ވިލާ އެއާގެ އާ ވެބްސައިޓް ލޯންޗުކޮށްފި

ވިލާ އެއާއިން އެ ކުންފުނީގެ އާ ވެބްސައިޓު ލޯންޗް ކޮށްފި އެވެ.

އެ ވެބްސައިޓް ލޯންޗު ކުރީ އެ ކުންފުންޏަށް 11 އަހަރު ފުރުން ފާހަގަކުރުމަށް ވިލާ ކޮލެޖުގައި ބޭއްވި "ގާލާ ޑިނާ" ގަ އެވެ. ވެބްސައިޓް ލޯންޗު ކޮށްދެއްވީ އެ ކުންފުނީގެ މެނޭޖިން ޑިރެކްޓަރު އަބްދުﷲ ނާޝިދެވެ.

ވިލާ އެއާއިން ލޯންޗުކުރި އެ ވެބްސައިޓްގައި ދަތުރުވެރިންނަށް މުހިންމު ގިނަ މައުލޫމާތުތަކެއް ފަސޭހައިން ބެލޭނެ އިންތިޒާމު ވަނީ ހަމަޖައްސައިފަ އެވެ. އެ ވެބްސައިޓް މެދުވެރިކޮށް ވިލާ އެއާގެ ފްލައިޓާއި ލޯންޗުން ފަސިންޖަރުންނަށް ދަތުރު ބުކް ކުރެވޭނެ އެވެ. އަދި ދަތުރުކުރާއިރު ބޭނުން ވާނެ ޓްރެވަލް ޑޮކިއުމެންޓާ ގުޅޭ މައުލޫމާތާއި ފްލައިޓް ޝެޑިއުލް ވެސް އެ ވެބްސައިޓު މެދުވެރިކޮށް ބެލޭނެ އެވެ. އަދި އެ ވެބްސައިޓުން ޕްރައިވެޓުކޮށް ފްލައިޓު ޗާޓަރު ކުރުމަށް ވެސް ހުށަހެޅޭނެ އެވެ.

ވިލާ އެއާއިން ލޯންޗު ކުރި ވެބްސައިޓްގެ އެޑްރެހަކީ www.villaair.aero އެވެ.

ވިލާ އެއާ އަށް 11 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި އެ ކުންފުނީގެ މުވައްޒަފުންގެ ހިދުމަތްތައް ފާހަގަކޮށް ހަނދާނީ ފިލާ ވަނީ ދީފަ އެވެ. ވިލާ އެއާގައި ފަސް އަހަރަށް ވުރެ ގިނަ ދުވަހު ހިދުމަތް ކޮށްފައިވާ މުވައްޒަފުންނާއި 10 އަހަރަށް ވުރެ ގިނަ ދުވަހު ހިދުމަތް ކޮށްފައިވާ މުވައްޒަފުންނާއި، ކުންފުނި ފެށީއްސުރެ އެ ކުންފުންޏަށް ހިދުމަތް ކޮށްފައިވާ މުވައްޒަފުންނަށެވެ.

އެ ހަފްލާގައި ކުންފުނީގެ މެނޭޖިން ޑިރެކްޓަރު ވަނީ ކުންފުނިން ރާވާފައި ހުރި ބައެއް ޕްލޭންތައް ހިއްސާ ކޮށްފަ އެވެ. އަދި ފާއިތުވެ ދިޔަ ދުވަސްތަކުގައި ކުރިމަތިވި އެކި ދަތިތަކުން އަރައިގަނެ ކުންފުނި ތަރައްގީވެ ކުރިއަރާފައިވާ މިންވަރު ވެސް ވަނީ ފާހަގަކުރައްވާފަ އެވެ.

އެ ރަސްމިއްޔާތުގައި ވިލާ އެއާގެ ސްޓްރެޓީޖިކް ޕްލޭނާ މުހައްމަދު ރިޝާން ވަނީ ވިލާ ގްރޫޕުގެ ޗެއާމަން އިބްރާހިމް ގާސިމާއި ސީއީއޯ އިބްރާހިމް ސިޔާދު ގާސިމާއި އެމްޑީ އަބްދުﷲ ނާޝިދަށް ޝުކުރު އަދާކުރައްވައިފަ އެވެ.

ވިލާ އެއާއިން ބޭއްވި އެ ގާލާ ޑިނާގައި މުވައްޒަފުންގެ މެދުގައި ނެގި ގުރުއަތުން ހޮވުނު ނަސީބުވެރި ދެ ފަރާތަކަށް ވަނީ ރިސޯޓެއްގައި ދެ ރޭ ހޭދަކުރުމުގެ ފުރުސަތު ދީފަ އެވެ. އެ ހަފްލާގައި ވިލާ އެއާގެ މާމިގިލި އަދި ދަރަވަންދޫގައި މަސައްކަތްކުރާ މުވައްޒަފުން ވެސް ވަނީ ބައިވެރިވެފަ އެވެ.

ވިލާ އެއާއިން ވަނީ އަހަރީ ދުވަސް ފާހަގަކުރުމުގެ ގޮތުން، އެ ކުންފުނީގެ އެއާކްރާފްޓުގެ މޮޑެލެއް މުވައްޒަފުންނަށް ހަދިޔާކޮށްފަ އެވެ. އަދި އެއާކްރާފްޓް ޝޭޕަށް ހަދާފައިވާ ކުކީސްތަކެއް ވެސް ބެހި އެވެ.

ވިލާ އެއާގެ މަސައްކަތްތައް ފާހަގަކޮށް މިދިޔަ މަހު ސަރުކާރުން ވަނީ އެވޯޑެއް ދީފަ އެވެ. އެ އެވޯޑަކީ ރާއްޖޭގެ ފަތުރުވެރި ކަމަށް 50 އަހަރު ފުރުން ފާހަގަކުރުމަށް ބޭއްވި ހަފްލާ އެއްގައި ދީފައިވާ އެވޯޑެކެވެ.