އޮގަސްޓް 4، 2022: ތައިވާނަށް ހަމަލާއެއް ދޭން ޖެހިއްޖެ ހާލަތެއްގައި އެކަން ކުރާނެ ގޮތުގެ ނަމޫނާއެއްގެ ގޮތުން، މިދިޔަ ބުރާސްފަތި ދުވަހު ޗައިނާ އިން ބޭއްވި އަސްކަރީ ފަރިތަކުރުންތަކުގައި، ޗައިނާ ސިފައިން މިސައިލްތަކެއް ފޮނުވައިލަނީ. --އޭއެފްޕީ
07 އޯގަސްޓް 2022 - 11:21
ބައިނަލްއަގުވާމީ މުހިންމު ދާއިރާތަކުން އެމެރިކާއާއެކު ކުރިން ކުރަމުން އައި މުވާސަލާތުކުރުން ޗައިނާ އިން ހުއްޓައިލުމާ ގުޅިގެން، އެމެރިކާ އިން ރުޅިގަދަވެ ނުރުހުން ފާޅުކޮށްފި އެވެ.
އެމެރިކާގެ ޚާރިޖީ ވަޒީރު އެންޓޮނީ ބްލިންކެން އިއްޔެ ވިދާޅުވީ އެމެރިކާއާ އެކު ކުރިން މުވާސަލާތުކުރަމުން އައި މުހިންމު ދާއިރާތަކާ ގުޅޭ ގޮތުން ޗައިނާއިން މުވާސަލާތުކުރުން ހުއްޓައިލުމަކީ، ވަރަށް ޒިންމާދާރުކަން ކުޑަ އަމަލެއް ކަމަށެވެ. އަދި ތައިވާންގެ މައްސަލައިގައި ޗައިނާ އިން މިހާރު ކަންތައް ކުރަމުންދާ ގޮތުން ދޭހަވަނީ، ސުލްހަވެރި ގޮތުގައި މައްސަލަ ހައްލުކުރުމުގެ ބަދަލުގައި ބާރުގެ ބޭނުންކުރުމަށް ޗައިނާގެ މިސްރާބު ބަދަލުކޮށްފައިވާކަން ކަމަށް ވެސް ބްލިންކެން ވިދާޅުވި އެވެ.
Missile launches by a Chinese ship during exercises near Taiwan this afternoon.#Taiwan #China pic.twitter.com/R32wkDut5q
— 301 Military (@301military) August 4, 2022
އޭނާ މި މޭރުމުން ޗައިނާއަށް ފާޑުވިދާޅުވީ، ތައިވާނަށް ހަމަލާ ދޭން ޖެހިއްޖެ ހާލަތުގައި އެކަން ކުރާނެ ގޮތުގެ ނަމޫނާ ތަމްރީންތަކެއް، ޗައިނާގެ އެއްގަމު ސިފައިންނާއި ކަނޑުގެ ސިފައިން ބައިވެރިވެގެން، މިދިޔަ ހުކުރު ދުވަހު ބާއްވާފައި ވަނިކޮށެވެ. ތައިވާންގެ ވަށައިގެންވާ ކަނޑާއި ވައިގެ ސަރަހައްދުގައި ޗައިނާ އިން އަސްކަރީ ތަމްރީންތަކެއް ފެށީ، މިދިޔަ ބުރާސްފަތި ދުވަހު އެވެ.
ޗައިނާގެ އަސްކަރިއްޔާ އިން މިހާތަނަށް ބާއްވާ އެންމެ ބިޔަ އަސްކަރީ ފަރިތަކުރުންތައް ތައިވާންގެ ވަށައިގެންވާ ސަރަހައްދުގައި މި ފެށީ، އެމެރިކާގެ ގާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްގެ ރައީސް ނެންސީ ޕެލޯސީ، ތައިވާނަށް ޒިޔާރަތް ކުރެއްވުމާ ގުޅިގެން އެކަމަށް ދެކޮޅު ހެދުމުގެ ގޮތުންނެވެ. މިމަހުގެ 2، 3 ގައި ތައިވާންގައި މަޑުކުރައްވައި، ނެންސީ ވަނީ ތައިވާނަކީ ޗައިނާގެ ބިމެއް ކަމަށް ޗައިނާ އިން ބުނާ ބުނުމަށް ގޮންޖައްސަވައިފަ އެވެ.
އެމެރިކާގެ ޚާރިޖީ ވަޒީރު އެންޓޮނީ ބްލިންކެން
ޗައިނާ އިން ދެކޮޅު ހަދަމުން ދަނިކޮށް، ނެންސީ ތައިވާނަށް ވަޑައިގަތުމާ ގުޅިގެން އެކަމާ ދެކޮޅު ހެދުމުގެ ގޮތުން ޗައިނާއިން ވަނީ އެމެރިކާއާ އެކު ކުރަމުން އައި ބައެއް މުއާމަލާތްތައް ހުއްޓާލައިފަ އެވެ. އޭގެ ތެރޭގައި ދިފާއީ ކަންކަމާއި، މަސްތުވާތަކެތި ކޮންޓްރޯލް ކުރުމާއި، ބޯޑަރު ހުރަސްކޮށް ހިންގާ ޖަރީމާތަކާއި، މޫސުމަށް އަންނަ ބަދަލުތަކުގެ ދާއިރާއިން އެމެރިކާއާ އެކުގައި ކުރަމުން އައި މުއާމަލާތްތައް ޗައިނާ އިން ވަނީ ހުއްޓާލައިފަ އެވެ.
