އިންޑިއާ އާއި ރާއްޖޭގެ ރައްޔިތުންގެ މަންފާއަށް ދެ ގައުމު އެކުގައި ކުރާ މަސައްކަތް ކުރިއަށް ގެންދާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.
އިންޑިއާގެ ޖުމްހޫރީ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު އިއްޔެ ފޮނުއްވި ތަހުނިޔާގެ މެސެޖަކަށް އެކްސްގައި ރިޕްލައި ކުރައްވައި މޯދީ ވަނީ އެމަނިކުފާނަށް ޝުކުރު އަދާކުރައްވައިފަ އެވެ.
"ޝުކުރިއްޔާ، ރައީސް މުއިއްޒު،" މޯދީ ވިދާޅުވި އެވެ.
މޯދީ ވިދާޅުވީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސް މުއިއްޒު ކިޔުއްވި ހޫނު ތަހުނިޔާ އާއި ފޮނުއްވި ހެޔޮއެދުންތައް އިހުތިރާމާ އެކު ގަބޫލުކުރައްވާ ކަމަށެވެ.
"ދެ ގައުމުގެ ރައްޔިތުންގެ މަންފާއަށްޓަކާ އެކުގައި މި ކުރާ މަސައްކަތް ކުރިއަށް ގެންދާނަން. އެންމެހާ ދިވެހި ރައްޔިތުންނަށް ކުރިއަށް އޮތީ އުފާވެރި ފާގަތި ދުވަސްތަކެއް ކަމުގައި އެދެން،" މޯދީ ވިދާޅުވި އެވެ.
އިންޑިއާގެ ޖުމްހޫރީ ދުވަހުގެ ތަހުނިޔާގެ މެސެޖުގައި ރައީސް މުއިއްޒު ވިދާޅުވީ އިންޑިއާގެ ޖުމްހޫރީ ދުވަހަކީ، މިނިވަންކަމާއި ޑިމޮކްރަސީ އާއި ހެޔޮވެރިކަމަށް އެ ގައުުމުން ދޭ އަހުމިއްޔަތުކަން ހާމަވާ ދުވަހެއް ކަމަށެވެ. އަދި ކުރިމަގުގައި ވެސް ދެ ގައުމުގެ ރައްޔިތުންގެ ހެވާއި ލާބައަށްޓަކާ ގުޅުން އިތުރަށް ބަދަހިވާނެ ކަމަށް އުންމީދު ކުރައްވާ ކަމަށް ރައީސް ވިދާޅުވި އެވެ.
ރައީސް އޮފީހުން އިއްޔެ ބުނީ، ރައީސް އެކްސްގައި ކުރެއްވި ޕޯސްޓުގެ އިތުރުން އިންޑިއާގެ ޖުމްހޫރީ ދުވަހުގެ މުނާސަބަތުގައި އެ ގައުމުގެ ރައީސް ދްރައުޕަތީ މުރްމުއަށާއި ބޮޑުވަޒީރު ނަރެންދުރަ މޯދީ އަށް ރައީސް މުއިއްޒު ސިޓީފުޅެއް ވެސް ފޮނުއްވި ކަމަށެވެ.
ރައީސް މުރްމު އަށް ފޮނުއްވި ސިޓީފުޅުގައި، ރައީސް މުއިއްޒު ވިދާޅުވީ، ރާއްޖެ އާއި އިންޑިއާގެ ދެމެދުގައި އޮތް 60 އަހަރުގެ ރަހުމަތްތެރިކަން ބިނާކޮށްފައި ވަނީ އެއް ގައުމުން އަނެއް ގައުމަށް ކުރާ އިތުބާރާއި އިހުތިރާމާއި ފަހުމުވުންތަކުގެ ބިންގަލުގެ މަތީގައި ކަމަށެވެ.
ބޮޑުވަޒީރު މޯދީ އަށް ފޮނުއްވި ސިޓީފުޅުގައި ރައީސް މުއިއްޒު ވަނީ، ދެ ގައުމުގެ ގުޅުމުގެ ނަތީޖާއެއްގެ ގޮތުން ފެންނަން ހުރި ތަރައްގީ، ފަހުރުވެރިކަމާ އެކު ހަނދާން އާކުރައްވާފައި ކަމަށް ރައީސް އޮފީހުން ބުންޏެވެ.