކަންބޮޑުވުންފާޅުކުރި އެވެ.
"ނޭވާ ހާސްވެ ހިތް ހުއްޓުނީ،"
ބައްޕަ ކިޔައިދިން ގޮތުގައި ރާފިލް ތަމްރީނުގައި އުޅެނިކޮށް ކުއްލިއަކަށް ނޭވާ ހާސްވީ އެވެ. ހާލު ސީރިއަސްވާން ފެށުމުން، ތަމްރީން ހަދާ ރަށާ 15 މިނެޓުގެ ރާސްތާގައި އޮންނަ ޅ. ނައިފަރަށް ފުރުވާލީ އެވެ. އެކަމަކު ހޮސްޕިޓަލަށް ގެންދިޔައިރު ވިންދު އޮތީ ހުއްޓިފަ އެވެ.
ބައްޕައަށް ބުރަވެވެނީ މާފިލާފުށީގައި އަދި ނައިފަރަށް ގެންދިޔަ ލޯންޗު މަތީގައި ވެސް ދަރިފުޅަށް އެކަށީގެންވާ ފަރުވާދީފައި ނުވާ ކަމަށެވެ.
"އެމްއެންޑީއެފަށް ކިޔައެއް ނުދެވުނު ދަރިފުޅަށް ދިން ފަރުވާއެއް. ލޯންޗު މަތީގައި ވެސް ނެތް އެއްވެސް ފަރުވާދީފައެއް. ހިތް ހުއްޓުނީމަ ޕަންޕްކޮށްފައެއް ނެތް. ކްލިނިކެއް ހުރެފައި، ޑޮކްޓަރެއް ހުރެފައި، ނައިފަރަށް ގެންދާއިރު ނޭވާ ހާސްވާ މީހަކަށް ދިން ފަރުވާއަކީ ކޮބައިތޯ އަޅުގަނޑު ސުވާލުކުރިން. ނައިފަރަށް ގެންދިޔައިރު އޮކްސިޖަން އިނީ ޒީރޯގައި،" ބައްޕަ ބުންޏެވެ.
ރާފިލްގެ މަރު ފޯމުގައި އިނީ ބައްޕަ ބުނާ ގޮތުގައި ހިތް ހުއްޓިގެން މަރުވީ ކަމަށެވެ. ކޮވިޑަށް ޕޮޒިޓިވްކަން އެންގީ ޖަނާޒާގެ ކަންތަކުގައި އުޅެނިކޮށް މާ ފަހުން ކަމަށް ބުންޏެވެ.
ޅ. ނައިފަރު ހޮސްޕިޓަލުގެ މެނޭޖަރު ޖައުފަރު އަބްދުﷲ ވިދާޅުވީ އެތަނަށް ގެންދިޔައިރު ފުރާނަ ހުރި ކަމުގެ އެއްވެސް އަލާމާތެއް ނެތް ކަމަށެވެ. ދަތުރުމަތީގައި ސީޕީއާރު ދެމުން އައި ކަމަށް އެމްއެންޑީއެފްގެ ޑޮކްޓަރުންނާ ހަވާލާ ދެއްވައި އޭނާ ވިދާޅުވި އެވެ.
ޑޮކްޓަރުން ލަފާ ކުރައްވަނީ، އޭނާ ވިދާޅުވި ގޮތުގައި، ހީޓް ސްޓްރޯކެއްގެ ސަބަބުން އިތުރު ކޮމްޕްލިކޭޝަންސްތަކެއް ދިމާވެ ހިތް ހުއްޓުނީ އެވެ.
އާއިލާއިން އެދެނީ ފަރުވާކުޑަކުރި ސަބަބު ބުނެދޭން
ބައްޕަ ބުނި ގޮތުގައި ދަރިފުޅުގެ ބަލިކަން އެންގުމާ އެކު އެކަށީގެންވާ ފަރުވާ ވަގުތުގައި ދެވުނު ނަމަ ފުރާނަ ސަލާމަތްވުުމުގެ ފުރުސަތު އެބައޮތެވެ. އެކަމަކު އޭގެ ބަދަލުގައި، ހަށިގަނޑު ބަލިކަށިވެފައި ވަނިކޮށް ބުރަ ތަމްރީނުތަކަކުން އިތުރަށް ތަކުލީފު ޖެއްސުމަކީ ދަރިފުޅު ވަކިވެގެން ދިޔަ ސަބަބެވެ.
