ވަގުތީ ސްކޫލުގައި އަރަބިއްޔާގެ ދަރިވަރުން ކިޔަވަނީ ގިނަ ދަތިތަކަކާއެކު، ވަރަށް ހާލުގައި: ބެލެނިވެރިން
އަރަބިއްޔާ ސްކޫލްގެ ބެލެނިވެރިންގެ ހުރި ކަންބޮޑުވުންތައް ހިއްސާކުރުމަށް ޓަކައި މިއަދު ބޭއްވި ނޫސްވެރިންގެ ބައްދަލުވުން -- ފޮޓޯ: ފަޔާޒު މޫސާ | މިހާރު
23 އޮކްޓޯބަރ 2022 - 18:39
150 comments
އަރަބިއްޔާ ސްކޫލްގެ ކުދިން ވަގުތީ އިމާރާތުގައި ކިޔަވަނީ ގިނަ ދަތިތަކަކާއެކު، ވަރަށް ހާލުގައި ކަމަށް އެ ސްކޫލުގެ ބެލެނިވެރިން މިއަދު ބުނެފި އެވެ.
އަރަބިއްޔާގެ ބެލެނިވެރިންގެ ކަންބޮޑުވުންތައް ހާމަކުރުމަށްޓަކައި ބޭއްވި ނޫސްވެރިންގެ ބައްދަލުވުމެއްގައި، އެ ސްކޫލްގެ ޕޭރެންޓް ޓީޗާ އެސޯސިއޭޝަނުގެ ނައިބު ރައީސް އައިޝަތު ޝާދިޔާ ވިދާޅުވީ، އަރަބިއްޔާގެ ކުދިން ކިޔަވަމުން ގެންދިޔަ އިމާރާތުގައި ރެނދުލައި އެ ތަން ވެއްޓޭތީ މިހާރު ކިޔަަވަނީ ވަގުތީ އިމާރާތެއްގައި ކަމަށް ވާއިރު، ސްކޫލުގެ އެކި ފަރާތްތަކުގެ އަޑުތައް ކަމާ ބެހޭ މުއައްސަސާތަކުގެ އިސްވެރިންނަށް އިވިވަޑަޑައިނުގަންނަވާ ކަމަށެވެ.
"އަޅުގަނޑުމެންގެ ކުދިން، އަޅުގަނޑުމެންގެ ޓީޗަރުން، އަޅުގަނޑުމެންގެ މެނޭޖްމަންޓުން އުފުލަމުންދާ ތަކުލީފުތަކުގެ ވާހަކަ އަސްލު އަޑު ނީވޭހެން އަޅުގަނޑަށް ހީވަނީ،" ޝާދިޔާ ވިދާޅުވި އެވެ.
އަރަބިއްޔާގެ ކުދިންގެ ކިޔެވުމަށްޓަަކައި އެމްޓީސީސީ ސޯމިލް ނުވަތަ ދާދި ފަހަކާ ޖެހެންދެން ވަގުތީ ގޮތުން ފޮރިން މިނިސްޓްރީ ހިންގި އިމާރާތް ސަރުކާރުން ހަމަޖައްސައިިދިނީ މިދިޔަ އަހަރުގެ ޑިސެމްބަރު 31 ވަނަ ދުވަހު އެވެ.
ޝާދިޔާ ވިދާޅުވީ، އެ ތަން ހުންނަނީ ފޮށިގަނޑެއް ގޮތަށް ކަމަށާއި އެ ތާނގައި ވަރަށް ގިނަ ކަންތައްތަކެއް ކުދިންނަށް މަހުރޫމް ވެފައިވާ ކަމަށެވެ.
"ކުދިންނަށް ޕީއީ ބާއްވާނެ ޖާގައެއް ނޯވޭ. ޕީއީ ގަޑި ނަގަން ވެއްޖިއްޔާ ކުދިން ޖެހެނީ މެންދުރު ފަހުގެ ދަންފަޅީގެ ކިޔެވުން ކެންސަލް ކޮށްފައި ހެންވޭރު ދަނޑަށް ޕީއީ ގަޑި ނަގަން ދާން. އެ ދުވަހުގެ ކިޔެވުން އެ ހިސާބުން މެދުކަނޑާލަން ޖެހޭ،" އޭނާ ވިދާޅުވި އެވެ.
