ހުޅުމާލޭގެ ޓްރެފިކް މައްސަލަ ހައްލުކުރުމުގެ ގޮތުން ހިޔާ ފްލެޓް ސަރަހައްދުގައި ޓްރެފިކް ލައިޓް ހަރުކޮށްފައި.-- ފޮޓޯ: ފަޔާޒް މޫސާ | މިހާރު
15 މެއި 2023 - 21:12
11 comments
ހުޅުމާލޭގައި އެކްސިޑެންޓުތައް ހިންގުން އާންމުވަމުން ދާތީ އެ މައްސަލައަށް ހައްލެއް ގެނައުމުގެ ގޮތުން 8 ތަނެއްގައި ޓްރެފިކް ލައިޓް ހަރުކޮށް، މަގުތަކަށް އިތުރު ބަދަލުތައް ގެންނަން އާބަންކޯ އިން ނިންމައިފި އެވެ.
އެ ކުންފުނިން މިއަދު ނެރުނު ނޫސްބަޔާނެއްގައި ބުނީ، ހުޅުމާލޭގެ އާބާދީ އިތުރުވެ، ކާރުބާރު ބޮޑުވުމާ ގުޅިގެން އެކްސިޑެންޓްތައް ހިނގާ އަދަދު އިތުރުވަމުން ދާތީ، މަގުތަކަކީ ރައްކާތެރި ތަނަކަށް ހެދުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެކަމަށް ހައްލެއް ހޯދައިދިނުމަށް ކަމާ ބެހޭ އިދާރާތަކާ ގުޅިގެން މަސައްކަތް ކުރަމުން އަންނަ ކަމަށް ވެސް އާބަންކޯ އިން ބުންޏެވެ.
ހުޅުމާލޭގެ ޓްރެފިކް މައްސަލަ ހައްލުކުރުމުގެ ގޮތުން މަގުގައި ޑިވައިޑަރު ބަހައްޓާފައި.-- ފޮޓޯ: ފަޔާޒް މޫސާ | މިހާރު
"ފުލުހުންނާ ގުޅިގެން މަގުތަކުގެ ރައްކާތެރިކަން އިތުރުކޮށް، ދުއްވާ އުޅަނދުތަކުގާއި އުޅޭ ފަރާތްތަކާއި ހިނގާފައި އުޅޭ ފަރާތްތަކަށް ފަސޭހަ ވާނެ އަދި ރައްކާތެރި ގޮތްތަކެއް ހޯދައިދިނުމަށް ފުރިހަމަ ޕްލޭންއެއް އެކުލަވާލާ މަސައްކަތްތައް މިހާރު ވަނީ ފެށިފަ އެވެ،" އެ ބަޔާނުގައިވެ އެވެ.
އާބަންކޯ އިން ބުނިގޮތުގައި، ވަގުތުން ގެނެވެން ހުރި ބަދަލުތައް ދެނެގަނެ، އެކްސިޑެންޓްތައް މަދުކުރުމަށް ބޮޑެތި މަގުތަކުގެ މެދުގައި ޑިވައިޑަރު ހަރުކުރަން މިހާރު އޮތީ ނިންމައިފަ އެވެ. އެކަން ކުރުމުގެ އެންމެ ބޮޑު އެއް ބޭނުމަކީ ޔޫ ޓާން ނަގައި މީހުން ގަވާއިދާ އެއްގޮތަށް އެކަން ކުރުމަށް ބާރު އެޅުމެވެ. އެކަން އަންގައިދޭ ބޯޑުތައް ވެސް މަގުމަތީގައި ހަރުކުރާނެ އެވެ.
ހުޅުމާލޭގެ މަގެއްގެ ކަފިހުރަސް މަތިން މީހަކު ހިނގާފައި ދަނީ.-- ފޮޓޯ: ފަޔާޒް މޫސާ | މިހާރު
މަގުތަކަށް ގެންނަ އިތުރު ބަދަލުތައް
• ހިނގާފައި އުޅޭ މީހުންނަށް ރައްކާތެރިކަން ކަށަވަރު ކޮށްދިނުމަށް ޓްރެފިކް ލައިޓް ދެ ތަނެއްގައި މިހާރު ހަރުކޮށް އަންނަނީ ޓެސްޓް ކުރަމުން.
