އިންޑިއާގެ ޖުމްހޫރީ ދުވަހުން އެނގެނީ އެ ގައުމުން މިނިވަންކަމާއި ޑިމޮކްރަސީ އާއި ހެޔޮވެރިކަމަށް ދޭ އަހައްމިޔަތުކަން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެ މަނިކުފާނު އެހެން ވިދާޅުވީ، އިންޑިއާގެ ޖުމްހޫރީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގަ އެވެ.
ރައީސް މުއިއްޒު ވިދާޅުވީ އިންޑިއާގެ ޖުމްހޫރީ ދުވަހަކީ، މިނިވަންކަމާއި ޑިމޮކްރަސީ އާއި ހެޔޮވެރިކަމަށް އެ ގައުުމުން ދޭ އަހަންމިއްޔަތުކަން ހާމަވާ ދުވަހެއް ކަމަށާއި ކުރިމަގުގައި ވެސް ދެ ގައުމުގެ ރައްޔިތުންގެ ހެވާއި ލާބައަށްޓަކައި ގުޅުން އިތުރަށް ބަދަހިވާނެ ކަމަށް އުންމީދު ކުރައްވާ ކަމަށެވެ.
ރައީސް އޮފީހުން ބުނީ، އެކްސްގައި ކުރެއްވި ޕޯސްޓުގެ އިތުރުން އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި އެ ގައުމުގެ ރައީސް ދްރައުޕަތީ މުރްމުއަށާއި ބޮޑުވަޒީރު ނަރެންދުރަ މޯދީ އަށް ރައީސް މުއިއްޒު ސިޓީފުޅެއް ފޮނުއްވި ކަމަށެވެ.
ރައީސް މުރްމު އަށް ފޮނުއްވި ސިޓީފުޅުގައި، ރައީސް މުއިއްޒު ވިދާޅުވީ، ރާއްޖެ އާއި އިންޑިއާގެ ދެމެދުގައި އޮތް 60 އަހަރުގެ ރަހުމަތްތެރިކަން ބިނާކޮށްފައި ވަނީ އެއް ގައުމުން އަނެއް ގައުމަށް ކުރާ އިތުބާރާއި އިހުތިރާމާއި ފަހުމުވުންތަކުގެ ބިންގަލުގެ މަތީގައި ކަމަށެވެ.
ބޮޑުވަޒީރު މޯދީ އަށް ފޮނުއްވި ސިޓީފުޅުގައި ރައީސް މުއިއްޒު ވަނީ، ދެ ގައުމުގެ ގުޅުމުގެ ނަތީޖާއެއްގެ ގޮތުން ފެންނަން ހުރި ތަރައްގީ، ފަހުރުވެރިކަމާ އެކު ހަނދާން އާކުރައްވާފައި ކަމަށް ރައީސް އޮފީހުން ބުންޏެވެ.
"އަދި ބޮޑުވަޒީރު މޯދީގެ ބެއްލެވުމުގެ ދަށުން، ސަރަހައްދީ ފެންވަރުގައި އިންޑިއާ އިން ދައްކާ އިސްނެގުން ފާހަގަކުރައްވައި، ކުރިއަށް އޮތް ދުވަސްތަކުގައި ވެސް ދެ ގައުމުން މަސްލަހަތު ހިމެނޭ ކަންކަމުގައި ދެ ގައުމުގެ ގުޅުން ހަރުދަނާކޮށް، އަމަލީ ގޮތުން އެއްބާރުލުން ދިނުން އިތުރު ކުރުމުގެ އަޒުމުގައި ސަރުކާރުން މަސައްކަތް ކުރައްވާނެ ކަމުގައި އެ މަނިކުފާނު ވިދާޅުވި އެވެ،" ރައީސް އޮފީހުގެ ވެބްސައިޓުގައި ވެ އެވެ.
ރައީސް ވިދާޅުވި ގޮތުގައި، ރާއްޖޭގެ އިގުތިސާދީ އަދި އިޖުތިމާއީ ތަރައްގީ އަށް އިންޑިއާ އިން ދޭ އެއްބާރުލުމުގެ އަގު އެ މަނިކުފާނު ވަޒަންކުރައްވަ އެވެ.
ކޮންމެ އަހަރެއްގެ ޖެނުއަރީ މަހުގެ 26 ވަނަ ދުވަހަކީ އިންޑިއާގެ ޖުމްހޫރީ ދުވަހުގެ ގޮތުގައި ފާހަގަކުރަނީ 1950 ވަނަ އަހަރު އެ ގައުމުގެ ގާނޫނުއަސާސީ ތަންފީޒުކޮށް، ޖުމްހޫރިއްޔަތަކަށް ބަދަލުވުމުގެ މުނާސަބަތާ ގުޅުވައިގެންނެވެ.