11 ޑިސެމްބަރ 2022 - 13:30
11 comments
މީގެ ކުރިން ރަޝިޔާ އިން އީރާނަށް އަސްކަރީ ގޮތުން އެހީތެރިކަން ފޯރުކޮށްނުދޭ މިންވަރަށް މިހާރު އެހީތެރިކަން ފޯރުކޮށްދެމުން އަންނަ ކަމަށް، އިނގިރޭސި ވިލާތުން ތުހުމަތުކޮށްފި އެވެ.
މިދިޔަ ހުކުރު ދުވަހު، އދ.ގެ ސަލާމަތީ މަޖިލީހުގައި އޮތް ބައްދަލުވުމުގައި ވާހަކަ ދައްކަވަމުން އިނގިރޭސި ސަފީރު ބާބަރާ ވުޑްވާޑް ވިދާޅުވީ އާދަޔާ ޚިލާފު މިންވަރަށް ރަޝިޔާ އިން އީރާނަށް މިހާރު އަސްކަރީ ގޮތުން މަދަދު ފޯރުވަމުން ގެންދަނީ، އދ.ގެ ގަވާއިދުތަކާ ޚިލާފަށް ކަމަށެވެ. އޭނާ ތުހުމަތު ކުރެއްވި ގޮތުގައި ރަޝިޔާގައި އުފައްދާ އަސްކަރީ ޓެކްނޮލޮޖީ އާއި އަސްކަރީ އުފެއްދުންތަކުގައި ބޭނުންކުރާ އެކިއެކި ބައިތައް އީރާނަށް ފޯރުކޮށްދެނީ، އީރާންގައި އުފައްދާ އަސްކަރީ ހަތިޔާރުތައް ހޯދުމުގެ ބޭނުމުގަ އެވެ.
އިނގިރޭސި ސަފީރު ވިދާޅުވި ގޮތުގައި ރަޝިޔާ އިން އީރާނަށް ފޮނުވާ އަސްކަރީ ސާމާނުގެ ބަދަލުގައި، އީރާނުގައި އުފައްދާފައިވާ ޒަމާނީ ހަތިޔާރުތައް އީރާނުން ރަޝިޔާ އަށް ފޮނުވާނެ އެވެ. އޭގެ ތެރޭގައި އެތައް ސަތޭކަ ބެލިސްޓިކް މިސައިލެއް ހިމެނޭ ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ ރަޝިޔާގެ ޒަމާނީ އަސްކަރީ ޓެކްނޮލޮޖީގެ އެހީގައި އީރާނުން އެ ގައުމުގެ އަސްކަރީ ބާރު އިތުރަށް ވަރުގަދަ ކުރުމަކީ ކަންބޮޑުވާ ކަމެއް ކަމަށެވެ. އަދި އީރާނުގެ އަސްކަރީ ހަތިޔާރުތަކަކީ ހަމައެކަނި މެދުއިރުމަތީ ސަރަހައްދަށް ހުރި ނުރައްކަލެއް ނޫން ކަމަށާއި، މުޅި ދުނިޔޭގެ ސުލްހައަށް ވެސް ހުރި ނުރައްކަލެއް ކަމަށް އޭނާ ތުހުމަތު ކުރެއްވި އެވެ.
އޭނާގެ މި ވާހަކަތަކަށް ރައްދު ދެއްވަމުން، އދ.ގައި ހުންނަވާ ރަޝިޔާގެ ސަފީރު ވެސިލީ ނެބެންޒިއާ ވިދާޅުވީ ޔޫކްރޭން މައްސަލަ ހައްލުނުވެ ދިގުލައިގެން ދަނީ ހުޅަނގުގެ ގައުމުތަކުން އަމަލުކުރާ ގޮތުގެ ސަބަބުން ކަމަށެވެ. އެ ގޮތުން އޭނާ ވިދާޅުވީ ހުޅަނގުގެ ގައުމުތަކުން ހުއްޓުމެއް ނެތި، ޔޫކްރޭނަށް ހަތިޔާރު ފޮނުވުމަކީ އަނދަ އަނދާ ހުރި އަލިފާންގަނޑެއްގެ ތެރެއަށް ދަރު އެޅުން ކަމަށެވެ.
