ވިޔަފާރި / ޕެންޝަން އެޑްމިނިސްޓްރޭޝަން އޮފީސް

ގެދޮރު ގަންނަން ޑައުން ޕޭމަންޓް ދައްކަން ޕެންޝަން އޮފީހުން އެމްއައިބީއާ އެކު ސޮއިކޮށްފި

ޕެންޝަން ފަންޑާއި އެމްއައިބީން އެއްބަސްވުމުގައި މިއަދު ސޮއިކުރަނީ.---ފޮޓޯ: ނިޝާން އަލީ /މިހާރު

އަބްދުﷲ ޖަމީލު، މިހާރު

26 ޑިސެމްބަރ 2016 - 12:35

މޯލްޑިވްސް ރިޓަޔަމަންޓް ޕެންޝަން ސްކީމްގެ މެމްބަރުންގެ ތެރެއިން ގެދޮރު ގަންނަން ބޭނުންވާ ފަރާތްތަކަށް ޑައުން ޕޭމަންޓް ދެއްކޭނެ މަގު ފަހިކޮށްދިނުމަށް ޕެންޝަން އޮފީހުން މޯލްޑިވްސް އިސްލާމިކް ބޭންކް (އެމްއައިބީ)އާ އެކު މިއަދު ސޮއިކޮށްފި އެވެ.

އުމަރު ޝޮޕިން އާކޭޑްގެ އާ އިމާރާތުގައި ހުންނަ ޕެންޝަން އޮފީހުގައި ބޭއްވި ރަސްމިއްޔާތެއްގައި ޕެންޝަން އޮފީހުގެ ފަރާތުން ސޮއިކުރެއްވީ ޗީފް އެގްޒެކްޓިވް އޮފިސަރު މުހައްމަދު މަނިކެވެ. އެމްއައިބީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ހަރީސް ހާރޫން އެވެ.

ނޫސްވެރިންނާ ވާހަކަދައްކަވަމުން މަނިކު ވިދާޅުވީ މި އެއްބަސްވުމުން ޕެންޝަން ސްކީމްގެ މެމްބަރުންގެ ބޭނުންތައް ފުރިހަމަވެގެން ދިޔަ ކަމަށް ގަބޫލުކުރައްވާ ކަމަށެވެ.

ޕެންޝަން އޮފީހުގެ ސީއީއޯ މުހައްމަދު މަނިކު މިއަދު ނޫސްވެރިންނާ ވާހަކަދައްކަވަނީ.---ފޮޓޯ: ނިޝާން އަލީ /މިހާރު

"ރާއްޖޭގެ މިނޫން ބޭންކުތައް ވެސް އެބަހުރި. ކުރިޔަށް އޮތް ތަނުގައި އެ ބޭންކުތަކާ އެކު ވެސް ކުރިޔަށް ގެންދާނަން،" އޭނާ ވިދާޅުވި އެވެ.

މަނިކު ވިދާޅުވީ ގެދޮރު ގަތުމަށް ބޭނުންވާ ފަރާތްތަކަށް ޕެންޝަން ސްކީމްގައި ހުރި ފައިސާ ބޭނުންކޮށްގެން ގަތުމުގެ ފުރުސަތު ދިނުމަކީ އެންމެ ބޮޑު ބޭނުން ކަމަށެވެ.

"ޕެންޝަން ސްކީމްގައި ބައިވެރިވުމުގެ މުހިންމުކަން ވެސް މިހާރު ބޮޑުވެއްޖެ. މިވަގުތު ޕެންޝަން ފަންޑުގައި އެކަށީގެންވާ މިންވަރަށް ފައިސާ ހުރި ނަމަ އެ ފައިސާ ބޭނުންކުރެވޭނެ ކޮންމެ މެމްބަރަކަށް ވެސް ގެދޮރު ނުވަތަ ފްލެޓްތައް ގަތުމަށް،" އޭނާ ވިދާޅުވި އެވެ.

