ޖިނާއީ މައްސަލަތަކުގައި ގުޅުވާލެވޭ ހެކިތަކުން ކުށް ސާބިތު ކުރެވޭނެ ކަމަށް ސުޕްރީމް ކޯޓުން ވެސް ކުރިން ނިންމާފައިވާ ކަން ފާހަގަކޮށް، ޔާމީންގެ މައްސަލާގައި ވެސް އެ އުސޫލުން ކުށް ސާބިތު ކުރެވޭނެ ކަމަށް ދައުލަތުން ބުންޏެވެ.
މިއަދުގެ އަޑުއެހުމުގައި ޔާމީން ބައިވެރިވެ ވަޑައިގަންނަވަނީ: އަދީބާއި ޒިޔަތުގެ ހެކިބަސް ނެތަސް، ޔާމީންގެ މައްޗަށް ކުށް ސާބިތުވާނެ ކަމަށް ދައުލަތުން ބުނޭ
05 ޖުލައި 2023 - 18:34
37 comments
ވ. އާރަށް މައްސަލާގައި ކުރީގެ ނައިބު ރައީސް އަހުމަދު އަދީބާއި އަބްދުﷲ ޒިޔަތުގެ ހެކިބަސް ނެތަސް، ކުރީގެ ރައީސް އަބްދުﷲ ޔާމީންގެ މައްޗަށް ކުށް ސާބިތުވާ މިންވަރުގެ ހެކި އެބަހުރި ކަމަށް ދައުލަތުން ހައި ކޯޓުގައި މިއަދު ބުނެފި އެވެ.
ވ. އާރަށް މައްސަލާގައި ރިޝްވަތު ގަބޫލު ކުރައްވައި، އެ ފައިސާ ލޯންޑާ ކުރެއްވިކަން ސާބިތުވެ ޔާމީންގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އޮތީ އިއްވައިފަ އެވެ. އަދި އެ މައްސަލާގައި ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ތިން އަހަރުގެ ޖަލު ހުކުމެއް އިއްވި އެވެ. އެ މައްސަލަ އެ ދެ ބޭފުޅުންގެ ފަރާތްޕުޅުން ހައި ކޯޓުގައި އޮތީ އިސްތިއުނާފަށް ހުށަހަޅުއްވައިފަ އެވެ.
ހައި ކޯޓުގައި މިއަދު ބޭއްވި އަޑުއެހުމުގައި ދައުލަތުން ބުނީ ކުށް ސާބިތުކުރަން އަދީބާއި މޯލްޑިވްސް މާކެޓިން އެންޑް ޕަބްލިކް ކޯޕަރޭޝަންގެ (އެމްއެމްޕީއާރުސީ) ކުރީގެ މެނޭޖިން ޑިރެކްޓަރު އަބްދުالله ޒިޔަތު ހެކިންގެ ގޮތުގައި ހުށަހެޅީ މައްސަލާގެ ބާވަތުންނާއި އަދި އެހެން ގައުމުތަކުން ވެސް ކުރާ ކަމަަށްވާތީ ކަމަށެވެ. އޭގެ ސަބަބަކީ ކޮރަޕްޝަން ފަދަ ކުށްތަކަކީ މަދު ބަޔަކު ބައިވެރިވެގެން ސިއްރުވެރިކަމުގައި ކުރާ ކުށްތަކެއް ކަމަށްވާތީ ކަމަށް ދައުލަތުން ބުންޏެވެ. އޭގެ މިސާލެއްގެ ގޮތުން ދައުލަތުން ފާހަގަކުރީ ބްރެޒިލްގައި ހިންގި ކޮރަޕްޝަންގެ މައްސަލައެއްގައި އަމަލުކުރި ގޮތެވެ.