ޝާދިޔާ ވިދާޅުވީ މި އަހަރުގެ ކިޔެވުން ފަށައިގެން ކުރިއަށް ދަނީ ލެބޯޓަރީއަކާއި ލައިބްރަރީއަކާ ވެސް ނުލައި ކަމަަށާއި ނަމަވެސް އަރަބިއްޔާ ސްކޫލުގެ މެނޭޖްމަންޓުން އިސް ނަގައިގެން ކްލާސްރޫމެއްގައި ލައިބްރަރީއެއް ހަދާފައިވާ ކަމަށެވެ.
"ފުރިހަމަ ލައިބްރަރީއެއް ނޫން. ލައިބްރަރީއެކޭ ޖަހާލާފައި އިނީމާ ލައިބްރަރީއަކަށް ވަނީ،" ޝާދިޔާ ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި އަރަބިއްޔާގެ ޕީޓީއޭގެ ނައިބު ރައީސް އައިޝަތު ޝާދިޔާ ވާހަކަ ދައްކަވަނީ -- ފޮޓޯ: ފަޔާޒު މޫސާ | މިހާރު
ކުދިންގެ ހަށިގަނޑުގެ ތަރުބިއްޔަތަކީ ވަރަށް މުހިންމު މާއްދާއެއް ކަމަށް ވާއިރު، އަރަބިއްޔާގައި ހާއްސަ އެހީ އަށް ބޭނުންވާ ކުދިން އުޅޭ ކަމަށާއި އެ ކުދިންނަށް ޕީއީ ގަޑިއަކީ މުހިންމު ގަޑިއެއް ކަމަށް އޭނާ ވިދާޅުވި އެވެ. ސްކޫލުގައި ބައްދަލުވުމެއް ބާއްވަން ޖެހުނަސް، އަދި ރަސްމިއްޔާތެއް ބާއްވަން ޖެހުނަސް ޝާދިޔާ ވިދާޅުވިގޮތުގައި، ޖާގައިގެ ދަތިކަން ވަރަށް ބޮޑެވެ.
"ދާދި މިދާކަށް ދުވަހު ސްކޫލްގައި މަގާމުތައް ކުދިންނަށް ހަވާލުކުރަން ބޭއްވި ޖަލްސާގައި ބައެއް ކުދިންނަށް ބައިވެރިވާން ޖެހުނީ ގޫގުލް މީޓް މެދުވެރިކޮށް،" އަރަބިއްޔާ ސްކޫލުގެ ވަގުތީ އިމާރާތުގެ ޖާގައިގެ މައްސަލަ އިންތިހާ އަށް ބޮޑުކަން ފާހަގަކުރައްވަމުން ޝާދިޔާ ވިދާޅުވި އެވެ.
އަރަބިއްޔާ ސްކޫލުގެ އާ އިމާރާތް ހަދަން ރައީސް އިބްރާހިމް މުހައްމަދު ސޯލިހު، ބާ ޖަމާލުއްދީންގެ ބިން ދިނުމުން ބެލެނިވެރިން ތިބީ ވަރަށް ފޮނި އުންމީދެއްގައި ކަމަށް ޝާދިޔާ ވިދާޅުވި އެވެ. އެކަމަކު، އެ ތަނުގައި އަރަބިއްޔާގެ އިތުރުން ޖަމާލުއްދީންގެ ބައެއް އިމާރާތް ކުރާ ގޮތަށް ނިންމުމުން ބެލެނިވެރިންގެ ކަންބޮޑުވުންތައް ވަނީ އިތުރުވެފަ އެވެ.
އެ ތަނުގައި އަރަބިއްޔާގެ 40 ކްލާސްރޫމާއި މަލްޓިޕާޕަސް ހޯލެއް ހަދާނެ އެވެ. އޭގެ އިތުރުން ޖަމާލުއްދީންގެ ކިޔެވުން އެއް ދަންފަޅިއަށް ބަދަލުކުރަން ބޭނުންވާ 34 ކްލާސްރޫމް ވެސް، ބާ ޖަމާލުއްދީންގެ ބިމުގެ ބައެއްގައި ހަދާނެ އެވެ.
