މަސްވެރިކަން ޕްރައިވެޓް ސެކްޓާ އަށް ދޫކޮށްލުމަކީ ފައިދާ ހުރި ގޮތެއް ނޫން: ރައީސް

މަސްވެރިކަމުގެ ދާއިރާ އިން ސަރުކާރު އެކީ އަތް ދޫކޮށްލުމަކީ ފައިދާ ހުރި ގޮތެއް ނޫން ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

މަސްވެރިކަމަށް މަޝްހޫރު ހއ. އިހަވަންދޫގައި މިރޭ ބޭއްވި އެމްޑީޕީގެ ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ހުރިހާ މަސްވެރިންނަށް ގިނަ ގޮންޖެހުންތައްކެއް އަދިވެސް އެބަހުރި ކަމަށެވެ.

ބާނާ މަސް ވަގުތުން ކިރުމުގެ ދަތިތަކާއި އެއަށް ފައިސާ ލިބުމުގައި ހުރި ދަތިތަކާއި ތެލުގެ މައްސަލަތައް ދިމާވާ ކަމަށް ރައީސް ވިދާޅުވި އެވެ. އެ މައްސަލަތައް ކުރިމަތިވެފައި ވަނީ މަސްވެރިކަމުގެ ދާއިރާ އަށް އަޅައި ނުލައި އޮތުމުން ކަމަށް ވެސް އެމަނިކުފާނު ވިދާޅުވި އެވެ.

"ދެކެވުނީ ވާހަކަތަކެއް، މާ ބޮޑެތި މަޝްރޫއުތަކެއް ހިންގައިގެން ބޮޑެތި ކަންކަން ކޮށްގެން އިންޑަސްޓްރީ ފުޅާކޮށްގެން ގެންދާ ވާހަކަ،" ކުރީ ސަރުކާރުތަކަށް އަމާޒު ކުރައްވައި ރައީސް ވިދާޅުވި އެވެ.

ރައީސް ވިދާޅުވި ގޮތުގައި މަސްވެރިކަމުގެ ދާއިރާ އަދިވެސް ކުރިޔަށް ގެންދަން ޖެހޭނީ ސަރުކާރުންނެވެ.

"ޕްރައިވެޓް ސެކްޓާ އަށް އެކީގައި ދޫކޮށްލައިގެން އެކަން ކުރުމަކީ އެންމެ ފައިދާ ހުރި ގޮތެއް ނޫން." ރައީސް ވިދާޅުވި އެވެ.

އެހެންވެ އެމަނިކުފާނުގެ ވިސްނުންފުޅަކީ ސަރުކާރުގެ މަސް ކުންފުނި، މިފްކޯ އަށް މިހާރަށް ވުރެ ބޮޑަށް އިންވެސްޓު ކުރުން ކަމަށާއި ފަސޭހައިން މަސް ކިރޭނެ ގޮތް ހެދުމާއި ކިރޭ މަސް ރަނގަޅަށް ފްރީޒް ކޮށް ސްޓޯ ކުރެވި ރަނގަޅު އަގުގައި ބޭރަށް ވިއްކޭނެ ގޮތް ހެދުން ކަމަށް ވެސް ރައީސް ވިދާޅުވި އެވެ.

އެ ދާއިރާ އަށް މިހާތަނަށް ކުރި ބައެއް މަސައްކަތްތަކަށް އަލިއަޅުވާލައްވަމުން ރައީސް ވިދާޅުވީ އައްޑޫ އާއި ކޫއްޑޫގެ މަސް ކާރުހާނާ ދެގުނަ ބޮޑު ކުރުމުގެ މަސައްކަތް ފަށާފައިވާ ކަމަށާއި ގދ. ތިނަދޫގައި ވެސް މަރުކަޒެއް ގާއިމް ކުރުމުގެ މަސައްކަތް ކުރަމުން އަންނަ ކަމަށެވެ. އަދި ފެލިވަރުގެ އާ ފެކްޓްރީއެއް ހަދަމުން އަންނަ ކަމަށް ވެސް ރައީސް ވިދާޅުވި އެވެ.

"ބޮޑު ތިލަދުންމައްޗަށް ބޮޑު ބަދަލެއް ގެންނާނަން، ތަރައްގީގެ ބޮޑު ބަދަލެއް އަޅުގަނޑުމެން ގެންނާނަން،" ރައީސް ވިދާޅުވި އެވެ.

ބޮޑު ތިލަދުންމައްޗަށް ބޮޑު ބަދަލެއް ގެންނާނަން، ތަރައްގީގެ ބޮޑު ބަދަލެއް އަޅުގަނޑުމެން ގެންނާނަން -- ރައީސް

އިހަވަންދޫގައި ފަށަން ނިންމާ އާ މަޝްރޫއެއް އިއުލާން ކުރައްވަމުން ރައީސް ވިދާޅުވީ އެ ރަށުގައި މަސް ގަންނަ ބަނދަރެއް ހެދުމުގެ މަސައްކަތް ކުރިޔަށް އޮތް ދެ ހަފްތާގެ ތެރޭގައި އެމްޓީސީސީ އާ ހަވާލު ކުރާނެ ކަމަށެވެ. އަދި އެ ބަނދަރު ހަދާ އިރު ބޯޓު ފަހަރަށް ބޭނުންވާ ސާމާނު ވިއްކާ އެމްޓީސީސީގެ ސޭލްސް ސެންޓަރެއް ވެސް ހުންނާނެ ކަމަށް އެމަނިކުފާނު ވިދާޅުވި އެވެ.

"އެ ސެންޓަރުގައި 50 ޓަނު ބްރައިން ފްރީޒް ކުރެވޭ 1000 ޓަނު ކޯލްޑް ސްޓޯރޭޖް ހުންނާނެ. މި ރަށުގެ މަސްވެރިން މި ބޭނުންވާ ހިދުމަތް ލިބިގެން ދާނެ. ބޮޑެތި ދޯނި އެހެލެވޭނެ ގޮތަށް އިންޖީނަށް ބޭނުންވާ ސްޕެއާ އާއި އަޑީ ތެޔޮ ލިބޭ ގޮތަށް ސޭލްސް ސެންޓަރު ގާއިމް ކުރެވޭނެ،" ރައީސް ވިދާޅުވި އެވެ.