ހދ. ނޮޅިވަރަންގައި އަނބިމީހާ މަރާލި ކަމުގެ ތުހުމަތުގައި ހައްޔަރުކޮށްފައި ހުރި އަބޫބަކުރު ފައިސަލް 32، ދަންޖެހިފައި ހުއްޓާ ފެނިގެން އައިސީޔޫގައި ފަރުވާދެމުން އަންނައިރު އޭނަގެ ހާލު ކްރިޓިކަލް ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފި އެވެ.
ފުލުހުންގެ ބެލުމުގެ ދަށުގައި އޭނާ ބަހައްޓާފައި ހުރި ތަނުގައި ދަންޖެހިގެން މަރުވާން އުޅެނިކޮށް ފެނިފައި ވަނީ ރޭގެ ވަގުތެއްގަ އެވެ.
ކުޅުދުއްފުށީ ހޮސްޕިޓަލުގެ ތަރުޖަމާނު މުހައްމަދު މޫސަ "މިހާރު" އަށް ވިދާޅުވީ ފައިސަލްއަށް ފަރުވާ ދެމުން އަންނަނީ އައިސީޔޫގައި ކަމަށާއި އޭނަގެ ހާލު ކްރިޓިކަލް ކަމަށެވެ. އަދި މިވަގުތު އޮތީ ވެންޓިލޭޓަރުގައި ކަމަށް ވެސް އޭނާ ވިދާޅުވި އެވެ.
ފައިސަލްގެ އަންހެނުން، ނިޝާމާ މުހައްމަދުގެ މަރަށް ފަހު އޭނާ ފުލުހުންގެ ބެލުމުގެ ދަށަށް ދިޔައީ އަމިއްލައަށެވެ.
ނިޝާމާ މަރުވެފައި އޮއްވައި ފެނުނުއިރު ޝައްކުވާ ފަދަ ޒަހަމްތަކެއް އޭނާގެ ކަރުގައި ހުރި ކަމަށް ވެ އެވެ. އެނގިފައިވާ ގޮތުގައި ކުޅުދުއްފުށީ ޕޮލިސް ސްޓޭޝަނަށް ފައިސަލް ދިޔައީ "ވިކްޓިމް"އަކަށް ހެދިގެންނެވެ.
ނިޝާމާއަށް އަނިޔާ ލިބޭ ކަމުގެ އަޑުތައް ވެސް ފެތުރިފައި އޮތް އިރު، މަސްތުވާތަކެތި ބޭނުންކުރުމާއި ވިއްކުމުގެ ގިނަ މައްސަލަތަކެއްގެ ރެކޯޑު ފައިސަލްގެ އޮވެ އެވެ. ކުރީގެ އަންހެނުން އޭނާގެ ގާތުން ވަރިވި ސަބަބަކީ މަސްތުވާތަކެތި ބޭނުންކޮށްގެން އަނިޔާކުރާތީ ކަން ރަސްމީ އިދާރާތަކަށް ހުށަހަޅާފައިވާ މައްސަލަތަކުން އެނގެން އެބައޮތެވެ.
