މިދިޔަ ހޮނިހިރު ދުވަހު ބޭއްވި ގުރައިދޫ ދާއިރާގެ ބައި އިލެކްޝަންގައި ޕީޕީއެމްގެ ކެމްޕެއިނަށް ކުރީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުން މަސައްކަތް ކޮށްދިން ކަމަށް މަޑުއްވަރީ ދާއިރާގެ ޕީއެންސީގެ މެމްބަރު އާދަމް ޝަރީފް ވިދާޅުވުމުން، އެ ކޯލިޝަންގައި ހިމެނޭ އެހެން އިސް މެމްބަރަކު މިއަދު ފާޑުވިދާޅުވެއްޖެ އެވެ.
ޕީޕީއެމްގެ ކޯލިޝަންގައި ހިމެނޭ ޕީއެންސީގެ ނައިބު ރައީސް އާދަމް ޝަރީފް ވަނީ ނަޝީދުގެ ފެކްޝަނުން އެ ކޯލިޝަނަށް މަސައްކަތް ކޮށްދިން ކަމަށް ވިދާޅުވެ ޝުކުރު އަދާކުރައްވައިފަ އެވެ.
"އިންތިހާބުގައި ވަރަށް ވާދަވެރިކޮށް މަސައްކަތް ކުރެއްވި އަދި ޕީޕީއެމަށް ވޯޓު ދެއްވި އެންމެހާ ބޭފުޅުންނަށް ވެސް އަޅުގަނޑުމެން ޝުކުރު ދަންނަވަމުން މި އިންތިހާބު ޕީޕީއެމަށް ކާމިޔާބު ކޮށްދެއްވުމަށްޓަކައި ފިކުރެއްގެ ދިރުމެއްގެ ފަރާތުން ވެސް ވަރަށް ބޮޑު އެހީތެރިކަމެއް ފޯރުކޮށްދެއްވާފައިވާތީވެ އެ ބޭފުޅުންނަށް ވެސް އަޅުގަނޑު ޝުކުރު ދަންނަވަން،" ކުރީގެ ރައީސް އަބްދުﷲ ޔާމީންގެ ވެރިކަމުގައި ޑިފެންސް މިނިސްޓަރުކަން ކުރެއްވި އާދަމް ޝަރީފު ވިދާޅުވި އެވެ.
ނަމަވެސް އޭނާގެ އެ ވާހަކައާ މެދު ހިތްހަމަޖެހިވަޑައިނުގެން ފަރެސްމާތޮޑާ ދާއިރާގެ ޕީޕީއެމްގެ އިސް މެމްބަރު ހުސައިން މުހައްމަދު ލަތީފް ކުރެއްވި ޓުވީޓެއްގައި އާދަމް ޝަރީފަށް ރައްދު ދެއްވި އެވެ.
"މިއީ ބޮޑު އޮޅުމެއް. ޕީޕީއެމުން މިހާތަނަށް އެމްޑީޕީ ފެކްޝަނަކާ އެކީ އިންތިހާބެއް ކާމިޔާބު ކުރަން މަސައްކަތެއް ކޮށްފައެއް ނެތް،" ހުސައިންގެ ޓުވީޓުގައި ވެ އެވެ.
ނަޝީދުގެ ފެކްޝަނުން ޕީޕީއެމަށް ދިން އެހީތެރިކަމެއް އާދަމް ޝަރީފް ވިދާޅެއް ނުވެ އެވެ.
އެމްޑީޕީގެ އެތެރޭގައި އުފެދިފައިވާ ހިޔާލު ތަފާތުވުންތަކާ ގުޅިގެން، ނަޝީދު އުފައްދަވާފައިވާ "ފިކުރެއްގެ ދިރުން" ގެ ދައުރެއް ގުރައިދޫ ދާއިރާގެ ކެމްޕެއިންގައި ފެނިފައެއް ނުވެ އެވެ. ނަމަވެސް ރައްޔިތުންގެ މަޖިލިހުގެ ތަޅުމުގައި އެ ފެކްޝަނާއި ޕީޕީއެމް ބައެއް މައްސަލަތަކުގައި ބައެއް ފަހަރު އެއް މިސްރާބަކަށް މަސައްކަތް ކުރެ އެވެ.
ގުރައިދޫ ދާއިރާގެ ބައި އިލެކްޝަން ކާމިޔާބުކުރީ އެމްޑީޕީގެ ކެންޑިޑޭޓް އިބްރާހިމް ޝާޒެވެ.
