ފޮޓޮގްރާފަރުން ތަމްރީން ކުރުމަށް ހިންގާ ކޯހުގެ ބައިވެރިންނާ އެކު ރައީސް ޔާމީންގެ ދެކަނބަލުން އަދި އިކޮނޮމިކް މިނިސްޓަރު ސައީދާއި އެޑިއުކޭޝަން މިނިސްޓަރު އައިޝަތު ޝިހާމް މިރޭ ފޮޓޯއަކަށް ހުއްޓިވަޑައިގެން.---ފޮޓޯ: އެޑިއުކޭޝަން މިނިސްޓްރީ
01 ފެބުރުއަރީ 2017 - 23:10
21 comments
ތަފާތު ދާއިރާތަކުން ކޯޑިން ޕްރޮފެޝަނަލްސް އުފެއްދުމަށްޓަކައި މި އަހަރުގެ ތެރޭގައި 1،000 ފުރުސަތު ހުޅުވާލާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު ޝިހާމް މިރޭ ވިދާޅުވެއްޖެ އެވެ.
"މިސަރުކާރުގެ އަމާޒަކީ ޒުވާނުން މި ދާއިރާ އިން ބާރުވެރިކުރުވުން. އެއީ ޖާވާ، ޕައިތަން ޕީއެޗްޕީ ނުވަތަ ސްވިފްޓް ފަދަ ކޮމްޕިއުޓާ ލެންގުއޭޖް ދާއިރާ އިން އެޑްވާންސް ޓްރޭނިން ފޯރުކޮށްދެވިގެން. މިރޮނގުން ކާމިޔާބުވާ ޒުވާނުންނަކީ ދުނިޔޭގައި ދެން އުފެދޭ އެޕް ނުވަތަ ޔުނިކޮން ސްޓާޓަޕްގެ ވެރިން،" ސަރުކާރުން ތަމްރީންކުރާ 1،000 ފޮޓޯގްރާފަރުންނާ ކެމެރާ ހަވާލުކުރުމަށް ދަރުބާރުގޭގައި ބޭއްވި ރަސްމިއްޔާތުގައި އެޑިއުކޭޝަން މިނިސްޓަރު ވިދާޅުވި އެވެ.
އައިޝަތު ޝިހާމް ފާހަގަކުރެއްވި ގޮތުގައި ކޯޑިން އަށް މީހުން އުފެއްދުމަށްޓަކައި ހިންގާ ކޯސްތަކަކީ ގޫގުލް ފަދަ އެންމެ އުފެއްދުންތެރި ކުންފުނިތަކުން ގަބޫލްކުރާ ކޯސްތަކަށް ވާނެ އެވެ. އަދި އެ ކޯސްތައް ނިމުމުން އެތައް ހާސް ވައްތަރެއްގެ އާ ވަޒީފާތަކެއް އުފެދޭނެ ކަމށް ވިދާޅުވި އެވެ.
"... ގޭގައި ތިބެ އަދާކުރާ ވަޒީފާތަކާއި އަދިވެސް ދުނިޔޭގެ އެކި ހިސާބުތަކުގައި އުފެދިފައިވާ ކުންފުނިތަކާ ގުޅިގެން މަސައްކަތްތައް ކުރެވިގެން ދާނެ،" މިނިސްޓަރު ވިދާޅުވި އެވެ.
ރައީސް އަބްދުﷲ ޔާމީންގެ ދެކަނބަލުން ބައިވެރިވެވަޑައިގެންނެވި މި ރަސްމިއްޔާތުގައި އެޑިއުކޭޝަން މިނިސްޓަރު ވިދާޅުވީ ތަމްރީނުތަކަށް އެދިއެދި ތިބި 5،470 ޒުވާނަކަށް މިހާތަނަށް ވަނީ ތަފާތު ރޮނގުތަކުން ސެޓްފިކެޓް ދީފައި ކަމަށެވެ. އޭނާ ފާހަގަކުރެއްވި ގޮތުގައި ޒުވާނުންނަށް އަމާޒުކޮށްގެން ގިނަ ތަމްރީނު ޕްރޮގްރާމްތައް ފެށީ ރައީސް ޔާމީންގެ ވެރިކަން ފެށުނު ފަހުން ނުވަތަ 2014 އަދި 2015 ގަ އެވެ.