• ހުޅުމާލޭގެ ކާރުބާރު ބޮޑު 8 ތަނެއްގައި މި ކަހަލަ ލައިޓް ހަރުކުރާނެ.
• ފުލުހުންނާ ގުޅިގެން ބައެއް މަގުތަކުގެ ވެހިކަލް ފްލޯ އަށް ބަދަލު ގެނައުން.
ހުޅުމާލޭގެ ޓްރެފިކް މައްސަލަ ހައްލުކުރުމުގެ ގޮތުން ފޭސް 2 އަށް ދާ ބްރިޖުން ފައިބާއިރު މަގުގައި ޑިވައިޑަރު ހަރުކޮށްފައި.-- ފޮޓޯ: ފަޔާޒް މޫސާ | މިހާރު
"... ބައެއް މަގުތަކުގެ ޓްރެފިކް ފްލޯ ބަދަލުކޮށް، ވީހާ ވެސް ރައްކާތެރި ގޮތްތަކެއް އަދި އާއްމުންނަށް ފަސޭހަ ވާނެ ގޮތްތަކެއް މި މަސައްކަތްތަކުގެ ތެރެއިން ބަލައި މަގުތަކަށް ބަދަލުތައް ގެނެވޭނެ އެވެ،" އެ ކުންފުނިން ބުންޏެވެ.
އެކްސިޑެންޓުތައް މަދުކުރުމަށް ކުރާ މަސައްކަތުގެ ދަށުން މިހާރު ޓްރެފިކް ލައިޓް ހަރުކޮށް، ޓެސްޓު ކުރަމުން އަންނަނީ ހުޅުމާލެ ހޮސްޕިޓަލްގެ ކުރިމައްޗާއި ހުޅުމާލެ 2 ގެ ހިޔާ ފްލެޓް ސަރަހައްދުގަ އެވެ.
ހުޅުމާލޭގެ ޓްރެފިކް މައްސަލަ ހައްލުކުރުމުގެ ގޮތުން ހުޅުމާލެ ހޮސްޕިޓަލު ކުރިމަތީގައި ޓްރެފިކް ލައިޓް ހަރުކޮށްފައި.-- ފޮޓޯ: ފަޔާޒް މޫސާ | މިހާރު
ހުޅުމާލެ 2 ގައި ނުރައްކާތެރި އެކްސިޑެންޓުތައް ހިނގުން މިހާރު ވަނީ އާންމު ކަމަކަަށް ވެފަ އެވެ. މިދިޔަ މަހާއި މި މަހު އެ ސަރަހައްދުގައި ހިނގި އެކްސިޑެންޓުތަކުގައި ދެ މީހަކު މަރުވެފައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޙުސްނާ
16 May 2023
ހުޅުމާލޭ މަގު ތަކުން ގޯޅި އަޅާއިރު އަޅަން ޖެހޭ ލައިން ވަނީ ކުރަހާފަ. ގިނަ މީހުން ގޯޅި އަޅަނީ ނުބައިކޮށް. މިހެން ވުމުން ހުރަވީ ސްކޫލް ކައި ވަރަށް ބާރު ބޮޑުވޭ. އެމަގުގެ 61 ނަމްބަރު ފުލެޓް މަގު ކަންމަތީ ސައިކަލް ޕާކް ކޮށްފައި ހުރީމާ 4 ފުރޮޅުލީ ވެހިކަލް އަށް ދަތިވޭ
މަގޭ ހިޔާލު
16 May 2023
ތީ އަނެއްކާ ދުވަހަކަށްވުރެށް ދުވަހެއް ކުޑަވާ ވައްތަރުގެ ލައިޓް ބާ. ކަލޯމެން ކުރިމަތީގައި ވެސް މީހުން 80 ގަ ސައިކަލުގަ ދާއިރުވެސް ލޮލޮފިޔަ ޖަހާލަ ޖަހާލަ ތިބެނީ. އެސޮރުމެން ހިފާ އެމީހުންނަށް ރަނގަޅު ބަދަލެއް އަންނާނެ ޕްރޮގްރާމަކަށް ލައިގެންވެސް އަދަބެއް ދީގެންވެސް މި ނުރައްކާތެރި މައްސަލަ ހައްލުކުރަން އެބަ ޖެހޭ
ހުޅުމާލެ މަގު
16 May 2023
