ޕްރައިމަރީ ހެލްތު ކެއާ ވަރުގަދަކުރަން މޯލްޑިވްސް ހެލްތު ސާވިސަސް އުފައްދަން ރައީސް އިބްރާހިމް މުހައްމަދު ސޯލިހު އިއްޔެ ނިންމަވައިފި އެވެ.
ރައީސް އޮފީހުން ބުނީ ހެލްތު މިނިސްޓްރީން ހުށަހެޅި ކަރުދާހަށް މަޝްވަރާކޮށް، ވަޒީރުންގެ މަޖިލީހުގެ ލަފައާ އެކު ހެލްތު ސާވިސަސް އުފައްދަނީ ޕްރައިމަރީ ހެލްތުކެއާ ދިނުމަށާއި ރާއްޖޭގެ ސިއްހީ ނިޒާމު މިހާރަށް ވުރެ ހަރުދަނާކޮށް ލާމަރުކަޒީ އުސޫލުން ހިންގަން ކަމަށެވެ.
ސިއްހީ ދާއިރާއިން ފަންނީ މީހުން ބިނާކޮށް އެ މީހުންގެ ހުނަރު އިތުރުކުރުމަކީ ވެސް އޭގެ ބޭނުމެއް ކަމަށް އެ އޮފީހުން ބުންޏެވެ.
ސިއްހީ ނިޒާމު ހަރުދަނާކުރުމަށް ވަކި އިދާރާއެއް އުފައްދަން ނިންމިއިރު، މި ސަރުކާރުން އަންނަނީ ފަސް ސަރަހައްދަކަށް ބަހާލައި ރާއްޖޭގެ ސިއްހީ ހިދުމަތް ހަރުދަނާކުރަމުންނެވެ.
އެގޮތުން، ހދ. ކުޅުދުއްފުށީ، ރ. އުނގޫފާރު، ގދ، ތިނަދޫ، ލ. ގަން އަދި ސ. ހިތަދޫގައި ހުންނަ އިކުއިޓޯރިއަލް ހޮސްޕިޓަލްގެ ހިދުމަތްތައް ޓާޝަރީ ފެންވަރަށް ބަދަލުކުރުމުގެ މަސައްކަތް އަންނަނީ ކުރަމުންނެވެ.