އެ ކަންބޮޑުވުންތައް ހިއްސާކުރުމަށްޓަކައި ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމް އަދި އެޑިއުކޭޝަން މިނިސްޓަރު ޑރ. އާއިޝަތު އަލީގެ އެޕޮއިންޓްމަންޓަށް އެދުނުތާ ދެ ހަފުތާ އަށް ވުރެ ގިނަ ދުވަސްވީއިރު ސިޓީ އަށް ޖަވާބު ވެސް ނުލިބޭ ކަމަށް އަރަބިއްޔާ ސްކޫލުގެ ބެލެނިވެރިންގެ ޖަމިއްޔާ އިން ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބެލެނިވެރި
24 October 2022
އަރަބިއްޔާގެ ޕްރިންސިޕަލް ކޮބާބާ؟ އޭނަ ބޭރު ކުރަންވީ. ބޭކާރު ބޮލެއް ސަރުކާރުން ލާފަ ހުރި ޕަޕެޓެއް ކަންނޭގެ އެއީ.
ހަދަނު
25 October 2022
މިވާކަ މިކިޔަނީ. މިއަދު މިބައިގަނޑު ބޭނުންގޮތައް އެއްކަންވެސް ދޫކޮށްފިނަމަ މާދަމާ މިނިސްޓްރީއަށް މާތަކުލީފުބޮޑުވާނެ. އަރަބިއްޔާބެލެނިވެރިންނަކީ ރާއްޖޭގެ އެންމެނަށް ހުތުރެއް. ފުރަތަމ ކީ ބިމޭ. ދެން އެފެށީ ޕްރިންސިޕަލޭ ކިޔަން. ދުވަސްކޮޅަކުން ބުނާނެ އަރަބިއްޔާ ދޫކުރާށޭ ސަލަފީންނަށް. ނޫނީ ސުޕަރ ސަލަފީންނަށް ނުވަތަ ޑޮޓުންނަށް.
މއަލީ
25 October 2022
އަސްލު ސިފަ މިފެންނަނީ. ކަންކަން ނުކޮއްދޭން އަރަބިއްޔާއަށް ޖެއްސުން ކުރަނީ ދަރިންތަކެއް ހެޔޮގޮތުގަ ތަރުބިއްޔަތު ވެގެން ނިކުމެ ދާނެތީ. ދެން ކިޔާނެ އެއްޗެއް ނޭގުނީމަ ހައްދުފަހަނައަޅާފައިވާ ބައެކޭ ބުނީމަ އެނިމުނީ. މިކިޔަނީ ދިވެހި ދަރިން ތަކެއްގެ ހައްގުތަކެއް ގެއްލިގެން އުޅޭ ވާހަކަ. ކޮން ހައްދެކޭ ކިޔާކައް
ނުދަނޭ
24 October 2022
ވަގުތީ ތަނެއްގައި ހުރިހާ ކަމެއް ފުރިހަމަނުވާނެކަން ކުރިން ނޭނގުނީބާ. ހެންވޭރު ދަނޑަށް ކުޅެން ގެންދިއުމަކީ އެހާ ބުރަކަމެއްތަ. އެއީ ތިޔަ ސްކޫލާ މާ ދުރުގަ އޮތް ތަނެއް ނޫން. ވަގުތީތަނެއް އެހާ ފުރިހަމަނަމަ ދާއިމީތަނެއްގެ ބޭނުމެއް ނެތެއްނު.
ބެލެނިވެރިއެއް
24 October 2022
ހެންވޭރު ދަނޑަށް ކުޅެން ކުދިން ގެންދާނަމަ ވެސް ރަނގަޅު. ހުއްދަ ލިބިގެން ކުދިން ނަށް ދެވޭ ދުވަހެއް ނާދެ
ސިސީ
24 October 2022
ތިބެލެނެ ވެރިން ބޭނުމެއްނުވޭ އަރަބިއްޔާ އިމާރާތްކުރާކަން. ދަރިންނަށް ކިޔަވައިދޭkަށް. ބޭނުންވަނީ ސިޔާސީ ގޮވެލިގޮވަން. ތީ ސިޔާސީ ބެލެނެވެރިން ތިބޭތަނެއް.