އެމްއައިބީގެ މެނޭޖިން ޑިރެކްޓަރު ހަރީސް ނޫސްވެރިންނާ މިއަދު ވާހަކަ ދައްކަވަނީ.---ފޮޓޯ: ނިޝާން އަލީ /މިހާރު

ހަރީސް ވިދާޅުވީ ޕެންޝަން ސްކީމް މެދުވެރިކޮށް ގެދޮރު ގަތުމަށް ގިނަ ބައެއްގެ ޝަރުތު ފުރިހަމަވުމަކީ އެންމެ ބޮޑު އުއްމީދު ކަމަށެވެ. އަދި އެމްއައިބީން މަސައްކަތްކުރަނީ ވީހާ ވެސް ލުއި ފަސޭހަކޮށް ގެދޮރު ގަންނަން ފައިނޭންސް ކޮށްދެވޭނެ ގޮތް ހަމަޖައްސައިދިނުން ކަމަށް ވެސް އޭނާ ވިދާޅުވި އެވެ.

"އަޅުގަނޑުމެން ވެސް ބޭނުން ވަނީ އާމްދަނީ މަދުން ލިބޭ ފަރާތްތަކަށް ގެދޮރު ގަނެވޭނެ މަގު ފަހިކޮށްދިނުމަށް. އެހެންވެ އަޅުގަނޑުމެން މިދަނީ ވިހާ ވެސް ފަސޭހަ އަދި އެކަށީގެންވާ ރޭޓެއްގައި ފައިނޭންސްކޮށް ދިނުމަށް މަސައްކަތްކުރަމުން،" ހަރީސް ވިދާޅުވި އެވެ.

ޕެންޝަން ސްކީމްގައި މިހާރު 120،000 މީހުން ބައިވެރިވެފައިވާ ކަމަށް ތަފާސްހިސާބުތަކުން ދައްކަ އެވެ.

ޕެންޝަން ސްކީމްގައި ހުންނަ އެމީހެއްގެ ފައިސާގެ 80 ޕަސެންޓް، ގެދޮރު ގަންނަން ބޭނުންކުރެވެ އެވެ.

މޯލްޑިވްސް އިސްލާމިކް ބޭންކް ބޯހިޔާވަހިކަން ޕެންޝަން އެޑްމިނިސްޓްރޭޝަން އޮފީސް ރިޓަޔަމެންޓަ ޕެންޝަން ޕެންޝަން ފަންޑު

8 ކޮމެންޓް, 17 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

ކުޑަދޫއަހްމަދު

26 December 2016

މަނިކާއެވެ. މިއީ 30 ހާސް އެމެރިކާ ޑޮލަރަށް ރެޔަކާޢި ދުވާލު ކޮޓަރި ވިއްކާ ފެންވަރުގެ ރިސޯޓުތަށް ހުރި އަގުބޮޑު ގައުމެކެވެ. މިއީ މަތީފަންތީގެ ޓުއަރިސްޓުންނަށް ދުނިޔެމަތީގައި ނެތްފަދަ އަރާމު މަންޒިލެކެވެ. ނަމަވެސް މިގައުމުގެ ރައްޔިތުން މިއުޅެނީ ރަނގަޅު ސްކީމް ގަނޑެއްގައި ބައިވެރި ނުކުރެވިގެންނެވެ. ތިޔަ ހައްދަވަނީ ކޯޗެއްތޯއެވެ. ދުވާލަކު ޙަބަރެއް އެބަ ހައްދަވައެވެ. ސްކީމް، އޭ، ޑައުންޕޭމަންޓޭ، ވަލު ދޮރައަށްޓޭ ނުކިޔާ، ނިކަން ރަނގަޅު ސްކީމެއްގައި ވަޒީފާގައި އުޅޭ ފަރާތްތަށް ބައިވެރިކޮށް، ހަބޭހަށް ވިޔަފާރިކޮށްބަލާށެވެ. 21 ވަނަ ގަރުނުގައި ޕެންޝަން ފަންޑު އުތުރުކޮރެއާގެ ޕެންޝަން ފަންޑާއި އެއްގޮތަށް ހިންގައިގެން، ޑައުންޕޭމަންޓެއް ނުދެއްކޭނެ. ދަރަނިވެރިވާނީ ނިކަމެތީން. ފަޅުރަށް ވިއްކައިގެން 2 ބިލިއަން ރުފިޔާ ނެގި މީހުނަކަށް ނުވާނެ ގެއްލުމެއް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ޢަލީ

26 December 2016

ތީ ހަމަ ހުވަފެނެއް. އަޅުގަނޑުގެ ޕެންޝަން ފަންޑުގައި ހަތަރުލައްކައަށްވުރެ ގިނައިން އެބަހުރި، އެކަމަކު އުމުރުން 50 އަހަރު ވުމުން މި ލިބެނީ ދެލައްކަ އެކަމަކު އެ ދެލައްކަ މިލިބެނީ 65 އަހަރު ވުމުގެ ކުރިން ލޯންދައްކަން އެއްބަސްވާނަމަ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

