މަތީ ތައުލީމްގެ ލޯނަށް މި ފަހަރު ކަނޑައެޅީ 720 ފުރުސަތު. ޕައިލެޓްކަން ކިޔަވަން އެކަނި ވެސް 250 އަށްވުރެ ގިނަ ދަރިވަރުން ހުށަހެޅި.
މަތީ ތައުލީމްގެ ލޯނުގައި ޕައިލެޓްކަން ކިޔަވަން ސަރުކާރުން ހާއްސަކުރި ޖާގަތަކާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމުގައި ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވާހަކަދައްކަވަނީ -- ފޮޓޯ: ހަޔަ އެޑިއުކޭޝަން މިނިސްޓްރީ
16 މެއި 2022 - 14:34
10 comments
މަތީ ތައުލީމްގެ ލޯނުގައި ޕައިލެޓްކަން ކިޔަވަން ސަރުކާރުން ހާއްސަކުރި 10 ޖާގަ އަށް 250 އަށްވުރެ ގިނަ ދަރިވަރުން ކުރިމަތިލައިފި އެވެ.
ހަޔަ އެޑިއުކޭޝަން މިނިސްޓްރީން މިދިޔަ ފެބްރުއަރީ މަހު ވަނީ އެކި ދާއިރާތަކުން ޑިޕްލޮމާއިން ފެށިގެން ޕީއެޗްޑީއާ ހަމައަށް ކިޔެވުމަށް 720 ފުރުސަތު ހުޅުވާލައިފަ އެވެ. ނަމަވެސް ލޯނު ލިބުނީ 393 ދަރިވަރުންނަށެވެ.
އެ ލޯނު ހޯދަން 1،000 ދަރިވަރުން ކުރިމަތިލިއިރު، ޕައިލެޓް ޓްރެއިނިން ހަދަން އެކަނި ވެސް 252 ދަރިވަރުން ހުށަހެޅި އެވެ.
އެ ލޯނު ލިބޭ ދަރިވަރުންގެ ވަގުތީ ލިސްޓް އާއްމުކުރަން މިއަދު ބޭއްވި ނިއުސް ކޮންފަރެންސްގައި ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ ލޯނު ދެނީ ރާއްޖެ އަށް ބޭނުންވާ ހުރިހާ ދާއިރާއަކުން ކިޔެވުމަށެވެ. އެހެންވެ، އެއް ދާއިރާއަކަށް ގިނަ ޖާގަ ހާއްސަކުރުމަކީ އިންސާފަކަށް ނުވާނެ ކަމަށް އޭނާ ވިދާޅުވި އެވެ.
އާއްމު އުސޫލެއްގެ ގޮތުން ރާއްޖޭގައި ކިޔެވޭ ދާއިރާތަކުން ބޭރުން ކިޔަވަން ސަރުކާރުން ލޯނެއް ނުދެ އެވެ. އެކަމަކު ޕައިލެޓްކަމާއި ޑޮކްޓަރުކަން ކިޔަވަން ޖާގަތަކެއް ކަނޑައެޅި އެވެ.
ރާއްޖެއިން ބޭރުން ޕައިލެޓްކަން ކިޔަވަން ކަނޑައެޅި 10 ޖާގައަށް 252 ދަރިވަރުން އަދި އެމްބީބީއެސް ކިޔަވަން ރިޒާވްކުރި 25 ޖާގައަށް 129 ދަރިވަރުން ކުރިމަތިލި އެވެ.
ޕީއެޗްޑީ ހަދަން ހާއްސަކުރީ ފަސް ފުރުސަތެވެ. އެކަމަކު އެ ޖާގައަށް ވެސް 31 މީހުން ކުރިމަތިލި އެވެ.
މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އިން އަންނަނީ 2018 ވަނަ އަހަރުން ފެށިގެން އެމްބީބީއެސް ކިޔަވައިދެމުންނެވެ. އައިލެންޑް އޭވިއޭޝަން އިސްވެ، އެމްއެންޔޫއާ ގުޅިގެން މިހާރު އަންނަނީ ޕައިލެޓުން ތަމްރީނުކުރާ ފްލައިން ސްކޫލެއް ހިންގަމުންނެވެ. އޭގެ ކުރިން ޕައިލެޓްކަން ކިޔަވައިދިނީ އޭއޭއޭގެ ނަމުގައި ލަންކާގެ ކުންފުންޏަކުން ހިންގި ފްލައިން ސްކޫލުންނެވެ.
މަދު ސްލޮޓްތަކަކަށް ގިނަ ދަރިވަރުން ކުރިމަތިލުމާއި ހުށަހެޅުންތައް ފުރިހަމަނުވާތީ މި ފަހަރު ޑިސްކޮލިފައިވި ދަރިވަރުންގެ އަދަދު، އެހެން އަހަރުތަކަށް ވުރެ ވަނީ އިތުރުވެފަ އެވެ. މިނިސްޓަރު ވިދާޅުވީ މަތީ ތައުލީމްގެ ފުރުސަތު ނުލިބި ގިނަ ދަރިވަރުން ޑިސްކޮލިފައިވުމަކީ ލިބުނު މާޔޫސްކަމެއް ކަމަށެވެ.
