އޭޑީކޭގައި ދެ ޑީކޯ ޗެމްބަރު ބަހައްޓައި ހިދުމަތް ފަށައިފި

ޑީކޯ ވާ މީހުންނަށް ފަރުވާ ދޭ ޗެމްބަރުގެ ހިދުމަތް، އޭޑީކޭ ހޮސްޕިޓަލުން މިއަދު ދޭން ފަށައިފި އެވެ. މިއީ، ރާއްޖޭގައި ހޮސްޕިޓަލެއްގައި އެ ހިދުމަތް ދޭން ފެށި ފުރަތަމަ ފަހަރެވެ.

އޭޑީކޭ ހޮސްޕިޓަލުގައި ބޭއްވި ރަސްމިއްޔާތެއްގައި، ހައިޕަބެރިކް ޓްރީޓްމަންޓް ޔުނިޓްގެ ހިދުމަތް ފައްޓަވައި ދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ.

އެ ހޮސްޕިޓަލްގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފް ވިދާޅުވީ، އޭޑީކޭގައި ބެހެއްޓި ޑީކޯ ޗެމްބަރާއި ރިސޯޓުތަކުގެ ޗެމްބަރުތައް ތަފާތު ވާނެ ކަމަށެވެ. ރިސޯޓުގައި އާއްމުކޮށް ހުންނަ ޗެމްބަރުތަކުން އެއްފަހަރާ ހަތަރު މީހުންނަށް ފަރުވާ ދިނަސް، އޭޑީކޭގައި މެޝިނަކުން އެއް ފަހަރާ ފަރުވާ ދޭނީ އެންމެ މީހަކަށެވެ.

ޑީކޯ ވާ މީހުންނަށް ފަރުވާ ދޭން ދެ މެޝިނެއް އޭޑީކޭ ހޮަސްޕިޓަލުގައި މިހާރު އެބަހުއްޓެވެ.

ނިޔާފް ވިދާޅުވީ ރިސޯޓުތަކުން އަވަހަށް ފަރުވާ ދިނުމަށް ތަފާތު ދަތިތައް ދިމާވާ ކަމަށެވެ. ނަމަވެސް، އޭޑީކޭ ހޮސްޕިޓަލުގައި ފަރުވާ ދޭން ފެށުމުން ރަނގަޅު އިންތިޒާމެއްގައި އަދި މީހުންގެ އިތުބާރާއެކު ފަރުވާ ދެވޭނެކަން އޭނާ ފާހަގަކުރެއްވި އެވެ.

ޑީކޯ ޗެމްބަރުގައި ގިނައިން ފަރުވާ ދެނީ ފީނަން ގޮސް އުޅޭ ވަގުތު ބައެއް ފަހަރު އަވަހަށް މައްޗަށް އަރަން އުޅޭ ވަގުތު ޑީކޯ ވެގެންނެވެ. ނަމަވެސް އެ ކަންކަމުގެ އިތުރުން ވެސް ޗެމްބަރުގައި ފަރުވާ ދޭނެ އެވެ.

ޑޮކްޓަރު ވިދާޅުވި ގޮތުގައި ފަސޭހަ ނުވެ، ގިނަ ދުވަސްވެފައި ހުންނަ ފާރުތަކާއި ފިހިފައި ހުންނަ ތަންތަން ފަސޭހަކުރުމަށް ވެސް ޑީކޯ ޗެމްބަރުތައް ބޭނުންކުރާނެ ކަމަށެވެ.

ޓޫރިޒަމް މިނިސްޓަރު މައުސޫމް ވިދާޅުވިގޮތުގައި، ރާއްޖެ މަޝްހޫރު ވެފައި ވަނީ ޑައިވް ކުރުމަށް ރައްކާތެރި ތަނެއްގެ ގޮތުގައި ކަމަށް ވާއިރު، ޑީކޯ ޗެމްބަރަކީ ޑައިވް އިންޑަސްޓްރީ އަށް ވަރަށް ބޭނުންތެރި އެއްޗެކެވެ. ހާއްސަކޮށް ޓޫރިޒަމްގެ ޑިމާންޑް ބޮޑުވަމުން އަންނައިރު، ވެރިކަން ކުރާ ސަރަހައްދުގައި ޗެމްބަރެއް ހުރުމަކީ އެންމެންނަށް ވެސް ލިބޭ ހިތްހަމަޖެހުމަކަށް ވާނެ ކަމެއް ކަމަށް އޭނާ ވިދާޅުވި އެވެ.

"ބައެއް ފަހަރު ކަމެއް ވެގެން ޓޫރިސްޓަކު ގެންދަން ބަލާއިރު ޗެމްބަރު މަސައްކަތް ނުކުރާ ހާލަތު އަތުވެދާނެ. އެކަމަކު ހޮސްޕިޓަލަކާ އެޓޭޗު ވެގެން ނުހުންނަ ތަނެއް ވިއްޔާ އެ ތަން މެނޭޖުކުރަން ވަރަށް ބޮޑު ކޮސްޓެއް އެބަދޭ. އެހެންވީމާ، މި ކަހަލަ ހޮސްޕިޓަލަކާއެކު އެޓޭޗު ވެގެން ހުރީމަ ފުރިހަމަ ހިދުމަތެއް ލިބޭނެ،" މައުސޫމް ވިދާޅުވި އެވެ.

އެ ކަހަލަ ހިދުމަތްތަކުގެ ނަތީޖާއަކީ ރައްކާތެރި ޓޫރިޒަމް ޑެސްޓިނޭޝަންގެ ގޮތުގައި ރާއްޖެ އިޝްތިހާރު ކުރުމަށް އެއްބާރުލުން ލިބުން ކަމަށް މިނިސްޓަރު ވިދާޅުވި އެވެ.

ޑީކޯ ޗެމްބަރު ބޭނުންކުރުމަށް އޭޑީކޭ އިން ވަނީ ތިން ޑޮކްޓަރުންނަށް ސިންގަޕޫރުން ތަމްރީނުދީ، އެ ތަނުގައި މަސައްކަތް ކޮށްފަ އެވެ. ނަރުހުންނާއި ފަންނީ މީހުން ވެސް އެ ބޭނުމަށް ތަމްރީނުކޮށްފައިވެ އެވެ.

ހަތަރު ރިސޯޓެއްގައި މި ވަގުތު ޑީކޮމްޕްރެޝަން ޗެމްބަރު އެބަހުއްޓެވެ. ނަމަވެސް ބައެއް ހާލަތުތަކުގައި ޗެމްބަރުތައް ހަލާކުވެ، ބައެއް ފަހަރު ބޮޑު ތަކުލީފެއް އުފުލަން ޖެހެ އެވެ.