މިރޭގެ ރަސްމިއްޔާތުގައި އެޑިއުކޭޝަން މިނިސްޓަރު އައިޝަތު ޝިހާމް ވާހަކަ ދައްކަވަނީ.---ފޮޓޯ: އެޑިއުކޭޝަން މިނިސްޓްރީ
މިނިސްޓަރު ވިދާޅުވީ 1،000 ފާމަސީ އެސިސްޓެންޓުން އަދި 1،000 ކޭޝިއަރުން ތަމްރީން ކުރަން 2015 ގައި ފެށި ކަމަށެވެ. މީގެ އިތުރުން ޓޫރިޒަމްގެ ދާއިރާ އިން 8،000 ފުރުސަތު ހުޅުވާލައި އަދި މިވަގުތު ވެސް 900 އަށް ވުރެ ގިނަ ދަރިވަރުން ނަރުހުންގެ ގޮތުގައި ތަމްރީން ވަމުން އަންނަ ކަމަށް ވެސް އައިޝަތު ޝިހާމް ވިދާޅުވި އެވެ.
"ދިވެހި ޒުވާނުންނާއި ކިޔަވާކުދިންނަށް މިއަދު ހުޅުވިގެންދާ ދޮރަކީ ފޮޓޮގްރަފީ އަށް ޝައުގުވެރިކަން ހުންނަ ދަރިވަރުންނަށް ތަމްރީނެއް ލިބުން. މުޖުތަމައުގައި ފައިދާ ހުރި މަސައްކަތެއް ކޮށްގެން ގަދަރުވެރިކަމާ އެކީ އާމްދަނީ ހޯދޭނެ ދޮރެއް ހުޅުވުން،" މިނިސްޓަރު ވިދާޅުވި އެވެ.
އައިޝަތު ޝިހާމް ވިދާޅުވީ އަލަށް ފެށޭ ފޮޓޯގްރަފީ ކޯހުގައި 1،000 ފޮޓޯގްރަފަރުން ތަމްރީން ކުރުމަކީ ސަރުކާރުގެ އަމާޒު ކަމަށެވެ. އަދި އެ ފޮޓޮގްރާފަރުންނަށް މިއަދުން ފެށިގެން ވަޒީފާ ވެސް ޔަގީންވާނެ ކަމަށް ވެސް މިނިސްޓަރު ވިދާޅުވި އެވެ.
"ސަބަބަކީ މި ކޯހުގައި ބައިވެރިވާ ކޮންމެ ދަރިވަރަކަށް އެންމެ މިހާރުގެ ޓެކްނޮލޮޖީ ހިމެނޭ ޕްރޮފެޝަނަލް ކެމެރާއެއް ފޯރުކޮށްދިނުމަށް ރައީސުލްޖުމްހޫރިއްޔާ ވަނީ ނިންމަވާފައި،" އައިޝަތު ޝިހާމް ވިދާޅުވި އެވެ.
މިނިސްޓަރު ފާހަގަކުރެއްވި ގޮތުގައި ދިވެހި ޒުވާނުންނަކީ ވަރަށް ވިސްނުން ތޫނު ހުނަރުވެރި ބައެކެވެ.
"ރާއްޖޭގެ ކުދިންނަށް ވެސް އޮތީ ހަމައެކަނި ރާއްޖޭގައި ހުރި އިންޑަސްޓްރީތަކުގެ ވަޒީފާތަކަށް ހިފެހެއްޓިފައެއް ނޫން. މި ކުދިންނަށް ވެސް އޮތް މުސްތަގުބަލުގެ ކޮޅުމަތި އޮތީ ހަމަ އަޅުގަނޑުމެންގެ ހިތްވަރާ ގުޅިފައި،" އައިޝަތު ޝިހާމް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސިންހާ
02 February 2017
މިހާރުވެސް އައިޓީ ދާއިރާގެ ތައުލީމުލިބިފައިވާ ވަރަށް ބައިވަރު މީހުން އެބަތިބި. މައްސަލައަކީ ޕޭޕޭލް ފަދަ ހިދުމަތްތަކުން ރާއްޖެއަށް ފައިސާ ފޮނުވޭނެ ގޮތެއް ނެތުމުން ރާއްޖޭން ބޭރުގެ ޕްރޮޖެކްޓްތަކުގައި މަސައްކަތްކުރުމުގެ މަގު ބަންދުވެފައިވުން.
1234
02 February 2017
ޕޭޕަލް އަށް ގުޅިމަ ބުނީ ރައްޖޭގެ ގާނޫނުތަކުގަ މައްސަލައެކޭ.
