އިންޑިއާ ސިފައިން ގެންދަން އެ ގައުމުން އެއްބަސްވެއްޖެ: ރައީސް

ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެ ގައުމުން އެއްބަސްވެފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އިންޑިއާ ސިފައިން ފޮނުވާލުމަކީ ރައީސްގެ ރިޔާސީ އެއް ވައުދެވެ. އެ މަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރަން ނިންމާފައިވާ އެންމެ މުހިންމު އެއް ކަމަކީ ވެސް އިންޑިއާގެ ސިފައިން ރާއްޖެ އިން ފޮނުވާލުމެވެ.

ތުރުކީއަށް ކުރެއްވި ރަސްމީ ދަތުރުފުޅަށް ފަހު ދުބާއީގައި ކުރިއަށް ދިޔަ މޫސުމާ ބެހޭ ސަމިޓް، ކޮޕް28ގެ ހަވާސާގެ ތެރެއިން ރައީސް ވަނީ އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައިފަ އެވެ.

އަޅުގަނޑުމެންގެ ގައުމުން އިންޑިއާ ސިފައިން ބޭލޭނެ. އަދި ވަރަށް އަވަހަށް އެކަން ހާސިލްވުން އަޅުގަނޑުމެން މި ކުރާ މަސައްކަތުގެ ނަތީޖާއަކީ. -- ރައީސް

އެ ދަތުރުފުޅަށް ފަހު ރާއްޖެ ވަޑައިގެން ވެލާނާ އެއާޕޯޓުގައި މިއަދު ނޫސްވެރިންނާ ބައްދަލުކުރައްވައި ރައީސް ވިދާޅުވީ، އެ ގައުމުގެ ސިފައިން އަނބުރާ ގެންދިއުމުގެ މަސައްކަތް ކުރަމުން އަންނަނީ ޑިޕްލޮމެޓިކް އުސޫލުތަކާ އެއްގޮތްވާ ގޮތުގެ މަތިން ކަމަށާއި އެކަމަށް އިންޑިއާ ސަރުކާރުން ވެސް އިހުތިރާމް ކުރާ ކަމަށެވެ.

ރައީސް ވިދާޅުވި ގޮތުގައި މި މަސައްކަތަށް ހައި ލެވެލްގެ ކޮމިޓީއެއް އެކުލަވާލައިގެން މަސައްކަތް ކުރުމަށް އިންޑިއާގެ ބޮޑުވަޒީރާ އެކު އެމަނިކުފާނު ޔޫއޭއީގައި ބޭއްވި ބައްދަލުވުމުގައި ވެސް އެއްބަސްވެފައިވާ ކަމަށެވެ. ރާއްޖޭގެ މި ޑިމޮކްރެޓިކް ނިންމުންމަކީ މުޅި ސަރަހައްދަށް ވެސް މުހިންމު ނިންމުމެއް ކަމަށާއި އެކަމަށް އެ ގައުމުން އިހުތިރާމް ކުރާނެ ކަމުގެ ޔަގީންކަން މޯދީ ދެއްވައިފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވީ ރާއްޖޭގެ ޑިމޮކްރެޓިކް ނިންމުމަށް އިހުތިރާމް ކުރާ ކަމަށާއި މި ނިންމުމަށް ތަބާވުމަކީ އެންމެ ރަނގަޅު ގޮތް ކަމަށް ވެސް އިންޑިއާގެ ބޮޑުވަޒީރު ވިދާޅުވި ކަމަށެވެ.

"އަޅުގަނޑުމެންނާ އެކު ކުރެވުނު މަޝްވަރާތަކުގައި އިންޑިއާގެ ސަރުކާރުން އެއްބަސްވެފައި ވަނީ އިންޑިއާ ސިފައިން އަނބުރާ ގެންދާނެ ކަމަށް. މިހާރު ޓެކްނިކަލް ލެވެލްގެ މަސައްކަތްތައް އެބަކުރެވޭ، ދެ ގައުމުގެ ޓެކްނިކަލް ލެވެލްގައި މަސައްކަތް އެބަ ހިނގާ،" ރައީސް ވިދާޅުވި އެވެ.

"އަދި މިހާރު އެއްބަސްވެފައި މިވަނީ ހައި ލެވެލް ކޮމިޓީއެއް ވެސް އެކުލަވާލަން މަޝްރޫއުތައް ކުރިއަށް ގެންދިއުމުގައި ދިމާވާ މައްސަލަތައް ހައްލުކުރުމަށް. މިސާލަކަށް މާލެ ކައިރީގައި މި ހިނގާ ބްރިޖް މަޝްރޫއު އާއި އެކިއެކި ލޯންތަކުގައި މި ދިމާވާ ކަންކަމާ، ގައުމަށް މި ދިމާވެފައިވާ ބޮޑެތި މައްސަލަތަކާ."

ވެރިކަމާ ހަވާލުވެވަޑައިގަތުމަށް ފަހު މިހާތަނަށް އިންޑިއާގެ ސަރުކާރުގެ ވެރިންނާ އެކު ބޭއްވެވި ހުރިހާ ބައްދަލުވުންތަކުގައި ވެސް އިންޑިއާ ސިފައިންގެ މައްސަލާގައި ވާހަކަ ދެއްކެވި ކަމަށާއި ރައްޔިތުން އެދޭ ގޮތް ވަރަށް ސާފުކޮށް ދެންނެވި ކަމަށް ރައީސް ވިދާޅުވި އެވެ. އެކަން ހާސިލްކުރެއްވޭނެ ކަމުގެ ޔަގީންކަން ވެސް ލިބިވަޑައިގެންފައިވާ ކަމަށް އެމަނިކުފާނު ވިދާޅުވި އެވެ.

"އަޅުގަނޑުމެންގެ ގައުމުން އިންޑިއާ ސިފައިން ބޭލޭނެ. އަދި ވަރަށް އަވަހަށް އެކަން ހާސިލްވުން އަޅުގަނޑުމެން މި ކުރާ މަސައްކަތުގެ ނަތީޖާއަކީ. އަޅުގަނޑަށް ވަރަށް ޔަގީންކަން އެބައޮތް މި ގެންދެވޭ ޑިމޮކްރެޓިކް އުސޫލުގެ ތެރެއިން ހަމަ ވަރަށް އަވަހަށް އެކަން ހާސިލް ވެގެން ދާނެ،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އެކަން ހާސިލްވާނެ ތާރީހެއް ކަނޑައެޅޭނީ އެ ކޮމިޓީން ކުރަމުން އަންނަ މަސައްކަތުގެ އަލީގަ އެވެ.