ދައުލަތުން ބުނިގޮތުގައި އަދީބާއި ޒިޔަތުގެ ހެކިބަސް ނެތަސް، ކުށް ސާބިތު ކުރެވޭނެ އެހެން ހެކިތައް ވެސް އެބަހުއްޓެވެ. އެގޮތުން ޔޫސުފް ނައީމާއި ޔާމީނާ ދެމެދު އޮތް ގުޅުމާއި ޓޫރިޒަމް މިނިސްޓްރީގެ ދަށަށް އާރަށް ބަދަލު ކުރުމާއި އަދި ރަށުގެ އެއްބަސްވުމުގައި ސޮއި ކުރުމާއެކު ޔާމީންގެ އެކައުންޓަށް އެއް މިލިއަން ޑޮލަރު ޖަމާވިކަން ދައުލަތުން ފާހަގަކުރި އެވެ. އަދި އެއީ ޔާމީންގެ އާމްދަނީއާ ނުބައްދަލު އަދަދެއްގެ ފައިސާތަކެއް ކަމަށް ދައުލަތުން ބުންޏެވެ.
މިއަދުގެ އަޑުއެހުމުގައި ދަައުލަތުގެ ވަކީލުން ވާހަކަ ދައްކަނީ
ދައުލަތުން ބުނިގޮތުގައި އަދީބާއި ޒިޔަތު ދިނީ ދޮގު ހެކިބަސް ކަމަށް ބަލަންޖެހޭ އެއްވެސް ސަބަބެއް ނެތެވެ. އަދި ފާސިގުން ބުނާ ހެކިބަސް ވެސް އިތުރަށް ޔަގީން ކުރަން ޖެހޭނެ ކަމަށް އިސްލާމީ ޝަރީއަތުގައި އޮންނަކަން ފާހަގަކޮށް، އަދީބާއި ޒިޔަތުގެ ހެކިބަހަށް ބާރު ދޭ ހެކި އެބަހުރި ކަމަށް ދައުލަތުން ބުންޏެވެ.
ޖިނާއީ މައްސަލަތަކުގައި ގުޅުވާލެވޭ ހެކިތަކުން ކުށް ސާބިތު ކުރެވޭނެ ކަމަށް ސުޕްރީމް ކޯޓުން ވެސް ކުރިން ނިންމާފައިވާ ކަން ފާހަގަކޮށް، ޔާމީންގެ މައްސަލާގައި ވެސް އެ އުސޫލުން ކުށް ސާބިތު ކުރެވޭނެ ކަމަށް ދައުލަތުން ބުންޏެވެ.
ދައުލަތުން ބުނީ ލިބިވަޑައިގަތް ފައިސާއަކީ ޑޮލަރު ގަތުމުގެ މުއާމަލާތެއް ކަމަށް ޔާމީންގެ ފަރާތުން ބުނެފައި ވިޔަސް، އެކަން ސާބިތުކޮށް ދެވިފައެއް ނުވެ އެވެ. އަދި މިއީ ކުށްކޮށްގެން ހޯދި ފައިސާއެއް ކަން ދައުލަތުން ހުށަހެޅި ހެކިތަކުން ސާބިތުވާ ކަމަށް ދައުލަތުން ބުންޏެވެ.
އެއީ ޑޮލަރު ގަތުމުގެ މުއާމަލާތެއް ކަމަށް ބުނެ ޔާމީންގެ ފަރާތުން ހުށަހެޅުއްވި ދިފާއީ ހެކިންގެ ހެކިބަހަށް ބުރަދަން ނުދޭން ކްރިމިނަލް ކޯޓުން ނިންމާފައިވަނީ ރަނގަޅަށް ކަމަށް ވެސް ދައުލަތުން ބުންޏެވެ. ސަބަބެއްގެ ގޮތުގައި ދައުލަތުން ބުނީ ދިފާއީ ހެކިވެރިންނަށް މުހިންމު އެތައް ކަމެއް ބުނެދޭން ނޭނގުމާއި އެއީ ހެކިބަހުގެ ސައްހަކަމާ މެދު ސުވާލު އުފެދި، ބުއްދި ގަބޫލު ނުކުރެވޭނެ ކަންތައްތަކެއް ހުރުމުން ކަމަށް ދައުލަތުން ބުންޏެވެ.