އިނގިރޭސިއްޔާ
24 October 2022
މުޅި ޖުމުލަ ދެހަފުތާ ވީއޭ؟ ހާދަ ދުވަހެކޭދޯ ރައީސާ ބައްދަލު ކުރަން އެޕޮއިންޓްމަންޓެއް ހޯދަން މިއީ! ކަލޭމެން ހީކުރީ އެއީ ސުކޫލު ޕްރިންސިޕަލް ކަމަށްތަ ރިކުއެސްޓް ކޮށްލާއިރަށް އެޕޮއިންޓްމަންޓް ދޭން! އަރަބިއްޔާގަ ނޫނީ ނޫޅޭ ބެލެނިވެރިންނެއް ސަހާދަތް!
މަހީހީ
24 October 2022
ޕަކާސް!
އިބުނާ
24 October 2022
އަަރަބިއްޔާގެ ކަންބޮޑުވުންތައް ގަބޫލުކުރަން. ލައިބްރަރީ ނެތި، ކުދިން ކުޅޭނެ ތަންކޮޅެއް ނެތި ހިންގަންޖެހުމަކީ މިނިސްޓްރީ ފެއިލްވުން އެކަމަކު ޕީޓީއޭއިން އުޅޭގޮތް ވެސް އައިބު، ހީވަނީ އަރަބިއްޔާގެ މެނޭޖްމެންޓްގައި އެވަރުގެ ހިތްވަރު ނެތީމަ ބެލެނިވެރިން ބައިވެރިކޮށްގެން ހައްގުތައް ހޯދަން މަސައްކަތްކުރަނީހެން. ސްކޫލެއްގެ ޕްރިންސިޕަލުންގެ ވިއްޔާ ކޮންމެވެސް އުރައްޕެއް ހުންނަންވާނެ. ދާންޖެހޭ އިދާރާތަކަށް ގޮސް ސްކޫލު ތަމްސީލުކުރާނީ ސްކޫލުގެ ވެރިން!
އަރަބިއްޔާ ބެލެނިވެރިއެއް
24 October 2022
ވަރަށް ރަނގަޅު ވާހަކަ އެއް ކުދިން ކިޔެވުމަށް ބޭނުންވާނެ ވަސީލަތްތައް ހޯދައި ދިނުމަށް ސްކޫލުން މަސައްކަތް ކުރަންވާނެ އެކަމަކު އަރަބިއްޔާގަ ނެތް މެނޭޖްމެންޓް އެެއް އެކަން ކުރަން ކެރޭ ބެލެނިވެރިން ތެޅެން ޖެހެނީ އަބަދުވެސް. ނޫނީ މިނިސްޓްރީ ބުނާ ގޮތަށް ހަދައިގެން ޕްރިންސިޕަލް ހުންނަނީ ތޯއްޗެ މަޤާމު ގެއްލި ދާނެތީ ބިރުން. ވ ކަމުނުދާ މެނޭޖްމެންޓް އެއް.
ވަރުގަދަބެލެނިވެރިން
24 October 2022
ކަލޭމެންނަށް ކަމުދާ އެއްވެސް ކަމެއް މީހެއް އެބަހުރިތަ!
ޖަލީލީ
24 October 2022
ސަރުކާރުން އަރަބިއްޔާ އަށް ކުރާ އަނިޔާ ހުއްޓާލާ
މަހުދީ
24 October 2022
އަޅުގަނޑަށް ނުވިސްނުނު ވަރަށް ހާލުގައޭ ބުނަންޖެހޭވަރުކަމެއް އުޅޭހެން. މިކަމުގައި ދަތިތަކެއް އެބަހުރި. މިސާލަކަށް ބުނަނީނަމަ 1 ކޮޓަރީ އެފާޓްމަންޓުގައި ފެމެލީއެއް އުޅުމާ 2 ކޮޓަރީ އެފާމަންޓްގައި ފެމިލީ އެއް އުޅުން ތަފާތުވާނެ. އަރަބިއްޔާއަށް އާއިމާރާތެއް ހެދި އަވަހައި ދަރިވަރުންނަށް ފަސާހަގޮތްވިމުވަކީ އަޅުގަޑުގެވެސް އެދުމެވެ. އެކަމަކު ބެލެނިވެރިން އެބުނާހާ "ހާލުގައި" ބުނާވަރެއްނޫން.