ސިފައިންތަކެއް ބަނދަރުގައި އޮތް ދޯންޏެއް ކައިރީގައި.
އާއިލާ ބޭނުންވަނީ ފަރުވާ ދިނުމުގައި އިހުމާލުވި ސަބަބު އެމްއެންޑީއެފުން ސާފުކުރުމެވެ. އެތަނުގައި ތަމްރީނު ހަދާ އެހެން މީހުންނާ މެދު ވެސް ކަންކުރަނީ މި އުސޫލުންތޯ އޭނާ ސުވާލު އުފެއްދެވި އެވެ.
"ދަރިފުޅަށް ދިމާވީ ހިތާމަވެރި ގޮތެއް، އެކަމަކު އެހެން މީހުންނާ މެދު ވެސް ހަމަ މިހެންތޯ ކަން ހިނގަނީ، ފަރުވާގައި އިހުމާލުވަނީތޯ،" އޭނާ ސުވާލު އުފެއްދި އެވެ.
ރަބީލް ބުނި ގޮތުގައި ދަރިފުޅުގެ މަރާ ގުޅިގެން އެމްއެންޑީއެފުން އޭނާއާ ބައްދަލުކުރަން މިއަދު ހަމަޖެހިފައިވެ އެވެ. އޭނާގެ އެ ތުހުމަތުތަކާއި ސުވާލުތައް އެ މީހުންނަށް ހުށަހަޅާނެ ކަމަށް ބުންޏެވެ.
"ބަލައެއް ނުގަނެވޭ، ގަބޫލެއް ނުކުރެވޭ މިހާ ކުޑަ ހިނދުކޮޅެއްގެ ތެރޭގައި ދަރިފުޅު މި ވަކިވެގެން ދިޔައީ އިހުމާލެއް ނެތި ކަމަށް."
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަސްލަމްބެ
16 March 2022
އެކުދިންނާ ހަވާލުވެ ހުރި ސޯއަކު ނޫނީ ކޮމާންޑަރަކު އެވަނީ ވަރަށް ބޮޑު އިހުމާލެއްވެފައި. އޭނާއާ މެދު ފިޔަވަޅު އެޅެންވާނެ. ދައުވާވެސް ކުރެވެންވާނެ. މަރުގެ ދިޔަވެސް ދޭންޖެހޭނެ. ސިފައިންގެ ތަމްރީނުތަކޭ ކިޔައި އިހުމާލު ފަސްއަޅާ ފޮރުވާލިޔަދީގެން ނުވާނެ. ކޮންމެ ފުރާނައަކީ މުހިއްމު އެއްޗެއް. އޭގެ އަގު ދައްކަންޖެހޭނެ.
ޙަބީބު.
15 March 2022
ސިފައިންގެޔައް ވައްދާއިރު ބަލަންޖެހެނީ ފިޒިކަލްވަރުގަދަމީހުން މީހަކު ވަކިވިޔޭ ކިޔާފަ މަގުމަތިން ހޮވައިގެން މީހުން ނުވައްދާތި
އެކްސިސް
15 March 2022
ރާއްޖެއަކަށް 300 އައު ސިފައިންނެއް ބޭނުމެއް ނޫން.
ދޮންބެގެ ދަރި
15 March 2022
އެހެންނޫނަސް ދިވެހި ސިފައިންނަކީ ފިނޑި ފިނދަނަ ތަކެއްްތާދޯ..؟؟ އިންޑިޔާ ސިފައިން ހުރިހާ ކަމެއް ބަރާބަރަށް ކުރާނެ.. އެމީހުން މިރާއްޖެ ސަލާމަތްކުރާނެ ނޮވެމްބަރ 3 ގަ ކުރިގޮތަށް. އެއީ މި ސަރުކާރަށް ޔަގީން ކަމެއް..
ާއަލިމޯޑު
15 March 2022
ކޮމެންޓް ކުރާ ބޭފުޅުންނަށް އެނގޭތީ އެއީ ކިހާ ބޮޑު ގުރުބާނީއެއް ވާން ޖެހޭ ބައެއްކަން.ހަމައެކަނި ޓްރެއިނިންގ ކިޓް ލިސްޓަށްވެސް ތަކެތި ހަމަކުރަން ދޭ ގާތްގަނޑަކަށް 15 ހާހެއް ހާ ރުފިޔާ.