ދައުލަތުން ބުނިގޮތުގައި އެއީ ޑޮލަރު ގަތުމުގެ މުއާމަލާތެއް ކަމަށް ޔާމީންގެ ފަރާތުން ވިދާޅުވިޔަސް، ތަހުގީގު މަރުހަލާގައި އެމަނިކުފާނު އެކަން ފާހަގަ ކުރައްވާފައެއް ނުވެ އެވެ. އަދި އެ މީހަކާ އެއްކޮޅަށް ހުރި ހެކިތައް ތަހުގީގުގައި ފާހަގަކުރަން ޖެހޭނެ ކަމަށް ޖިނާއީ އިޖްރައާތުގެ ގާނޫނުގައި ބުނާކަން ދައުލަތުން ފާހަގަކުރި އެވެ.
ޓޫރިޒަމްގެ ބޭނުމަށް ރަށްތައް ކަނޑައެޅުމުގެ ބާރު ކެބިނެޓާ ހަވާލު ކޮށްފައިވާ ކަމަށް ޔާމީންގެ ފަރާތުން ބުނެފައި ވިޔަސް، ދައުލަތުން ބުނިގޮތުގައި އެ ނިންމުންތައް ތަންފީޒު ކުރެވެނީ ރައީސްގެ ހުއްދަ ލިބިގެން ކަން ހެކިތަކުން އެނގޭ ކަމަށެވެ. އަދި ފިޝަރީޒް މިނިސްޓްރީގެ ދަށުގައި އާރަށް އޮއްވައި ޓޫރިޒަމް މިނިސްޓްރީގެ ދަށަށް ބަދަލުކުރީ ޔާމީން ހުއްދަ ދެއްވައިގެން ކަން ލިޔުންތަކުން އެނގެން އެބައޮތް ކަމަށް ވެސް ދައުލަތުން ބުންޏެވެ.
ދައުލަތުން ބުނިގޮތުގައި ޔޫސުފް ނައީމްގެ ފަރާތުން ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ސިޔާސީ ކަންކަމަށް ލިބުނު ފައިސާ ކަމަށް ބޭންކަށް އެމަނިކުފާނު އެންގެވި ނަމަވެސް، މާލީ ބަޔާންތަކުގައި ޔޫސުފް ނައީމްގެ ފަރާތުން އެފަދަ ފައިސާއެއް ލިބިވަޑައިގަތް ކަމަށް ބުނެފައި ނެތް ކަމަށެވެ.
އެކަންކަން ފާހަގަކޮށް، ދައުލަތުން އެދުނީ ޔާމީންގެ ޖަލު ހުކުމް ދަމަހައްޓައި ދިނުމަށެވެ.
ދައުލަތުގެ އެ ވާހަކަތަކަށް ޔާމީންގެ ފަރާތުން ރައްދު ދިނުމުގެ މަރުހަލާ މިއަދު ކުރިއަށް ދާނެ އެވެ.
އެ މައްސަލަ ހައި ކޯޓުން ބައްލަވަނީ ފަނޑިޔާރު ހުޒައިފާ މުހައްމަދާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރު މުހައްމަދު ސަލީމެވެ. ބެންޗުގެ ރިޔާސަތަކީ ފަނޑިޔާރު ހުޒައިފާ އެވެ.
