ހުޅުމާލޭގެ ދެވަނަ ފިޔަވަހީގެ ފެނާއި ނަރުދަމާ ގާއިމްކުރަން 25 މިލިއަން ޑޮލަރަށް އެމްޑަބްލިއުއެސްސީއާ ހަވާލުކޮށްފި
ހުޅުމާލޭގެ ދެވަނަ ފިޔަވަހީގައި ފެނާއި ނަރުދަމާ ގާއިމުކުރުމުގެ އެއްބަސްވުމުގައި ސައިމަން (ވ) އާއި ފަޒުލް (ކ) މިއަދު ސޮއިކުރެއްވުމަށް ފަހު އެއްބަސްވުން ބަދަލުކުރައްވަނީ.-- ފޮޓޯ: އެޗްޑީސީ
09 ޖެނުއަރީ 2017 - 16:37
9 comments
ހުޅުމާލޭގެ ދެވަނަ ފިޔަވަހީގެ ފެނާއި ނަރުދަމާގެ ނިޒާމު ގާއިމްކުރުމަށް 25 މިލިއަން ޑޮލަރު (385.5 މިލިއަން ރުފިޔާ) އަށް މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އާ މިއަދު ހަވާލުކޮށްފި އެވެ.
އެ އެއްބަސްވުމުގައި އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ފަޒުލް ރަޝީދެވެ. އަދި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ސައިމަން އެވެ.
އެ އެއްބަސްވުމުގައި ސޮއިކުރެއްވުމަށް ފަހު، އެޗްޑީސީގެ މެނޭޖިން ޑިރެކްޓަރު ސައިމަން ވިދާޅުވީ އެމްޑަބްލިއުއެސްސީން ހުޅުމާލޭގެ ދެވަނަ ފިޔަވަހީގެ ފެނާއި ނަރުދަމާގެ ނެޓްވޯކް ގާއިމުކުރުމާއި އެ ތަނުގެ މަގު ހުރަސްކޮށް އަޅަން ޖެހޭ ހޮޅި ލައިންތައް އެޅުމަށް ހަމަޖެހިފައިވާ ކަމަށެވެ.
ހުޅުމާލޭގެ ދެވަނަ ފިޔަވަހީގައި ފެނާއި ނަރުދަމާ ގާއިމުކުރުމުގެ އެއްބަސްވުމުގައި އެމްޑަބްލިއުއެސްސީ އާއި އެޗްޑީސީގެ ވެރިން މިއަދު ސޮއިކުރައްވަނީ.-- ފޮޓޯ: އެޗްޑީސީ
އެޗްޑީސީން ބުނީ އެ މަޝްރޫއުގެ ދަށުން، މަގު ހުރަސްކޮށް ހޮޅިއެޅުމަށް ބޭނުންވާ ތަފްސީލު ޑިޒައިން ތައްޔާރުކުރުމާއި އެ މަޝްރޫއު އަށް ބޭނުންވާ ސާމާނު ފޯރުކޮށްދިނުމުގެ އިތުރުން އެ މަސައްކަތް ސުޕަވައިޒްކުރުން ވެސް ހިމެނޭ ކަމަށެވެ.
އެމްޑަބްލިއުއެސްސީގެ މެނޭޖިން ޑިރެކްޓަރު ފަޒުލް ވިދާޅުވީ ހުޅުމާލޭގެ ދެވަނަ ފިޔަވަހީގެ މަގު ހުރަސްކޮށް އަޅަން ޖެހޭ ހޮޅިތައް އެޅުމުގެ މަސައްކަތް މިހާރު ވެސް ކުރަމުން އަންނަ ކަމަށެވެ. އެ ގޮތުން، އެ މަސައްކަތަށް ބޭނުންވާ ހޮޅިތައް މިދިޔަ އަހަރުގެ ތެރޭގައި ގެނެސްފައިވާ ކަމަށް އޭނާ ވިދާޅުވި އެވެ.
"އެ މަސައްކަތްތައް ޝެޑިއުލްގައިވާ ގޮތަށް ނިންމާލެވޭނެ ކަމަށް މި އުއްމީދު ކުރަނީ. އަދި ސެކަންޑް ފޭސްގެ ޕްރޮޖެކްޓް 2018 އިގެ ސެޕްޓެމްބަރަށް ނިންމަން އަމާޒު ހިފާފައި ވަނީ،" ފަޒުލް ވިދާޅުވި އެވެ.