އެމީލާ

26 December 2016

އެޗްޑީސީންވެސް ތިޔަހާ އޮމާންކޮށް ވާހަކަދައްކާފައި ޓާޓާފްލެޓް ލިބޭ މީހުން ބޭންކްތަކަށް ފޮނުވީ..ބޭންކަށް ވަނީމަ އިނގުނީ މީ ކުޅަދާނަކަމެއްނޫން މަދުން ފައިސާލިބޭ މީހުނަށް.. ދެލައްކަ ރުފިޔާގެ ލޯން ނަގާނަމަ ހަތަރުލައްކަ ޑިޕޮސިޓް ދައްކައި ސާޅީސް ފަސްހާސް ރުފިޔާގެ އާމްދަނީ ލިބެންޖެހޭ..ޕެންޝަން ފަންޑް ވެސް އޮތީ މިކަހަލަ ގޮތަކަށް.. ..ވާހަކަ ރީތި ކޮށްލާފަ .

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

އޮޅުވާލި ފްލެޓް

26 December 2016

ޕެންޝަން ފަންޑުގަ ހުންނަ ފައިސާ ބަލައިގަންނަނީ ސިކިއުރިޓީ ޑިޕޮޒިޓެއްގެ ގޮތުގައި. މިސާލަކަށް އެއިން ލޯނުގެ %20 ހަމަނުވިޔަސް ލޯނު ހަމަޖެހިދާނެ. އޭރުން ލޯނު ނަގާ ފަރާތުން %1 ދައްކަންޖެހޭނެ. ބޭންކުން އިންޓްރެސްޓް ނަގާނީ ލޯނުގެ %99 އިން. %20 ހަމަވިޔަސް %1 އަަށްވާ ފައިސާ އަމިއްލަ އަށް ދައްކާފަ ލޯނުގެ %99 އިން އިންޓްރެސްޓް ހަދަނީ. އެކަމަކު އަމިއްލަ ފައިސާ އިން %20 ދައްކައިފިއްޔާ އިންޓްރެސްޓް ހަދާނީ ލޯނުގެ %80 އިން. މިހެންވުމުން ޕެންޝަން ފަންޑުން (ދެއްކުމާ) އަމިއްލައަށް ޑައުންޕޭމަންޓް ދެއްކުމުން މަހަކު ބޭންކަށް ދައްކަންޖެހޭ އަދަދުން 3000ރ އަށްވުރެ ބޮޑު ފަރަގެއް އާދޭ

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކކކ

26 December 2016

ކަލޯ މަޑުކޮށްލާ، އަގު ވެއްޓޭނެ ކަމުގެ ކޮޅުމަތި ފެންނަން ފަށައިފި. ވަރަށް ސަލާމް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ޝިފާގު

26 December 2016

ޕެންޝަން ފަންޑުން 20% ދައްކައެއް ނުދޭ. އެއީ ދޮގު މައުލޫމާތެއް.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ހާރޫނު

26 December 2016

ޕެންޝަން ސްކީމްގައި ހުންނަ އެމީހެއްގެ ފައިސާގެ 80 ޕަސެންޓް، ގެދޮރު ގަންނަން ބޭނުންކުރެވެ އެވެ. މިވާހަކަ ރަނގަޅޭއް ނޫނެވެ. އުމުރުން 15 އަހަރާއި 35 އަހަރާ ދެމެދު ނަމަ އެމީހެއްގެ ޕެންޝަނުން 100 ޕަސެންޓް ދެއެވެ. އުމުރުން 35 އަކާއި 45 އަހަރާ ދެމެދު މީހެއްގެ ޕެންޝަނުން އެމީހަކަށް ދެނީ 80 ޕަސެންޓް އަށްވާ ފައިސާއެވެ. 45 އިން މަތީގެ މީހުންނަށް 60 ޕަސެނެްޓް އަށްވާ ޕެންޝަން ފައިސާ ދެއެވެ. 65 ގެ މީހުންނަކަށް ގެދޮރު ގަންނަން ޕެންޝަން ފައިސާ ނުލިބެއެވެ.