ނިޔަނެތި
24 October 2022
އެހެން ސްކޫލް ތަކާއި އަޅާ ކިޔާއިރު ބުނެވޭނީ ހަމަ ހާލުގައޭ އުޅެނީ. ހަމަ އެކަނި ހަބަރު ކިޔާ ބޭފުޅުންނަށް ނޭގިދާނެ. އެކަން ތަހައްމަލު ކުރާ ބަޔަކަށް އިގޭނީ ސަރުކާރު ތަކުން އަރަބިއްޔާ ގެ ދަރިވަރުންނަށް އިހުމާލުވާ މިންވަރު
އަރަބިއްޔާ ބެލެނި ވެރިއެއް
24 October 2022
މަހުދީ އަށް ދަންނަވާލަން އޮތީ އަރަބިއްޔާ އަށް ގޮސް ވަދެލަ ބަލާށޭ. މަހުދީ ޝަކުވާ ނުކޮށް ހުންނާނަން ތޯ ލައިބްރަރީ އެއް ލެބޯޓްރީ އެއް ޕީ. އީ ގަޑީގަ ކުޅެލާނެ ތަންކޮޅެއް އަދި ސްކޫލް ނިމޭ ގަޑީގަ ހުރިހާ ކްލާސް ތައް ލައިން ހަދާލާނެ ގޮތެއް ނެތް. ފުރަތަމަ ނުކުންނަ ކްލާސް ކުދިން ބަލައި އައިސްގެން އެކުދިން ދިއައީމަ ދެންތިބޭ ކްލާސް ނެރެވެނީ. ޕީއީ ގައިއެއް ނުބާއްވަ މިހާރު ތަނެއް ނެތީމަ. އަޅުގަނޑު މެންގެ ދަރިންގެ ހައްގުތަކެއް ގެއްލިގެން ދަނީ.
ބެލެނިވެރިއެއް
24 October 2022
ވަދެ ބަލައިލީމާ ހާލު ފެންނާނެ. ބެލެނިވެރިން އެބުނަނީ މިހާލުގައި ވެސް ކެތްކުރީ ރަނގަޅު އިމާރާތެއް ލިބޭނެ ކަމައްށޭ. ކޭކު ބަހާހެން ބަހާފަ ކުޑަ ތަންކޮޅެއް ދޭވާހަކަ ކުރިން ނުބުނޭ
ގޮތްދޫނުކުރާ
24 October 2022
ކަލޯ އެއީ ދާއިމީ ތަނެއް ނޫން. ސުކޫލަކަށް ވައްދަން އުޅުނީމަވެސް ކަލޭމެން ގޮތްދޫނުކޮށްގެން އެތަނަށް ވެއްދީ. އެއީ ސުކޫލެއް ނޫން އޮފީހެއް. އެތަން ސުކޫލަކާއި ތަފާތުވާނެ. މިމީހުންނަށް ހަމަ މަންނަ އާއި ސަލްވާވެސް ކަމަކުނުދާނެ. އެކަމަކު ދީން ކިޔަވައިދޭންށޯ މިއުޅެނީ.
ހަސަންދީ
24 October 2022
އަރަބިއްޔާގެ ބެލެނިވެރިންނަކީ އަބަދުވެސް އަރައިރުންވެ މައްސަލަތައް ބޮޑުކުރަންއުޅޭ ބައެއް. ޖާގަ ތަނަވަސް ރަނގަޅު އިމާރާތެއް ހަމަޖައްސައިދިނީމަ ތިމަންނަމެން ބޭނުމީ މުސްތަގިއްލު އިމާރާތެކޭ ބުނެގެން ދީފަ ހުރިތަނެއް. ކަމެއް ދިމާވާ ކޮންމެ ފަހަރަކު ދާންޖެހޭނީ ގައުމުގެ ރައީސް ނުވަތަ ނައިބު ރައީސުންނާ ބައްދަލުކުރާކަށް ނޫން. ހަވާލުވެގެންތިބި ވަޒީރުންނާ ނައިބު ވަޒީރުންވެސް އެބަތިބި.
