އިނގިރޭސީން ވަގަށް ނެގި އިންޑިއާގެ ސާމާނުތަކެއް އަނބުރާ ދެނީ

ސްކޮޓްލޭންޑްގެ މިއުޒިއަމެއް: އެ ގައުމުގެ މިއުޒިއަމްތަކުގައި ހުރި، އިނގިރޭސީން ވަގަށް ނެގި އިންޑިއާގެ ސާމާނުތަކެއް އަނބުރާ ދޭން ވަނީ ނިންމައިފައި -- ފޮޓޯ: ވިޒިޓް ސްކޮޓްލޭންޑް

11 އެޕްރީލް 2022 - 07:23

އިނގިރޭސީންގެ އަތްދަށުގައި އިންޑިއާ އޮތް ދުވަސްވަރު، އެމީހުން ވަގަށް ނަގާފައިވާ އިންޑިއާގެ ތާރީހާއި ސަގާފަތާއި ގުޅޭ ސާމާނުތަކެއް އަނބުރާ އެ ގައުމަށް ދޭން ނިންމައިފި އެވެ.

އެ ސާމާނުތައް ހުރީ، އިނގިރޭސި ރަސްކަމުގެ ދަށުގައި އޮންނަ ސްކޮޓްލޭންޑްގެ އެކި މިއުޒިއަމްތަކުގަ އެވެ.

އެ ސާމާނުތައް އަނބުރާ އިންޑިއާ އަށް ދިނުމަށް ސްކޮޓްލޭންޑްގެ ގްލަސްގޯވް ސިޓީ ކައުންސިލުން ނިންމީ، އިނގިރޭސިވިލާތުގައި ހުންނަ އިންޑިއާ ހައި ކޮމިޝަންގެ އެދުމަކަށެވެ.

ރިޕޯޓްތައް ބުނާ ގޮތުގައި، ސްކޮޓްލޭންޑްގެ މިއުޒިއަމެއްގައި ހުރި އެހެން ގައުމެއްގެ އެހާ ގިނަ ސާމާނުތަކެއް މީގެ ކުރިން އަނބުރާ ދީފައެއް ނުވެ އެވެ. އަދި އެއީ އިނގިރޭސީން ވެރިކޮށްފައިވާ އިންޑިއާގެ ސާމާނުތަކެއް އެ ގައުމަށް އަނބުރާ ދޭ ފުރަތަމަ ފަހަރު ވެސް މެ އެވެ.

އިންޑިއާ ސަރުކާރާއި އެ ގައުމުގެ އާކިއޮލޮޖިކަލް ސާވިސްގެ އެދުމަށް އިނގިރޭސިވިލާތުގައި ހުންނަ އިންޑިއާ ހައި ކޮމިޝަނުން އެދުނީ ހަ އެއްޗެއް އަނބުރާ ދިނުމަށެވެ.

އެ އެއްޗެއްސަކީ 19 ވަނަ ގަރުނުގެ ތެރޭގައި އިންޑިއާގެ އެކި ސްޓޭޓްތަކުގެ ހިންދޫންގެ ފައްޅިތަކުން ވަގަށް ނަގާފައިވާ އެއްޗެއްސެވެ.

އެ އެއްޗެހި އަނބުރާ ގެންދަނީ އިންޑިއާ ސަރުކާރުގެ ހަރަދުގަ އެވެ.