ދޫގަސް ގެސްޓް ހައުސް:އެތަން ވިއްކާލުމުގެ ހުއްދަ ބީއޯސީ އަށް ކޯޓުން ދިންއިރު އެތަން އެމްޕީއެލާ ހަވާލު ކުރަން ސަރުކާރުން އޮތީ ނިންމާފައި
05 ޖެނުއަރީ 2017 - 11:36
9 comments
ނުދައްކާ އޮތް ލޯނެއްގެ މައްސަލާގައި، އައްޑޫގައި ހުންނަ ދޫގަސް ގެސްޓް ހައުސް ވިއްކާލުމުގެ ހުއްދަ ކޯޓުން ބޭންކް އޮފް ސިލޯން (ބީއޯސީ) އަށް ދީފައިވިޔަސް އެ ބޭންކުން ދޫގަސް ވިއްކާ ނުލާނެ ކަމަށާއި އެކަން ހަމަޖެއްސުމަށް ސަރުކާރުން މަސައްކަތް ކުރަމުން އަންނަ ކަމަށް، ދޫގަސް ހިންގުމާ ހަވާލުވާން ތައްޔާރުވަމުންދާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު ބުނެފި އެވެ.
ގަމުގައި ހުންނަ ދޫގަސް ވިއްކާލުމުގެ ހުއްދަ ސިވިލް ކޯޓުން މިދިޔަ މަހު ބީއޯސީ އަށް ދިނީ ދޫގަސް ކުރިން ހިންގި އެމްވީކޭ ކުންފުނިން އެތަން ރަހުނު ކުރުމަށް ފަހު ނެގި 2.7 މިލިއަން ޑޮލަރު (41.6 މިލިއަން ރުފިޔާ) އެމްވީކޭ އިން ނުދެއްކުމުންނެވެ. ހަތް މަސް ތެރޭގައި ފައިސާ ނުދައްކައިފި ނަމަ ދޫގަސް ވިއްކާލުން ނުވަތަ ކުއްޔަށް ދިނުމުގެ ބާރު ބީއޯސީ އަށް ލިބިގެންވާ ކަމަށް ކޯޓުން ހުކުމް ކުރިއިރު ސަރުކާރުން އޮތީ ދޫގަސް ހިންގުން އެމްޕީއެލްއާ ހަވާލުކުރަން ނިންމައިފަ އެވެ.
އެމްޕީއެލްގެ ސީއީއޯ މުހައްމަދު ޖުނައިދު ވިދާޅުވީ ލޯނުގެ އެ މައްސަލައާ ގުޅިގެން ދޫގަސް ވިއްކާ ނުލާނެ ކަމަށާއި ދޫގަސް ވިއްކާ ނުލައި، ފައިސާގެ މައްސަލަ ހައްލު ކުރުމުގެ މަޝްވަރާތައް ސަރުކާރާއި ބީއޯސީއާ ދެމެދު ކުރަމުން އަންނަ ކަމަށެވެ.
"ސަރުކާރުން ދައްކަނީ ކިހާ ފައިސާއެއްތޯ އަދި ކިހިނެއްތޯ އޭގެ ތަފްސީލަކަށް އަޅުގަނޑު ދާކަށް ނެތިން. އެކަމަކު މަޝްވަރާތަކުގައި މިހާރު އޮތީ އެކަން ގާތްގަނޑަކަށް ފައިނަލްވެފައި،" ޖުނައިދު "މިހާރު" އަށް ވިދާޅުވި އެވެ.
ޖުނައިދު ވިދާޅުވި ގޮތުގައި ބީއޯސީ ފަދަ ދުވަސްވީ ބޭންކަކާ ދެމެދު މައްސަލަ ޖެހުމަކީ ސަރުކާރުން ބޭނުންވާ ގޮތެއް ނޫނެވެ.
ދޫގަސް ރަހުނުކޮށް ލޯނު ނެގި އެމްވީކޭ އަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި ދޫގަސް ހިންގުން ސަރުކާރުން ހަވާލުކުރި ކުންފުންޏެވެ. ލޯނު ނެގީ އެ ކުންފުނިން އެތަން ހިންގިއިރު ޑިސެމްބަރު، 2011 އާއި ފެބްރުއަރީ، 2012 ގަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަބްދުއްލާ އަލީ
06 January 2017
މާލޭ ގަ ބަސްދުއްވުން އެމްވީކޭ އަސްދިނީ އަތުގަ ލޯލާރި އެއްވެސް ނެތީސް ދަވްލަތުގެ ބިން މޯގޭޖް ކޮށް ލޯންނަގާ ދަވްލަތަށް ހިލޭ އެހީގަ ލިބިފާހުރި ބަސްތައް ދީގެން .ފުވައްމުލަކާ އައްޑޫ ފެރީވެސް ހެދީ ބަޔަކު ހިނަގަމުންދިޔަ ދޫގަސް އެމީހުންއަތުން ނަގާ އެމްވީކޭ އަށްދީ ގެން ދަވްލަތުން މުދާ މޯގޭޖް ކޮށް 2.7 މިލިއަން ޑޮަލަރުގެ ލޯނެއް. ޖީއެމްއާރަށް އެއާޕޯޓްވެސް ދިނީ ހަމަ މިހެން.ދަވްލަތގެ އެސެެޓް ދަވްލަތުގެ ގެރެންޓީ އަކަށް މޯގޭޖްކޮށް ލޯނު ނެގީ ދަވްލަތަށް ދެއްކި 78 މިލިއަން ޑޮލަރު ދެއްކީ ވެސް ވެނުމަސް ވެނަށް ނާން ދިނީ މިއީ އެމްޑީޕީ ސަރުކާރުން ހާވާފަ ހުރި ހަޑިތައް. މިކަހަލަ ކިތައްމެ ކަމެއް.