ހެޔޮ އެދޭ
24 October 2022
ހަސަންދީ މި މާލޭގަ އޮތޭ އަރަބިއްޔާގެ ބޮޑު ބިމެއް އެއޮތީ އަންނި ސަރުކާރުގަ ފްލެޓް އަޅާފަ. އަރަބިއްޔާ ބެލެނިވެރިން އުޅެނީ އެމީހުންގެ ދަރިންގެ ހައްގުގަ ހަސަންދީގެ ދަރި އަރަބިއްޔާ އަށް ވައްދަން ފެނޭ އޭރުން މި އިހުސާސްތައް އެނގޭނި.
މ
24 October 2022
ޖާގަ ތަނަވަސް ތަނަކީ 200 ކުދިންގެ ސުކޫލަކަށް 800 ކުދިން ލުން ތޯ؟
ފަރުދީބެ
25 October 2022
ކަލޯ އަރަބިއްޔާގެ ބިމެއް މާލެއަކު ނޯންނާނެ. ކޮސް ނުގޮވާ.
ފުންއަސަރު
24 October 2022
ބަޔަކު ހިތްފުރޭވަރު ވާނީ ކޮން ދުވަހަކުން. ކަމެއް ރަނގަޅު ނޫންކަމުގާ ތިމާއަށް ގަބޫލު ކުރެވޭ ހިނދުން، ދެން އެކަމެއް ރަނގަޅުވާނޭ ހަމަ އެއްގޮތެއްވެސް ނޯންނާނެ. ތިތަނުގެ ކުދިންނާ އެހެން ސްކޫލުތަކުގެ ކުދިންނާ އަދަދުގެ ގޮތުން ވަރަށް ތަފާތު. ދެހާސް ތިންހާސް ކުދިން ގޮވައިގެން އެކަން ހަމަޖައްސަމުން އަންނަ ސްކޫލްތައް މަދެއްނޫން. ދެންވީ ހަމަ ކަމެއްވާއިރަށް މަގުމައްޗަށް ނުކުމެ މުޒާހަރާކުރަން. ބޮޑުވަރުހެން އަހަރެންނަށް ހީވަނީ.
ހިތްހަލާކު
24 October 2022
ވ ރަނގަޅު ވާހަކަ އެއް އެހެން ސްކޫލް ތަކާ ވަރަށް ތަފާތު ގްރޭޑް 12 އަށް ކިޔަވާ ސްކޫލް އެއް ލެބޯޓްރީ އެއް ލައިބްރަރީ އެއްވެސް ނުހުރޭ ވަރަށް ރަނގަޅު ވާހަކަ އެއް ފުންއަސަރު ތިބުނީ.
އެމްސް
24 October 2022
ހުރިހާ ފަރާތެއްގެ އަޑުތައްވެސް އަހާ، އަރަބިއްޔާގެ އާ އިމާރާތް ހެދެންދެންވެސް ކުރިން ބޭނުންކުރި، ރެނދުލީ/ވެއްޓޭ ޢިމާރާތަށް ކިޔެވުން ބަދަލު ކުރަންވީބާ؟ އެއްވެސް ވަގުތީ ތަނެއްގަ ހުރިހާ ކަމެއް ފުރިހަމަ ކޮނެއްވެސް ނުހުންނާނެތާ! އަދި ބިމެއް މެނޭޖްކޮށް/އިމާރާތް ކުރަންވާ ގޮތް ކަނޑައެޅުމީވެސް ބެލެނިވެރިންގެ ޒިއްމާއެއްބާ؟
ސުވާލު ފޮށި
24 October 2022
ބައެއް ސްކޫލްތަކަށް އެބަހުރި ސަރުކާރުން ވަގުތީ އިމާރާތް އަޅާދީފަ. އަރަބިއްޔާ އަށް ދެފަހަރު އިމާރާތް ހުސްކުރަން ޖެހުނީމަވެސް އެފަދަ ދީލަތި ކަމެއް ނުފެނޭ. އެހެންވީމަ ބެލެނިވެރިން ޝަކުވާ ކުރަނީ. ކަންތައް ބޮޑު ކިުރަނީއެއް ނޫން. އަދުލުވެރި ހައްލެއް ހުރިހާ ފަރާތަކައްވެސް އޮންނަންވާނެ