މާލޭގައި އަމީނީމަގުން ހިނގާފައި ދިޔަ މީހެއްގެ ގައިގައި ބަހަކުން ޖެހި އެކްސިޑެންޓެއް ހިނގައި، އެ މީހާ އަށް ހޮސްޕިޓަލުން ފަރުވާދޭން ފަށައިފި އެވެ.
ފުލުހުން ބުނީ މިރޭ އިރުއޮއްސޭހާކަށްހާ އިރު އެ އެކްސިޑެންޓް ހިނގީ އަމީނީމަގުގައި ހުންނަ ދިވެހިރާއްޖޭގެ އަޑުގެ އިމާރާތާ ކައިރީގައި ކަމަށެވެ. އެއީ ދަރުމަވަންތަ ހޮސްޕިޓަލާއި ކުރީގެ ވެސްޓް ޕާކު ސަރަހައްދުގައި ހުންނަ ބަސް ސްޓޮޕަށް ދިއުމަށް، މާލެ އާއި ހުޅުމާލެ އާއި ދެމެދު ދަތުރުކުރާ އެމްޓީސީސީގެ ބަސްތައް އަމީނީމަގަށް ނުކުންނަ ކަންމައްޗެވެ.
އަނިޔާވި މީހާ އަށް އައިޖީއެމްއެޗުގައި ފަރުވާދެމުން އަންނަ ކަން ފިޔަވައި، އިތުރު މައުލޫމާތެއް ފުލުހުން ނުދެ އެވެ.
ބަހުން ޖެހިގެން މީގެ ކުރިން ބޮޑެތި އެކްސިޑެންޓް ވެސް ހިނގާފައިވެ އެވެ. ހުޅުމާލޭގައި 2019 ވަނަ އަހަރު މަގުމަތިން ހިނގާފައި ދިޔަ ޔުކްރެއިންގެ އަންހެނެއްގެ ގައިގައި ބަހަކުން ޖެހި ހިނގި އެކްސިޑެންޓްގައި އެ މީހާ މަރުވެފައިވެ އެވެ.