އޭނާ ވިދާޅުވީ އެ މަޝްރޫއު އަށް ބޭނުންވާ އިތުރު ސާމާނު ގެނައުމުގެ މަސައްކަތް މިހާރު ކުރަމުން އަންނަ ކަމަށެވެ.
މީގެ އިތުރުން، އެޗްޑީސީގެ މެނޭޖިން ޑިރެކްޓަރު ސައިމަން ވިދާޅުވީ ހުޅުމާލޭގެ ދެވަނަ ފިޔަވަހީގެ މަގުތަކުގެ ދެވަނަ ފަށަލަ އެޅުމުގެ މަސައްކަތް ވެސް ކުރަމުން އަންނަ ކަމަށެވެ. އަދި ތާރު ފަށަލަ އެޅުމުގެ މަސައްކަތް ވެސް ވަރަށް އަވަހަށް ފެށޭނެ ކަމަށް އޭނާ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
GAN Island
10 January 2017
އެންމެ 25 މިލިޔަން ޑޮލަރު ؟؟ ތިޔަކުން ހީއެއްނުވޭ މާ ބޮޑު އެއްޗެއް ''ޖީބަށް'' ވަންނާނެހެނެއް.. !! ކީއްވެ 200 ވަރަކަށް މިލިޔަން ޑޮލަރަށް ހަދާ ނުލީ ؟؟؟ ނޫން ބައިބަޔަށް އަގު ކުރާނަމަ ތިގޮތް ވެސް އެންމެ ރަނގަޅު. . . . . ދުވަސްކޮޅެއްފަހުން އަނެއްކާ ''ހޮޅިވަޅުލުމަށް'' 60 މިލިޔަން ޑޮލަރު އޭގެ ފަހުން ހޮޅީގެ ކޮޅު ގޭގެއަށް ވައްދަން 80 މިލިޔަން ޑޮލަރު އެކަހަލަ ގޮތަކަށް ކުރިއަށް ގެންދިޔައިމަ ރަނގަޅު ވާނެ.
ހަމީޒް
09 January 2017
ތިޔަ ޕްރޮޖެކްޓް އެމް.ޑަބްލިޔޫ.އެސް.ސީ އަށް 25 މިލިޔަން ޑޮލަރަށް ދީފިނަމަ އޭގެ މާނަޔަކީ ބިޑްކޮށްގެން އެއަށްވުރެ އަގުހެޔޮކޮށް ތިޔަ މަސައްކަތް ކުރެވޭނެކަން. އެއީ ތިޔަ ކުންފުނީގައި މަސައްކަތް ކުރުމުގެ ޤާބިލް ކަމެއްވެސް އަދި މީހުންނާ މެޝިނެރީވެސް ނެތީމަ. ތިޔަ ކުންފުނިން ސަރުކާރުގެ މަޝްރޫޢުތައް ނަގާފަ މުޅިންވެސް ސަބް ކޮންޓްރެކްޓަށް ދީގެން މަސައްކަތް ކުރުވާތީ.
މޯޑް
10 January 2017
ރަގަޅުވާހަކަ އެއް. ހއ. ދިއްދޫގައި އެމީހުން އެޅި ނަރުދަމާ އަދިވެސް ރަގަޅަށް ބޭނުން ނުކުރެވޭ. މިހާރު ކިތަންމެ އަހަރެއް. ސަރުކާރުންވެސް މިކަން ރަގަޅު ކުރަން އުޅޭހެންނެއް ހިއެއްނުވޭ
ޓިޓިސް
09 January 2017
ހުޅުމާލެއިން އެދޭ ޚިދުމަތް ތައްވެސް ރަގަޅަށް ނުދެވޭ ބައެއް ތިޔައީ.