ހުޅުމާލެ ނިރޮޅުމަގުގެ 90% ވެހިކަލް ދުއްވާނީ އުތުރުން ދެކުނަށް. އެހެންނަމަވެސް ދުއްވެން އޮންނަނީ މަގުގެ 1/4 ބަޔަށްވުރެ ކުޑަ ޖާގައެއް. ބަސްދުއްވާތީ ދެކުނުން އުތުރަށް ދުއްވާ ބައި އޮންނަނީ ބޮޑުކޮށްފަ. މިހެންވުމުން އުތުރުން ދެކުނަށް ދުއްވާ ގިނަ ވެހިކަލްތައް ދަނީ ލޭން ހުރަސްކޮށް އަނެއްފަޅިން. ހުޅުމާލޭގައި ބަސްދުއްވާ ރޫޓު ތަކާމެދުވެސް ވިސްނާލުން ރަނގަޅު. ބަސްވެސް ނިރޮޅުމަގުން އުތުރުން ދެކުނަށް ދުއްވާގޮތަށް ހެދުން ކިހިނެއްތޯ ވާނީ؟
މައިނޯރިޓީ ހިއްސާދާރު
16 May 2023
ހުޅުމާލޭގެ 1000 ތަނެއްގައި ޓްރެފިކް ލައިޓް ހަރުކުރިޔަސް، ޕޮލިހުންނަކައް ނުކެރޭނެ ލައިޓުތައް ފަޅަމުން. ފެލަމުން ދުއްވާ ގޭންގު ސްޓާރ ގުންޑާ ފޯސްގެ މީހަކު ހުއްޓުވާކައް. އަބަދުވެސް ހުއްޓުވާ ބަލާފާސް ކުރާނީ މައުސޫމު ރައްޔިތުމީހާ އޭނާގެ ގާލްފުރެންޑާއެކީ ބުރެއްޖަހާލަން ނިކުންނަތަނާ..
އަޒީޒާ
16 May 2023
ޕޭމެންޓް މަތިން ލަދުން ހިނގާލެވޭކަންވެސްނެތް..ކޮފީ ބޯން ތިބެނީ އެތާގައި ދެން ތިބެގެން ބެހޭނެ މޭޒުތަކުގެ ހަނިދޭތެރެތަކުން ދާއިރު..ދެން މިޖެހެނީ ދުއްވަން ހާއްސަކޮށްފައި ހުންނަ ބައިން ހިނގަން
މަސޮރު
16 May 2023
ވިސްނޭ ހަރުދަނާ ބަޔަކަށްވުރެ ގަމާރު އަމިއްލަ އެދުން ބޮޑު ކަންދެއްކުމާ މޮޅުކަން ދެއްކެން އުޅޭ ބަޔަކު އުޅޭ މުޖުތަމައުއެއްގަ އެއްވެސް ކުރިމަގެއް ނޯންނާނެ... ތިކަހަލަ ޕްރޮޖެކްޓްތަކުގެ އެންމެ އެދެވޭ ނަތީޖާވެސް ނުފެންނާނެ...
ސަބާހޭ
15 May 2023
ހަރުކުރީމައިވީ. ނުވެސް ބެލެހެއްޓޭ. ދެފަހަރު ދިއްލޭނީ. ދެން ހުންނާނީ މަރުވެފައި.
އަޓްސް މީ
16 May 2023
އާބަންކޯ އިން ކުރާ ކަންކަން އާންމުކޮށް ރަނގަޅު.
ދިލްބަރު ދިލްބަރް
15 May 2023
މަގެމެދުގަ އެމުނޭގޮތަށް ފޭރާ ހަރުކޮށްގެންމެނުވީ މައިތިރިއެއް ނާރާނެ
ދޮހޮއްތު
15 May 2023
މިހާރުވެސް ބުރިޖު ސަރަހައްދުގަ ހުންނަ ލައިޓައް ބަލާމީހަކު ނޫޅޭ
މަޑު
15 May 2023
ލައިޓު ކަޓުވާމީހުންނަށް ފިޔަވަޅެއް ނޭޅެންޔާ ތިޔާއިގެ ބޭނުމެއްނެއް... ޑިވައިޑަރަކީވެސް ރަށްކަލަކަށް ވުރެ ނުރަށްކަލެއް ކަމަށް ހީވާމީހުން ގިނަވުމަކީ ބޮޑު ކަންބޮޑުވުމެއް...