އެމެރިކާގެ ޚާރިޖީ ވަޒީރު ބްލިންކެން ވިދާޅުވީ އެ ދާއިރާތަކުން އެމެރިކާއާ މުވާސަލާތު ކުރުން ޗައިނާ އިން ހުއްޓައިލުމުން، އެކަމުގެ ގެއްލުން ލިބެނީ ހަމައެކަނި އެމެރިކާއަށް ނޫން ކަމަށެވެ. އޭގެ ބަދަލުގައި އެއީ ބައިނަލްއަގުވާމީ މުޖްތަމައުގެ މަސްލަހަތާ ގުޅިފައިވާ ދާއިރާތަކަކަށް ވާތީ، އެ ދާއިރާތަކުން އެމެރިކާއާ މުވާސަލާތު ކުރުން ހުއްޓައިލުމުން، މުޅި ދުނިޔެއަށް ވެސް އެކަމުގެ ގެއްލުން ކުރިމަތިވާނެ ކަމަށް ބްލިންކެން ވިދާޅުވި އެވެ.
އޭގެ ތެރެއިން ވެސް އެމެރިކާ އެންމެ ބޮޑަށް ކަންބޮޑުވަނީ އަސްކަރީ ދާއިރާ އިން ޗައިނާ އިން އެމެރިކާއާ އެކުގައި ކުރަމުން އައި މުއާމަލާތުތައް ހުއްޓައިލުމުންނެވެ. ދެ ގައުމުން ހިންގާ އަސްކަރީ ތަފާތު ހަރަކާތްތަކުގެ މައުލޫމާތު ބަދަލުކުރުމަށް، ގާއިމުކޮށްފައިވާ އަސްކަރީ ޗެނަލުން މުވާސަލާތުކުރުން ޗައިނާ އިން ހުއްޓައިލުމަކީ، ހަތިޔާރުގެ ކުރިމަތިލުމަކަށް މަގުފަހިކޮށްފާނެ ކަމެކެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
މެސީ1
08 August 2022
ކިހާރީތި، ހުރިހާކަމެއް ގޯސްކޮށް ކޮއްފަ ދެންމި ގޮވަނީ ސުލްހަވެރިކަމާއެކު މައްސަލަ ހައްލު ކުރަން، ޗައިނާ ހޯހޯ ގޮވަގޮވަ އޮއްވާ ތިކަމެއް ތި ކުރީ
ޗައިނާ ސަފީރު
08 August 2022
އެމެރިކާ ޖެހޭނީ ހަމަ ފިއްތާލައިގެން ތިބެން..
ވޯޓުއޮޅުވާލިޖިންނި
07 August 2022
ޙުރިހާނުބައެއްހަދާ ޗައިނާރުޅިއަރުވާފަ ދެންކޮންވާހަކައެއްމިދައްކަނީ
އަބޫބަކުރުބެ
07 August 2022
ކޮންރުޅިއެއް އަންނާކަށް؟
ބީރުބޮލު ވަޒީރު.
07 August 2022
އެމެރިކާއަކަށް ނޭނގޭ އެމެރިކާ މުސްކުޅިވެ ހަންޓޯޓޯ ވެއްޖެކަމެއް. އަދިވެސް ގަދަ ގޮލާ ހެދިގެން އުޅެނީ. މިހާރު ޗައިނާ ރަސިއާ އީރާން ދުނިޔޭގެ ލީޑުރޯލްކުޅެން ރެޑީވަނީ. އެމެރިކާ ދެންޖެހޭނީ ޖަންގުސަން ހިއްކަން.
ދާމޫ
07 August 2022
އެމެރިކާ އަކީ މުނާފިޤުންގެ ބަފާ
1206
07 August 2022
އެމެރިކާގެ ޒިންމާދާރުކަން ކުޑަކަން އެމެރިކާއަށް ވިސްނައިދޭނެ ބަޔަކު ނެތްތަ؟ ރަނގަޅަށް އެމެރިކާއާ ޖެހިގަނެ އެމެރިކާ ގިތްގަޅުވައި ލެވިގެން ނޫނީ ދުނިޔެއަށް ހަމަޖެހުމެނެތް. ޑިމޮކްރަސީއަކީ އެންމެ ރަނގަޅު ވެރިންކަން ހިންގަން އޮތް ހަމައެކަނި ނިޒާމް ކަން އެއީ ސައިންސީ ދިރާސާޔަކުން ސާބިތު ކުރެވިފައިވާ ކަމެއް ނޫން ކުރެވޭނެ ކަމެއް ވެސް ނޫން. ޑިމޮކްރަޓިކް ނޫނަސް، ރައްޔިތުންނަށް އިންތިހާޔަށް އަދުލުވެރި ކިތަންމެ ރަސްކަމެއް އިސްވެ ގޮސްފައިވެއްްޖެ.