މެންޓަލިސްޓް
09 January 2017
ނަރުދަމާ އަޅާޢިރު އޯވަރލޯޑްވެގެން ފަހުން ޖަންކްޝަންތަކުގެ މަތިން ނަޖިސް އަރާވަރު ނުކުރާތި ،، ތަނުގެ އުޅެފާނެ މީހުންގެ ކެޕޭސިޓީއަށް ބަލައިގެން ސިސްޓަމް ޑިޒައިންކުރަންވާނީ ،، މިހާރުމާލޭގައިވެސް ޖަންކްޝަންތަކުގެ މަތިންއަރާ އެތަތަނެއް އެބަހުރި ،،، ރާއްޖޭގައި ކަންކަން ޕްލޭންކުރާއިރު މުސްތަގްބަލްއަށް ބެލުމެށްނޯވޭ ވަގުތީ ގޮތުން ކަންކަން ކުރާތީވެ ފަހުން މައްސަލަ ނުކުންނަނީ ،،، ވަރަށްވެދުން
މިތުރު
09 January 2017
ތަރައްގީ މިހިރީ ރޮކެޓް ސްޕީޑްގަ. ރައީސް ގެ ތަސައްވުރާ އެއްގޮތައް އެބާރުމިނުގަ ގެންދެވޭނީ ސަރުކާރު ހިއްސާވާ ކުންފުނި ތައް މެދުވެރިކޮށް. ތަރައްގީ މެކުހަށް. ޔޫތު ސިޓީ ސްމާރޓް ސިޓީ އޯސަމް ސިޓީ ހުޅުމާލެ ސިޓީ. ދެވަނަ ދާއުރެއް ދިވެހި ރައްޔިތުން ހަމަ ހެޔޮ ހިތުން ދެއްވާނެ
ހަމަބުނެލީ
09 January 2017
ކޮންޓްރެކްޓް ހަވާލުކުރީ މިއަދު އެކަމު އެމް.ޑަބްލިއު.އެސް.ސީ. އިން މިކަމަށް މިދިޔަ އަހަރު ހޮޅިތައް ގަނެފަ، މަސައްކަތް ވެސް ފެށިފަ. މީކިހިނެތް ވާ ކަމެއްބާ؟ މީޑިއާ އިވެންޓެއް ބާއްވަން ވީމަ ހިނގަ ހިނގާ ހުންނަ ކަމެއްވެސް ނަގާފަ ސޮއިކޮށްލުމެއް ދެއްތޯ
ބަކުރުބެ
09 January 2017
އޯ ގަދަ. އައްޑޫގެ ނަރުދަމާ އާ ފެންވެސް ތިބައިމީހުނާ ހަވާލުކުރި. ވީކަމެއް ހަރާމުން ހަރާން
ގިވްއިން
09 January 2017
ހުޅުމާލޭގައި ފެނާއި ނަރުދަމާ ގާއިމް ކުރަން އެމްޑަބްލިޔު އެސްސީ އަށް 25 މިލިއަން ޑޮލަރަށް އެޗްޑީސީން އެމަސައްކަތް ހަވާލު ކުރުން އެއީ އުފާވެރި ކަން ހިތަށް ގެނެސްދޭނެ ކަމެކެވެ. ހަމަ އެގޮތަށް އެޗްޑީސީން އެމްޓީސީސީ އަށް ހުޅުމާލޭ 1 އިން ބޮޑު ބިމެއް ދީގެން ބައްލަވަންވީ ބީއެމްއެލް އިން ލޯނެއް ނަގައިގެން ނަމަވެސް އެފަދަ ބިމެއްގައި 25 ބުރިއަށް 10 ހާސް ހައުސިންގް ޔުނިޓްސް ހިމެނޭ ފްލެޓް ޓަވަރު ތައް އިމާރާތް ކުރެވޭތޯއެވެ. އެއިރުން އޭގެ %25 ޝެއާރ އެޗްޑީސީ އަށް ވެސް ކެރީ ކުރެވިދާނެ ނޫންތޯ. އެއިރުން ހުޅުމާލޭގެ އާބާދީ 2 ލައްކަ އަށް ހެދުމުގައި އެޗްޑީސީ އާއި އެމްޓީސީސީ ގުޅިގެން ވަރަށް ބޮޑު މަސައްކަތެއް ކޮށް އެކަން ކާމިޔާބު ވެދާނެ ނޫންތޯ އެވެ. އެހެން އެކަން ވެއްޖެނަމަ މަމެން ޕިންކީންގެ މެނިފެސްޓޯ ގައި ހިމެނޭ ބޯހިޔާ ވަހިކަމުގެ ވައުދު ވެސް ފުއްދުނީ ނޫންތޯއެވެ. މިކަން ކުރަން އެކުވެރި އަތެއް އެޗްޑީސީން ދިއްކޮށްލަންވީ އެމްޓީސީސީ އަށް. ދިއްކޮށްލަންވީ އެވެ. ގިވް އިން، ގިވް އިން..