އޭނާ ވިދާޅުވީ މިހާރު ހުޅަނގުގެ ގައުމުތަކުން ޔޫކްރޭނަށް ހަތިޔާރު ފޯރުކޮށްދެމުން އަންނަ މިންވަރަށް، ދުނިޔޭގެ ތާރީޚުގައިވެސް އެއްވެސް ގައުމަކުން އަނެއް ގައުމަކަށް އަސްކަރީ އެހީތެރިކަން ފޯރުކޮށްނުދޭ ކަމަށެވެ. އަދި މިހާރު ކަން ހިނގަމުންދާ ގޮތަށް ބަލާއިރު، ޔޫކްރޭން ހަނގުރާމައިގެ އަނެއް ފަރާތަކީ ހަމައެކަނި ޔޫކްރޭންތޯ ސުވާލު އުފެދޭ ކަމަށް ވެސް އޭނާ ވިދާޅުވި އެވެ.
ދާދި ފަހުން ޔޫކްރޭނަށް ދިން ހަމަލާތަކުގައި ޑްރޯންތަކެއް ބޭނުންކޮށްފައިވާތީ އެކަން ތަހުގީގުކުރަން އދ.ގެ ޓީމެއް ޔޫކްރޭނަށް ފޮނުވަން ގަސްދުކުރާ ކަމަށް އދ. އިން ބުނުމުން އެކަމަށް ވެސް ރަޝިޔާ ސަފީރު ރައްދު ދެއްވި އެވެ. އޭނާ ވިދާޅުވީ ޑްރޯންގެ ހަގީގަތް ހޯދުމަށް ތަޖުރިބާކާރުންގެ ޓީމެއް ޔޫކްރޭނަށް ފޮނުވުމުގެ އެއްވެސް ގާނޫނީ ހައިސިއްޔަތެއް، އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އަށް ނެތް ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހުސައިންބެ
12 December 2022
ކޮން މެދުއިރުމައްޗެކޭ ތިޔަކިޔަނީ... އިޒްރޭލޭ ކިޔާބަލަ. އީރާނުގެ އަސްކަރީ ބާރުއިތުރުވާތީ، މޭކަރާނެކަމެއްނެތެވެ. ކަލޭމެންގެ އިޒްރޭލަކަށް މާގިނަދުވަހަކު ދެން މެދުއިރުމަތީގެ އެންމެބާރުގަދަ ބައެއްގެގޮތުގައި އިރާދަކުރެއްވިއްޔާ ނޯވެވޭނެއެވެ. ކަލޭމެންޖަހާހާ ބެރަކަށް ނަޝަން މިހާރު އީރާނާއި ރަޝިޔާ ބޭނުމެއްނޫނެވެ.
ގޯރބަޗޯފް
12 December 2022
ރަގަޅު! ރަގަޅު! ތިއީ ފައިދާ ބޮޑު ވިޔަފާރިއެއް! ތެލުގެ މުއްސަދިކަންހުރި ހުރިހާ ގައުމުތައް އެއްބަޔަކު އަނެއްބަޔަކާ ހަނގުރާމަ ދައިމީ ކޮއް ކުރުވާފަ، ބޮޑު އަގުގަ، ހަތިޔާރުތައް ވިއްކާ! ގަމާރު ކަންމަތީގަ ބެހެއްޓީމަ، އެވެރިންނަކައް ކަނޑިއެއް ފިޔަވާ އެއްވެސް ހަތިޔާރެއް ނުއުފެއްދޭނެ! ބުނި އަގަކައް ބަރު ހަތިޔާރު ގަންނަން ޖެހޭނީ! މޮޅު! ރަގަޅު! ފެލާލާ! އެހިސާބުގެ ގައުމުތައް ފުނޑާލާ! އެކަކުވެސް ބޯހިއްލާލިޔަވެސް ނުދޭތި. ދީނޭ ބުނީމަ ބޮލުރޮދި ކެނޑޭނެ އެވެރިންގެ!