ޔާމީންގެ މައްޗަށް އިއްވާފައިވާ ޖަލު ހުކުމާ އެކު އެމަނިކުފާނަށް ރިޔާސީ އިންތިހާބުގައި ވާދަކުރުމުގެ ފުރުސަތު މިވަގުތު ވަނީ ގެއްލިފަ އެވެ. ނަމަވެސް އެ ހުކުމް ހައި ކޯޓުން ބާތިލްކޮށްފި ނަމަ އެ ފުރުސަތު އަލުން ލިބިވަޑައިގަންނަވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
1206
07 July 2023
ދައުވާ ކުރި އިރު ވެސް ތިޔަ ކަން އެނގިފައި ދޯ އޮންނާނީ. އެހެން ވިއްޔާ، މި ފަސާދައިގައި އަދީބު އާއި ޒިޔަތުގެ ބައިވެރިވުން އޮވެމެ، އެ ދެ މީހުންގެ ހެކި ބަހާއި ނެތި ޔާމީނަށް ކުށް ސާބިތު ކުރެވެން އޮތް އިރު، އަދީބު އަދި ޒިޔަތު އާއިއެކު އިއުތިރާފު އެއްބަސްވުމެއް ހެދީ، އަދުލުގެ ނިޒާމުގެ ބޭނުން ނާޖާއިޒު ގޮތުގައި ހިފައި އެ ދެ މީހުންނަށް ނުހައްގު ސަލާމަތެއް ހޯދައިދޭން ތާ؟ އަނގަ ގަދަވި ވަރަކަށް ވާ ބޭޒާރު ބޮޑު ވާނެ. ލިޔުނު މީހާގެ ބޮލުގައި ވެސް ތެތް ކަމެއް ނެތީ
ފޫހި
06 July 2023
ފުރަތަމަ ވެސް ދައުލަތުން ތިޔަދައްކާވާހަކަ ދިމާނުވޭ. އެއީ އަދީބާއި ޒިޔަތު ގޭގައި ބައިތިއްބީ މިކަމަށް ނުފޫޒުފޯރުވޭގޮތަށް ކަން ފެންނަންއޮތުން. އެހިސާބުން މުޅި މައްސަލަ އެއޮތީ ބާޠިލްވެފަ. އެހެންނޫނީ ދުވާފަރު މީހުންނަށް ހެދިގޮތަށް ނަސޭހަތުގެ އެއްބަސްވުމެއް ހަދާ ޔާމީހު ދޫކޮށްލީމާ ނިމުނީ.
ހަޖަމް
06 July 2023
އަދީބު ބަލިވެ ހާލުދެރަވުމުގެ ކުރިން އަދީބާއި ޒިޔަތުގެ ހެކިބަސް ނެތަސް، ޔާމިންގެ މައްޗަށް ކުށް ސާބިތު ވާނެ ކަމަށް ބުނެ ނޫހުގެ ބޮޑުސުހުރީގައި ލިޔެ، އިއުލާނު ކުރުމުންވެސް އެބަ އެނގޭ މީގަވެސް ކޮންމެސް ރޭވުންތެރިމެއް ހިނގާކަން
ބަޑިތަކުރު
06 July 2023
ރާވައިގެން ހިންގާ ބޮޑެތި ކުށްތައް ސާބިތުކުރުމަށް އެކަމުގައި ބައިވެރިވި އެއްވެސް މީހެއްގެ ހެކިބަސް ގަބޫލުނުކުރަންޏާ ދެން އެފަދަ ބޮޑެތި ކަންކަން ސާބިތުނުވުންއޮންނާނީ ވަރަށް ގާތުގައެވެ. އަމިއްލައަށް ކުށަށް އިޢުތިރާފުވެގެން ދޭ ހެކިބަސް ގަބޫލުކުރަންޖެހޭނެގޮތަކަށް ގާނޫނުތައް ބައްޓަންކުރަންވެއްޖެއެވެ. އެހެންނޫނީ އެފަދަ ކަންކަން މިހާތަނަށްވެސް ގާނޫނުގެ ތޮއްޑުން ދިޔަހެން ދެންވެސްދާނީ ކޮޅެއްގައި ނުޖެހިއެވެ.