އަލީ އަސްފާުގު
14 March 2022
ތިޔަ ކަމުގަ އިހުމާލުވާ ބަޔަކު ތިބޭނެ. ތިޔަވަރުވަރުގެ ކަންކަން ހިގީމަވެސް އަޅާނުލާތިބެންތަ މި ޖެހެނީ. މީ ކޮންކަހަލަ އިންސާފެއްތޯ. މައުމޫނުވެރިކަމުގަ ހިނގި ކަމެއްނަމަ މިހާރު މާލެ އެފުއް މިފުށަށް ޖެހޭނެ. އަދި އެތަން މިތަނުގަ އަލިފާންވެސް ރޯކުރާން ފަށާނެ. ކޮބައިތަ މަޖިލީހުގެ ރައީސް
ޖުނައިދު
14 March 2022
ދިވެހި ރާއްޖޭގައި ސިރައިންގެ ފޯހެއް އޮތުމުގެ ބޭނުމަކީ ކޮބާ.
ދޮންސޮރުބެ
15 March 2022
ތި ސުވާކު މަގޭވެސް އުފެދޭ. އިންޑިޔާ ސިފައިންނަކީ ދިވެހިންނަށް މަރުދޭ ބައެއް. ދިވެހި ސިފައިންނަށްވުރެ މާހުނަރުވެރި ބައެއް. ހަތިޔާރާ އެއްޗިހި މާގިނަ.
ނަސީބު
14 March 2022
މަރަކީ އެކަހަލަ އެއްޗެއް. ވަގުތު ޖެހުމުން ހަމަ ލަހެއް ނުވާނެ ސިކުންތެއް ވެސް. މަރުހޫމަށް ފާފަ ފުއްސަވާ ސުވަރުގެ މިންވަރު ކުރައްވާށި. އާމީން.
ކިހައްޑިޔަ
14 March 2022
ބައްޕައަށް ބުރަވެވެނީ މާފިލާފުށީގައި އަދި ނައިފަރަށް ގެންދިޔަ ލޯންޗު މަތީގައި ވެސް ދަރިފުޅަށް އެކަށީގެންވާ ފަރުވާދީފައި ނުވާ ކަމަށެވެ. ބަލަންޖެހޭ އެންމެ ސީރިޔަސް އެއް މައްސަލަ. އެހެން ކުދިންގެ ޙައްޤުގައިވެސް މިކަން ކުރަންޖެހޭނެ. ކޮވިޑް ދުވަސްވަރުވެސް ހުންއައިމާދިނީ ޕެނަޑޯލް ގުޅައެއް. ޑޮކްޓަރަކަށް ނުގެންދޭ.
ވިކިލީކުސް
14 March 2022
ސިފައިންގެ ޓްރޭނިންގައި ކުދިން ލަދު ކަނޑުވާލުމަށޭ ކިޔައި އިންސްޓްރަކްޓަރުން އެކުދިންނާ ދިމާލަށް އައުގުރާނަ ގޮވުމާ އަދި ކުދިންގެ ސޫރައަށް ހަޖޫ ޖަހައި ބުލީ ކޮށް ބައެއްކުދިންގެ ޓްރެއިނިންގ އިތުރަށް ހާޑް ކުރާތީ އެކަން ކުށްވެރިކުރަން. ޓުރޭނިންގަ ވެވޭ އިހުމާލަކުން އަހަރެމެންގެ ދަރިންގެ ފުރާނަ ގެއްލިގެން ދިޔާމަ ލަގޮނޑިއަށް ކެތެއް ނުކުރެވޭ.
އަމީން އަލީ
14 March 2022
ކޮންމެމީހަކުވެސް ފަޅޮލޭ ކިޔާނީ. ކަމެއް ދިމާވެއްޖިއްޔާ އިނގިލި ދިއްކުރުން ނޫން ކަމެއް ނުކުރާނެ ދިވެހިންނެއް. ވާނުވާނޭންގި ކޮމެންޓުކުރުމާ ހަމައެކަނި ލިޔރފަ އޮންނަ ހަބަރަށް ހަގީގަތް ނުބަލަ ޔަގީން ކުރުމަކީ ރަނގަޅު ގޮތެއް ނޫން! ޑެސްކު ޖޮބް ތަކަށް ވަލު ދޮރާށިން ދަރިން ވެއްދިއަސް މެންޓަލީ އަދި ފިޒިކަލީ އަންފިޓް ކުދިން މަކަރާ ހީލަތުން ނުވައްދަންވީ! އޮޅުވާ ނުލާންވީ! ކަންކަން ދިމާވީމަ ދެން ކިޔަންވީ ފަޅޮލޭ !