ނައީމާގެ މަރުގެ މައްސަލާގައި ތިން މީހަކަށް ދައުވާކޮށްފި

ނ. މަނަދޫގައި މިދިޔަ އޭޕްރީލް މަހުގެ ހަތް ވަނަ ދުވަހު މަރާލާފައި އޮއްވައި ފެނުނު ނައީމާ މޫސާގެ މަރުގެ މައްސަލާގައި ތުހުމަތުވާ ތިން މީހަކަށް ޕްރޮސެކިއުޓާ ޖެނެރަލްގެ އޮފީހުން ދައުވާކޮށްފި އެވެ.

އެ މީހުންގެ މައްޗަށް ދައުވާކޮށްފައިވާ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވީ މިހާރު ކުރިއަށް ގެންދާ އެ އޮފީހުގެ ޕްރެސް ކޮންފަރެންސްގަ އެވެ.

އެ މައްސަލާގައި ހައްޔަރުކުރީ މަނަދޫގެ ތިން ޒުވާނެއް ކަމަށްވާ އަހްޒަމް އަބްދުއްޝަކޫރު، 23، އާއި އަބްދުލްވާހިދު ރިފާސް، 20، އަދި ހަސަން ފަވާޒް، 21، އެވެ.

ޕީޖީ ޝަމީމް ވިދާޅުވީ، އެ ތިން މީހުންގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމާއި އަދުލު އިންސާފު ގާއިމްކުރުމަށް ހުރަސްއެޅުމާއި އަދި މައްޔިތާގެ ބޭނުން ނަހަމަ ގޮތުގައި ކުރުމުގެ ދައުވާ ކަމަށެވެ.

"[އަދުލު އިންސާފު ގާއިމްކުރުމަށް ހުރަސްއެޅުން] އެ ދައުވާކުރަނީ ނައީމާ މޫސާ މަރާލުމަށް ފަހު، ނ. މަނަދޫ ނާމަގު ސަރަހައްދަށް ގޮސް އެ ތަނުގައި ވަޅެއް ކޮނެ، އެ އަމަލު ހިންގުމަށް ބޭނުންކުރި ވަޅި އާއި އެހެން އެއްޗެހި ނައްތާލަން އަންދާލާފައި ވާތީ، އެ ހެކި ނައްތާލުމުގެ ބައިގައި،" ޝަމީމް ވިދާޅުވި އެވެ.

"[މައްޔިތާގެ ބޭނުން ނަހަމަ ގޮތުގައި ކުރުން] އެ ދައުވާ މި ކުރަނީ އެ ގޭގެ ދޮރު ތަޅުލާފައި ދިޔައީ، އެހެންވެ 40 ގަޑިއިރު ފަހުން އާއިލާ އަށް އެ ހާދިސާ ހިނގައިގެން އުޅޭކަން އެނގުނީ."

އަޒްހަމް އަބްދުއްޝުކޫރާއި އަބްދުލް ވާހިދު ރިފާސް އަކީ ނައީމާ މަރާލުމުގައި އަމަލީ ގޮތުން ބައިވެރިވި ދެ މީހުން ކަމަށް ޝަމީމް ވިދާޅުވި އެވެ.

އޭނާ ވިދާޅުވި ގޮތުގައި ނައީމާގެ މަރާ ގުޅޭ ސައިންޓިފިކް ހެކި ނުވަތަ ޑީއެންއޭ ހެއްކާއި އިތުރު ހެކި ވަނީ ލިބިފަ އެވެ. އެ ހެކިތަކަށް ބަލައި އެ ތިން މީހުންގެ މައްޗަށް ވެސް ދައުވާތައް ސާބިތުކުރެވޭނެ ކަމަށް ގަބޫލުކުރެވޭ ކަމަށް ވިދާޅުވި އެވެ.

އެ ތިން މީހުންގެ ތެރެއިން އެކަކު ކުށަށް އެއްބަސްވެފައިވާ ކަމަށް ވެސް ޝަމީމް ވިދާޅުވި އެވެ. ނަމަވެސް އެއީ ކާކު ކަމެއް އޭނާ ވިދާޅެއް ނުވެ އެވެ.

ނައީމާ މަރާލަން ބޭނުންކުރި ކަމަށް ތުހުމަތު ކުރެވޭ ދެ ވަޅި އާއި އެ މީހުން ހަމަލާދިން އިރު ލައިގެން ތިބި ކަމަށް ބެލެވޭ އަންނައުނު ވެސް މަނަދޫގެ އަތިރިމަތީގައި ވަޅުލާފައި ހުއްޓާ ފެނިފައިވާ ކަމަށް ވެސް ފުލުހުން ކުރިން ބުނެފައިވެ އެވެ.

ނައީމާ މަރާލި ކަމަށް ބެލެވެނީ ނިދާފައި އޮއްވައި ގޭތެރެއަށް ވަދެ އެވެ. ކަރަށާއި ހަށިގަނޑުގެ އެކި ތަންތަނަށް ހަމަލާދީ މަރާލާފައި އޮއްވާ އޭނާ ފެނުނީ ޚަބަރެއް ނުވާތާ ދެ ދުވަސް ފަހުން ބަޔަކު ފުލުހުންނާ އެކު، އެ ގެއަށް ގޮސް ކޮޓަރި ދޮރު ހަލާކުކޮށްލައިގެން ވަދެ ބެލި އިރެވެ.