ޕަވިޔަނިޖަވިޔަނި
06 July 2023
އެގޮތަށް ނިންމައިގެންތޯ ކުރިޔަށްދަނީ
ވިޔާނިދާ
05 July 2023
ހެކިތައް ގުޅުވައިގެން ކަންކަން ސާބިތުކުރެވޭނަމަ، އެންމެ ހައްގުކަން ބޮޑީ ރޔ މިނިވަންކުރުން. އެހެނީ އަދީބު ލައްވާ ދޮގު ހެދި ދެނީ ސަރުކާރު އަޑީގައި އޮވެގެންކަމާއި ބަދަލެއްގެ ގޮތުން ޖަލުން ގެއަށް ބަދަލުކޮށްދީފަ ވޭ. މިހާރު ހިގާ މައްސަލާގަ ދޮގު ހެކި ދިނުމުގެ އިނާމެއްގެ ގޮތުން އަދީބު ފުރުވާލަން އެ ތައްޔާރުވަނީ. މިހާރު އޭނަ އެ އޮތީ ހޮސްޕިޓަލަށްވަދެ. ދޭން ހާލު ސީރިޔަސްކަމުން އިތުރު ފަރުވާއަށް ފުރުވާލާނީ. ޢެއީ ސަރުކާރާ މުޖްރިމާދެމެދު އޮތް އެއްބަސްވުމަކީ.
ކަތްދައްތަ
05 July 2023
މިކޮންމެ މީހަކުވެސް ހީވަނީ ޑޮލަރުޖަހާ މެޝިނެއްހެން. ޔާމީނުވެސް ޑޮލަރު ވިއްކަނީ މަހުލޫފުވެސް ހަމަ ޑޮލަރު ވިއްކަނީ ހާމިދުސޭޓުވެސް ޑޮލަރުވިއްކަނީ އައްތަރީސް ވާ ކަހަލަ ކަންކަން. އަނެއްކާ މޫކޭ އަކާ އޭނާ ޅިޔަނުވެސް ހަމަ ޑޮލަރުގެ ކުޅިވަރުބާ މިފެށީ. ކޮބާތަ ޑޮލަރުވިއްކަން ލައިސަންސްދޭ މީހުން
މިގައުމުގަ
06 July 2023
މިގައުމުގަ އެންމެ ބޮޑު އަދަބެއް ދެވޭ ކުށަކައް ހަދަންޖެހިފަމިއޮތީ ލައިސަންސްނެތި ޑޮލަރުވިއްކުން.
ފެހިއ
05 July 2023
ސިޔާސީމަގާމެއްގާ ހުރެ ސިޔާސީވައްކަމެއްކޮށް ދެން ތިއިއްވާ ހުކުމް ހަރާމްވެ ނޫނީ ސިޔާސީ ވަނީ
ކިޔޭނުކިޔޭ
05 July 2023
ދެން ކީއްވެ މިއޮއް ހުރިހާ ދުވަހު އަދީބު އާ ޒިޔަތު ގަނެގެން އެމީހުންގެ އަދަބު ލުއިކުރެވޭނެގޮތައް އެގްރީމެންޓެއް ހަދަގެން ކުރިއައް ދިޔައީ. ކުއްވެރިންތަކެއް ނުވައްދާ ކުރެވެންއޮތް ކަމަކައް އެމީހުން ވެއްދީ އެމީހުންނަށް ބޭއިންސާފު ލުއިތަކެއް ދޭންވެގެންބާ.
ޓެރޭ
05 July 2023
ކުށް ސާބިތުވާނެކަމެއް ނުވާނެ ކަމެއް ޚަސްމުންކުރެ މީހަކަށް ބުނަން ނޭނގޭނެ. އެއީ މައްސަލަ ސާބިތުވާނީ ހެކީގެ މައްޗަށް ބިނާކޮށް ގާޒީނިއްމާ ގޮތަކުން. ބައެއް ފަހަރު އެންމެނަށް ފެނިގެން އޮފް ސައިޑުގައި ހުރެ ޖަހާ ގޯލު ވެސް ރަނގަޅު ކަމަށް އެބަ ނިންމާ ރެފްރީ. އެއީ ރެފްރީ ހުރި އެންގަލުން ބެލީމަ އޮފްސައިޑް ކަމަށް ނުފެންނާތީ.