ޖަރީމާ
06 January 2017
ކޮބާތަ އެމްޓީޑީސީ. ރިސޯޓެއް ހިންގަން އިސްލާމިކް މިނިސްޓްރީ އަށް ދޭތަން ވެސް ފެންނާނެ. މީވާ ކޮރަޕްޓް ބައެއް. ސަރުކާރުގެ ހުރިހާ ކުންފުނިތަކުގެ ނަމުގަ ހިންގާ ޖަރީމާ ގަޑެއް.
އަބްދުއްލާ އަލީ
05 January 2017
އެމް ޓީސީސީ ން ނުލާހިކު ރަނގަޅަށް އައްޑުއާ ފޯއްމުލަކާ ދެމެދުގެ ފެރީގެ ދަތުރުތައް ކުރަމުން ދަނިކޯދޤ އެމްޑީޕީ ސަރުކާރުން ނަސީދު ހޭވި ހަޑި ނުފެނޭތަ ؟ 2.7 މިލިއަން ޑޮލަރު ނުވަތަ 45 މިލިއަން ރުފިޔާ އަކީ ދަވްލަތުން ބޮލުގަ އަޅާނަމަ ނަސީދުގެ މައްޗަށްދައުވާކުރެވިދާނެ މައްސަލައެއް ؟
ޢަބްދުﷲނާފިޒު
05 January 2017
ޖުނައިދުމެން އެބަޖެހޭ އަދި އެހެން ކަމަކާވެސް އުޅެން، ހަމަ އެކަނި ޓުއަރިޒަމް ދާއިރާއަށް ވަނަސް އަދި ނުވާނެ، ރޯނުވަށާ ކުފުރާ ތައްޔާރުކޮށްގެން ރާއްޖޭން ބޭރަށް އެތަކެތި ބޭރުކުރެވޭނެ މަގެއްވެސް ފަހި ކުރަން އެބަޖެހޭ، ވާނެތޭ.....
އުދުހޭ
05 January 2017
ހުރިހާ ފައިދާއެއް އެމްވީކޭއަށް؟ ކޮރަޕްޝަން؟
އަހުމަދު
05 January 2017
ތި އެމްވީކޭ އަކީ ޖީއެމްއާރު ބޭރުކުރަން އެންމެ ބާރަށް ފައިވިއްދައިގެން އުޅުނު ބައެއް. ތާހިރުވެއްޖެއެއްނު؟
ެެ333
05 January 2017
ޖުނެއިދު މީ ހިންގުންތެރި ހިންގާލަން އިނގޭ މީހެއްކަން އެބަފެނޭ. ސަރުކާރު ކުންފުނިތަކުގެ ވެރިންގެ ތެރެއިން އެންމެ ޕްރޮޑަކްޓިވް އެއް ވެރިޔާކަންނޭގެ. ސީދާ އެމްޕީއެލް ކުރިއަރުވާން ކުރާ މަސައްކަތުގެ އިތުރަށް އެހެން ޕްރޮޖެކްޓުތައްވެސް ވަރަށް ބާރުމިނުގަ ކުރިއަށްދާކަން ފާހަގަކޮށްލެވޭ. މިސާލަކަށް އައްޑޫ ދަތުރުފަތުރު. އެކަމަކު އެކަން ދެމެހެއްޓެނިވި ގޮތަކަށް ކުރިއަށް ގެންދެވޭނެ ވަރުކޮށްފަ ތިތަނުން ވަކިވުން މުހިއްމުު. ނޫނީ އިންތިހާބަށްފަހު އަނެއްކާ އަލުން އާފެށުމަކުން ފަށަން ޖައްސަފާނެ.
އުމަރު
05 January 2017
ކީއްވެގެން ދޫގަސް ވިއްކާނުލަންވީ؟ ފޭދޫ ފިނޮޅުވެސް އެއޮތީ ވިއްކާލާފައި، ދޫގަސް އެމްޕީއެލްއަށް ދިނީމާ އަނެއްކާވެސް ކޮރަޕްޝަނަށް މަގުފަހިވާނީ، އެމްޕީއެލްއަކީ ރިސޯޓް އަދި ހޮޓާހިންގަން ސަރުކާރުން އުފެއްދި ކުންފުންޏެއްނޫން، އެމްޕީއެލްގެ މަގުސަދާ ހިލާފަތް މިހާރު އެމްޕީއެލްވަންނަމުން އެދަނީ އެހެންކަމުން ދެން މައިތިރިކުރަން އޮތް ކުންފުންޏަކީ އެމްޕީއެލް، އެތަނުގެ ސީއޯއަށް ހީވަނީ އެއީ އޭނާގެ ޕްރައިވަޓް ކުންފުންޏެއްހެން، ގްލޯބަލް ލިންކު އުވާލައި މިހާރު އެމްޕީއެލް ހަދައިގެން އުޅެނީ އޭހާގެ އަމިއްލަ ކުންފުންޏަކަށް އެގޮތަށް ކަންތަށްކުރާތަން ރައްޔިތުންނަށް ފެންނަނީ
އުމަރޫ
05 January 2017
ބަޔަކު ވައްކަން ކުރީމަ އެކަން ފޮރުވަން އަނގަ ނުތަޅާ މަޑުން ހުރޭ