ޖުމްހޫރީ ޕާޓީގެ ކުރީގެ ސެކްރެޓަރީ ޖެނަރަލް އަދި ރައީސް އޮފީހުގެ މިނިސްޓަރު އަހުމަދު ސަމީރު އާއި އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު އެމްޑީޕީއާ މިއަދު ގުޅިވަޑައިގެންފި އެވެ.
ޖޭޕީގެ އިސް ސަފުގައި މަސައްކަތް ކުރެއްވި މި ދެ ބޭފުޅުން އެމްޑީޕީ އަށް މިއަދު ސޮއި ކުރެއްވި އިރު އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވަނީ އެމްޑީޕީން ވަކިވެވަޑައިގެންފަ އެވެ.
އެމްޑީޕީން މިރޭ ކުރެއްވި ޓުވީޓެއްގައި ޖޭޕީގެ ކުރީގެ ގިނަ މެންބަރުންތަކެއް އެ ޕާޓީ އަށް ސޮއި ކުރައްވާފައިވާ ކަމަށެވެ.
އޭގެ ތެރޭގައި ސަމީރު އާއި ޝާހުގެ އިތުރުން އެ ޕާޓީގެ ކައުންސިލްގައި އުޅުއްވި ބައެއް މެންބަރުން ވެސް ވަނީ އެމްޑީޕީ އަށް ސޮއި ކުރައްވައިފަ އެވެ.
އެ ބޭފުޅުންގެ ފޯމާ ހަވާލުވެވަޑައިގެންނެވީ ރައީސް އިބްރާހިމް މުހައްމަދު ސޯލިހެވެ. އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ބައިވެރިވެވަޑައިގަތެވެ.
ޖުމްހޫރީ ޕާޓީން ވަނީ ކުރިޔަށް އޮތް ރިޔާސީ އިންތިހާބުގެ ފުރަތަމަ ބުރުގައި ރައީސް އިބްރާހިމް މުހައްމަދު ސޯލިހާ ކޯލިޝަން ނުހަދައި ވަކިން ވާދަ ކުރަން ނިންމައިފަ އެވެ.
އެ ޕާޓީން ސަމީރު ވަކިވެވަޑައިގަތީ ޖޭޕީ ވަކިން ރިޔާސީ އިންތިހާބުގައި ވާދަ ކުރަން ނިންމި ވަގުތު ކައުންސިލް ބައްދަލުވުމުގައި އިންނަވައިފަ އެވެ. ޖޭޕީގެ އެ ނިންމުމަކީ ގައުމަށް މިވަގުތު އެންމެ ހަމަޖެހުން އޮތް ގޮތް ކަމަށް ގަބޫލުނުކުރައްވާ ކަމަށް ސަމީރު ވަނީ ވިދާޅުވެފަ އެވެ.