"ވަކި ދާއިރާއަކުން އާދަޔާ ހިލާފު ގިނަ ސްލޮޓް ދެވޭކަށް ނޯވޭ. އެއީ ލޯނަށް މި ލިބޭ ފައިސާއިން ރާއްޖޭގެ ހުރިހާ ވުޒާރާއަކަށް މީހުން ބިނާކުރަން ބޭނުންފުޅުވާ އެޖެންޑާ އަށް އެބަ އެޓެންޑުކުރަންޖެހޭ،" އޭނާ ވިދާޅުވި އެވެ.
"ކުރިއަށް ވުރެ އިންފޮމޭޝަން ސެޝަންތައް ބާއްވަން، އެޕްލައިކުރަންވާ ގޮތުގެ ތަފްސީލް ކިޔައިދެން، ދަރިވަރުން އެޕްލައިކުރާއިރު އާއްމުކޮށް ހަދާ މިސްޓޭކް ހިއްސާކުރަން...ވަކި މުއްދަތެެއްގެ ކުރިން ކުރިމަތިލިނަމަ އޭގައި ހުރި މިސްޓޭކްތައް ފާހަގަކޮށް ދަރިވަރުންނާ ހިއްސާވެސް ކުރަން...މި ހުރިހާ ކަމެއް ކުރަމުން ދާއިރު ވެސް ޑިސްކޮލިފައިވާ ކުދިން ހުރީމަ ވަރަށް ބޮޑަށް މާޔޫސްވޭ."
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އެކްސިސް
17 May 2022
މައްސަލައަކީ ސްކޫލު ތަކުން ކެރިއަރ ގައިޑެންސް ނުދެވުން.
ޗަބީ
17 May 2022
ހަޔައެޑިޔުކޭޝަން އަށް މިމުޅިގައުމަށް ހޯދަދެވުނީ އެންމެ 10 ޖާގަ ، ރާއްޖޭގަ ހުސް ރަންވޭ ، މަތިން ބަލާލާއިރުމިހާރުހީވަނޭ ކަޅުޓޭޕު ދަމާފަހުންނަހެން ހުސް އެއާޕޯޓު . ކިޔަވައިގެންނިކުންނަ ކުދިން ގިނަ އަދަދެއްގެކުދިންގެ އުންމީދަކީ ޕައިލެޓަކަށް ވުން މިހާރަކަށް އައިސް. އެކަމަކު މި މިނިސްޓަރަށް އެކުދިންނަށް ކޮށްދެވެނީކޮންކަމެއްބާ؟
އޭރުން
17 May 2022
އެހެން ހަދައިގެންނޫންބާ މިގައުމަށް ހެޔޮއެދިގެން ގައުމަކުން އެ ހަދިޔާ ކުރާ ޑޯނިޔާ ބޯޓުތަކާ ހެލިކޮޕްޓަރުތަކާ ދުއްވާނެ ދިވެހިން ނުލިބޭނީ. ދިވެހިން މާ ގިނައިން އުދުހެން ފަށައިފިނަމަ ވަކި ބަޔަކަށް ކަމަކުނުދާނެ.
މަސްތު
16 May 2022
ޕާޓީ ކުދިންކޮޅައް ދީފަ ނިންމާލީ ދޯ
ނަރުވަ
16 May 2022
1000 ފަގީރުންގެ ދަރިންނައް ދޯކާ
ލަވަ
16 May 2022
10 ބޮޑޮން ގެ ދަރިންނަށް ދީފަ މިފަހަރު ނިންމާލީ ބަޖެޓްގަ ލާރި ނެތީމަ
ބޮޑުން100
16 May 2022
ތިލިބޭނީ ބޮޑުންގެ ދަރިންނާ ގާތް މީހުނަށް.
ހައިޝޫން
16 May 2022
މިނިސްޓްރީގެ މުވައްޒަފުން ގެ ފަރުވާ ކުޑަ ކަމުން ޑިސްކޮށްލިފައި ވެފަ އެބަހުރި އެތަށް ދަރިވަރުންނެއް! ފުރަތަމަ އީމެއިލް ކުރަނީ ކޮމްޕްލީޓް ކަމަށް ހުރިހާ ލިއުމެއް ހަމަ ކަމަށް، އެންމެ ފަހުން ނަތީޖާ އިޢުލާން ކުރިއިރު މި އޮތީ ޑިސްކޮށްލިފައި ކޮށްލާފަ ޑިގްރީ ސެޓްފިކެޓް ނުލައޭ ކިޔާފަ. އެކަމަކު ކުރިން އެމްކިއު އޭ އެސެސްމަންޓް ލީމަ ކޮމްޕްލީޓް ކަމަށް އީމެއިލް ކުރެއްވީ. އެމްބީއޭ އަށް ލީމަ ރައްޓެއްސަކަށް ކޮމްލީޓް ކަމަށް އީމެއިލް ލިބުން، މިހާރު ޑިސްކޮށްލިފައި
ވަހީދު
16 May 2022
ތިކިޔަވައިގެން ތިބި އެތައް ބަޔަކު ވަޒީފާއެއް ނެތި އެބަތިބި.
މޮހިތު
16 May 2022
ރާއްޖޭގަ އެންމެބޮޑު ސީޕްލޭން ފްލީޓް އޮވެފަ، ރާއްޖޭގަ ޓްރޭނިން ފެސިލިޓީ އެއް ނެތުމަކީ ދެރަކަމެއް!