ރަސީދު
02 February 2017
ރަނގަޅު.. 1.2 ބިލިއަން ރުފިޔާ "ގެއްލިފައި" ކެމެރާކޮޅެއް ދިނުން ވަރަށް ރަނގަޅު. ދެން އެކުދިން އުފަލުން ތިބޭނެތާ.. "ގެއްލުނު" ލާރީގެ ވާހަކަ ނުދައްކާނެތާ
އުމަރު
02 February 2017
މިއީ ރައީސް ޔާމީނުގެ ކެމްޕޭނަށް ތައްޔާރުކުރާ ފޮޓޯގްރާފަރުން،
އިބިރާ
02 February 2017
ސަޅިބައިސާ
އަފިހުން ގޮއްޔެ
02 February 2017
"އެންމެ މިހާރުގެ ޓެކްނޮލޮޖީ ހިމެނޭ ޕްރޮފެޝަނަލް ކެމެރާއެއް ފޯރުކޮށްދިނުމަށް ރައީސުލްޖުމްހޫރިއްޔާ ވަނީ ނިންމަވާފައި،" ތިޔަ ފޯރު ކޮށްދޭ ކެމެރާގެ މައުލޫމާތު ހިމަނާލި ނަމަ ދެއްތޮ،
މުހައްމަދު
02 February 2017
ކޯޑި، ކޯޑިބަލި، ކޯޑިކުޅުން، ކޯޑިކެނޑުން، ކޯޑިޖެހުން މިހިރީ އަހަރެމެން ދިވެހިން މާކުރިއްސުރެ ދަސްކޮށްފައިވާ ކަންކަމާއި ކަންތައްތަކެކެވެ.
ވިއުސް
02 February 2017
ތަފާތު ދާއިރާތަކުން ކޯޑިން އަށް 1،000 ޒުވާނަކު ތަމްރީން ކުރުން އެއީ ރަނގަޅު ކަމެކެވެ. ހަމަ މިގޮތަށް ސަރުކާރުގެ އިގްތިސާދީ ސިޔާސަތަކީ އެއީ މިހާރު ޔޫއެސްގެ ވައިޓް ހައުސް ގެންގުޅޭ ފަދަ ކޮންޒަރވޭޓިވް އިގްތިސާދަކަށް ހަދާ ސަރުކާރުގެ ހުރިހާ ކޮންޓްރެކްޓްސް ތައް ސަރުކާރުގެ ކުންފުނި ތަކަށް ސަރުކާރުން ދޭން ބާރު އަޅާ އެފަދަ ޑިކްރީސް ތައް ރައީސް އޮފީހުން ނެރެ އެގޮތަށް އަމަލު ކުރާނަމަ ސަރުކާރުގެ ކުންފުނި ތަކުން އެކަނިވެސް ވަޒީފާ ދެވޭނެ ގާތް ގަނޑަކަށް 30 ހާސް ދިވެހިންނަށް. މީ ވަރަށް ގިނަ އަދަދެކެވެ. ކަން މިހެން ހުރުމުން މިފަދަ ކަންކަން ސަރުކާރުގެ އިކޮނޮމިކް ކައުންސިލުން ވިސްނާނެ ކަމަށް މަމެން މިދެކެނީ.
ސސ
02 February 2017
ކޮބައިތޯ ހުނަރު ދަސްވާރު ޓީވެޓް ޕޮރޮގުރާމް ތަކުން ނިމޭ ކުދިން އެކުދިންނަށް މިހާރު ވަޒީފާ އެބަދެވޭބާ؟
ބޫ
02 February 2017
ޑީ3400 އަކީ އެންމެ ފަހުގެ ކެމެރާ ދެއްތޯ.......ތި ބޭފުޅުންވެސް ހަމަ މިނިސްޓަރ ވިދާލުވީމަ ޤަބޫލުފުޅު ކުރައްވައިގެން އެވާހަކަވެސް ނޫހުގައި ޖައްސަވަނީ
ބޭބެ
02 February 2017
" ކޯޑިން " އެއް ނޫން ، ރަނގަޅުގޮތަކީ ޕްރޮގްރާމަރުން. މިއީ ކުރަން ލަސްވެފައި އޮތްކަމެއް. މިކަން 2000 ހުގެ އަހަރުތަކުގައި ކުރިނަމަ މިހާރު އޮތީހީ ތަފާތު މަންޒަރެއް. ދެން މިކަން ވެސް ނަމަކަށް ޕޮއިންޓް ހޯދަން ނުކޮއްފިއްޔާ ކިތަންމެހާވެސް ރަނގަޅު. ރާއްޖޭގައި އައި.ޓީ ކިޔާވާދެނީ ނަމަކަށް ... ސައިރިކްސް އިން ލަދުގަންނަން ޖެހޭނެ.