އިންޑިއާގައި ހިނގި ރޭލް އެކްސިޑެންޓެއްގައި 26 މަރު

އަންދުރަ ޕްރަދޭޝްގައި ހިނގި ރޭލް އެކްސިޑެންޓުގައި ޒަޚަމްވި މީހަކަށް މިއަދު ފަރުވާ ދެނީ. --ފޮޓޯ:އޭއެފްޕީ

ހަސަން އާމިރު، މިހާރު

22 ޖެނުއަރީ 2017 - 11:13

އަންދުރަ ޕްރަދޭޝް (ޖެނުއަރީ 22) - އިންޑިއާގެ އަންދުރަ ޕްރަދޭޝް ސްޓޭޓުގައި ހިނގި ރޭލް އެކްސިޑެންޓެއްގައި 26 މީހުން މަރުވެ އެތައް ބަޔަކު ޒަޚަމްވެފައިވާ ކަމަށް އޮފިޝަލުން ބުނެފި އެވެ.

ކުނެރޫ ސްޓޭޝަނާ ކައިރީގައި ދަގަނޑުން ރޭލު ނެއްޓުމާ އެކު ހަތް ބައި ވަނީ ވަކިވެފަ އެވެ. ރޭލުން ވަކިވެފައިވާ ބައިތަކުގައި އެތައް ބަޔަކު އަދިވެސް ތާށިވެފައިވާ ކަމަށް އީސްޓް ކޯސްޓް ރޭލްވޭގެ ވެރިޔާ ޖޭޕީ މިޝްރާ ވިދާޅުވި އެވެ. އެހެންވެ މަރުވި މީހުންގެ އަދަދު އިތުރުވާނެ ކަމަށް އޭނާ ވިދާޅުވި އެވެ. ޒަޚަމްވި މީހުން ކައިރީގައިވާ ހޮސްޕިޓަލްތަކަށް ފޮނުވައިގެން ދަނީ ފަރުވާ ދެމުންނެވެ.

އަންދުރަ ޕްރަދޭޝްގައި ހިނގި ރޭލް އެކްސިޑެންޓުގައި ތާށިވެފައިވާ މީހުން ސަލާމަތް ކުރުމަށް މިއަދު މަސައްކަތް ކުރަނީ. --ފޮޓޯ:އޭއެފްޕީ

މި އެކްސިޑެންޓް ހިނގަން މެދުވެރިވި ސަބަބެއް އަދި ނޭނގެ އެވެ. ރޭ 11:30 ގައި ހިނގި މި އެކްސިޑެންޓް ހިނގީ ޖަގްޑަލްޕޫރުން ބުބަނެޝްވަރަށް ދަތުރު ކުރަނިކޮށެވެ.

އިންޑިއާގެ ރޭލްވޭ ނިޒާމުގެ ހާލަތު ގޯސްވެ އެކްސިޑެންޓްތައް ހިނގުމަކީ އާއްމުކޮށް ދިމާވާ ކަންތަކެވެ. މިދިޔަ ނޮވެމްބަރު މަހު އުއްތަރަ ޕްރަދޭޝް ސްޓޭޓުގައި ހިނގި އެކްސިޑެންޓެއްގައި ވެސް ވަނީ 140 މީހުން މަރުވެފަ އެވެ. އަދި މާޗު، 2015 ގައި އުއްތަރަ ޕްރަދޭޝްގައި ހިނގި އެހެން އެކްސިޑެންޓެއްގައި ވަނީ 39 މީހުން މަރުވެ 150 އަށް ވުރެ ގިނަ މީހުން ޒަޚަމްވެފަ އެވެ.

އިންޑިއާގެ ރޭލްވޭ ނިޒާމް ރަނގަޅު ކުރުމަށް ބޮޑު ވަޒީރު ނަރެންދުރަ މޯދީގެ ސަރުކާރުން ވަނީ ކުރިއަށް އޮތް ފަސް އަހަރު 137 ބިލިއަން ޑޮލަރު އިންވެސްޓް ކުރަން ނިންމައިފަ އެވެ.