ގަން
12 December 2022
މެދުއިރުމަތީގަ އިޒްރޭލަށް ބާރުދޭން އެމެރިކާ ބޭނުމީ. އެހެންވީމަ އީރާނަށް ކިހާވަރަކަށް ފިއްތާނެ ދޯ
ވަޅިތޫނުކުރާއާދަނު
11 December 2022
ބާބަރާ ވުޑްވާޑް މެން އެބަޖެހޭ ހަޖަމުކުރަން ދަސްކުރަން. އެއްބަޔަކު އަނެބަޔަކަށް އެހީތެރިވުމަކީ ކެއާކުރުން. އިޒުރޭލަށް އިގިރޭސިން އެހީތެރިވާ ބީދައިން އިރާނަށް ރަސިއާއިން ކަރުދާސްފޮށިގަޑެއް މުޅިއެއް ފުނުވީމަ ކަންބޮޑުވާކަށް ނުޖެހޭ.
ގައުމީ
11 December 2022
ރަޝިއާ އަށް ލާހިކެއްނޫން ސޫރިޔާއިން އައިއެސް ޖަމާޢަތް ނައްތާލާކަށް އީރާން ނެތްނަމަ. ދުނިޔޭގެ މީޑިއާ ޙަބަރުތައް ގޮއްވާލީ ރަޝިއާ ބާރުގަދަކަމުންކަމަށް އައިއެސްނެތުނީ އެކަމަކު މާހިރުންނަށް އިނގޭ ބިމުން ނުކުމެ އެމީހުން ގަބުރުސްތާނަކައް ހެދީ އީރާނުގެ މިލިޓެންޓުންކަން..ރަޝިއާ ތިހަނގުރާމައިން މޮޅުވާންބޭނުންނަމަ އީރާންގެ ބާރުގަދަ ހިޒްބުﷲ މިލިޓިއާއިންގެ ބޭނުން ހިފާ އީރާނައް ވާރޭހެން ލާރިއޮއްސައިގެންވިޔަސް
އަފްރާސިޔާބު
11 December 2022
ކީކޭބާ އެމެރިކާއިން މިކިޔަނީ. ރަޝިޔާގެ އުފައްދާ އަސްކަރީ ޓެކްނޮލޮޖީއާއި ހަތިޔާރުގެ ބައިތައް އީރާނަށް ފޮނުވަނީއޭ! އީރާނުގެ ޒަމާނީ ހަތިޔާރު ރަޝިޔާއަށް ފޮނުވަނީއޭ. އެތައް ސަތޭކަ މިސައިލެއް ފޮނުވަނީއޭ! ބަލަ ދެބައި މީހުންނަކީވެސް ޒަމާނީ އަސްކަރީ ޓެކްނޮލޮޖީ ލިބިފައިވާ ގައުމުތަކެއް. ތަފާތަކީ އީރާނުގެ އުފެއްދުންތައް އަގުހެޔޮވެފައި ރާޑަރުތަކަށް ފިލައިގެން ދުޝްމަނުންގެ މަޢުލޫމާތު ހޯދައި އަމިއްލައަށް އޭގެ ޓާކެޓް ކަނޑައަޅައިގެން ޙަމަލާދޭ ހަތިޔާރަކަށްވުން.
އަހުމަދުވަގާރު
11 December 2022
ހައްހައްހާ ހިޔާލީ ދުނިޔެއަށްގަ ދޯ
ޖުހާ.
11 December 2022
ހިޔާލީ ދުނިޔޭގައި ތިއައުޅެނީ އަހުމަދުވަގާރު. މީ ވަރަށް ވާހަކަ.
ހެހެހެހެހެ
12 December 2022
ރަދީފްއޮފިޝަލް ކިޔައިގެން އުޅުނު ބޭފުޅާ ކުއްލިޔަކަށް ޖުހާ އަށް ވެއްޖެ. މީ ވަރަށް ވާހަކަ.
ޟޫމާ
11 December 2022
މެދުއިރުމަތި ނުރައްކަލޭ، ފަޅޮލޭ، ކާއްޓޭ ކިޔާނެކަމެއްނެތް. ފުރަތަމަ ތިޔޮއް އިޒުރޭލު މައިތިރި ކޮށްބަލަ. ތިހެން އެއްލޮލުން ބަލާފަ އެއްކަންފަތުން އަޑުއަހާތީއޭ މައްސަލަ ހައްލުނުވެގެން ތިއުޅެނީ
ޙިނި
11 December 2022
ޕުޓިން އަދި ރަޝިޔާ މިއޮއްގެން މޮޔަވަނީ