"ކުރީ ސަރުކާރުގެ އެތައް ސަތޭކަ މިލިއަންގެ ލޯނާއެކު އިގްތިސާދު ވައްޓާލީ މިއިން ޒަމާނަކު ވެސް ނުދާހާ ދަށަށް. މި ނޫން ގޮތަކަށް މި ހާލަތު ދައްކަން އުޅޭތީ ހައިރާންވޭ،"
މަރަދޫ ފޭދޫގައި ރައްޔިތުންނާ ބައްދަލުކުރައްވާ ރައީސް ވާހަކަފުޅު ދައްކަވަނީ.-- ފޮޓޯ؛ ރައީސް އޮފީސް
18 ފެބުރުއަރީ 2024 - 19:39
66 comments
ވެރިކަމާ އެމަނިކުފާނު ހަވާލުވެވަޑައިގަތް އިރު، ގައުމު އޮތީ އިގްތިސާދީ ވަރަށް ބޮޑު އަނދަވަޅެއްގެ ތެރެއަށް ވައްޓާލާފައި ކަމަށާއި އެކަމުން އަރައިގަނެ ލަސްނުކޮށް ތަރައްގީ ވެސް ގެންނަވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އިންތިހާބުވެވަޑައިގަތުމަށް ފަހު އައްޑުއަށް ކުރައްވާ ފުރަތަމަ ދަތުރުފުޅުގައި، މަރަދޫ ފޭދޫ ރައްޔިތުންނާ މިއަދު ބައްދަލުކުރައްވައި ރައީސް ވަނީ އެމްޑީޕީގެ ފަސް އަހަރު ނިމުނުއިރު އިގްތިސާދީ ގޮތުން ގައުމު ވައްޓާލާފައި އޮތް ދަތި ހާލަތު ސިފަކޮށްދެއްވައިފަ އެވެ. މި ސަރުކާރު އައިއިރު، 120 ބިލިއަނެއްހާ ރުފިޔާގެ ދަރަނި ވާރުތަވެފައި އޮތް ކަމަށް އެމަނިކުފާނު ވިދާޅުވި އެވެ.
120 ބިލިއަނަކީ އަޅުގަނޑުމެންނަށް ވާރުތަވެގެން އައި އިގްތިސާދީ ހާލަތު. އެކަން އެގޮތަށް ކުރި ފަރާތްތަކުން އެކަން އެގޮތަށް ނެތް ކަމަށް ދެއްކުމަކީ ހައިރާންވާ ކަމެއް. -- ރައީސް
މިއީ މިއިން ޒަމާނަކު ވެސް ރާއްޖެ ނުވެއްޓޭހާ ދަށް ހާލަތެއް ކަމަށް ރައީސް ވިދާޅުވި އެވެ.
މި ހާލަތުން އަރައިގަތުމަށް މަސައްކަތް ކުރައްވަމުން އަންނަ ކަމަށާއި ތަރައްގީ ވެސް ހުއްޓުމެއް ނެތި ގެންނަވާނެ ކަމުގެ ޔަގީންކަން ދެއްވައި ރައީސް އެދިވަޑައިގަތީ އެމަނިކުފާނަށް ރައްޔިތުން އިތުބާރު ކުރެއްވުމަށެވެ.
މަރަދޫ ފޭދޫ ރައްޔިތުންނާ ބައްދަލުކުރައްވަން ބޭއްވި ޖަލްސާގައި ރައީސް: އިގްތިސާދީ ދަތި ހާލަތުން އަރައިގަތުމާ އެކު މަޝްރޫއުތައް ވެސް ކުރިއަށް ގެންގޮސްދެއްވާނެ ކަމުގެ ޔަގީންކަން ދެއްވި. -- ފޮޓޯ | ރައީސް އޮފީސް
ރައީސް ވިދާޅުވީ އިގްތިސާދު މިހާ ދަށް ހާލަތަކަށް ވެއްޓުނީ، މިދިޔަ ސަރުކާރުން ދިޔައީ އެތައް ސަތޭކަ މިލިއަން ޑޮލަރުގެ ލޯނު ނަގަމުން ކަމަށެވެ.
"120 ބިލިއަނަކީ އަޅުގަނޑުމެންނަށް ވާރުތަވެގެން އައި އިގްތިސޯދީ ހާލަތު. އެކަން އެގޮތަށް ކުރި ފަރާތްތަކުން އެކަން އެގޮތަށް ނެތް ކަމަށް ދެއްކުމަކީ ހައިރާންވާ ކަމެއް،" ރައީސް ވިދާޅުވި އެވެ.
ރައީސް ވިދާޅުވީ ސަރުކާރުތަކަށް މަސައްކަތްކުރެވޭނީ ލޯނުތައް ނަގައިގެން ކަމަށާއި އެކަމަކު އޭގައި މައްސަލައަކީ ރައްޔިތުންނަށް މަންފާއެއް ނެތް ގޮތަށް އެކަން ކުރުން ކަމަށެވެ. މިދިޔަ ސަރުކާރުގައި ލޯންތައް ނަގާފައި ވަނީ ދިވެހި އެއްވެސް ރައްޔިތަކަށް ފައިދާއެއް ނެތް ގޮތަކަށް ކަމަށް އެމަނިކުފާނު ވިދާޅުވި އެވެ.
"އެހެންވީމަ ރާއްޖޭގެ އިގްތިސާދަށް ފައިދާއެއް ނެތް ތަނުގައި ރައްޔިތުން މުއްސަނޖެއް ނުވި،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ލޯން އެހީގައި ޗައިނާ މޯލްޑިވްސް ބްރިޖުގެ މަޝްރޫއުއަކީ ދިވެހި އެތައް ބަޔަކަށް ފައިދާވާ ގޮތަށް އޭރުގެ ސަރުކާރުން ކުރިއަށް ގެންދިޔަ މަޝްރޫއުއެކެވެ. އަދި ކުރިއަށް އޮތް ތަނުގައި މި ސަރުކާރުން ވެސް ލޯނުތައް ނަގާނީ މެދު ފަންތީގެ ވިޔަފާރިތަކަށް އާރޯކަން އަންނާނެ ގޮތަށް ކަމަށް ވިދާޅުވި އެވެ.
މާނައަކީ އިގްތިސޯދު ދާނީ ކުރިއަށޭ. އެހެންވީމަ ރައްޔިތުންގެ ކިބައިން އަޅުގަނޑު އެދޭނީ މި މަސައްކަތަށް އިތުބާރުކުރެއްވުމަށް، މިކަން ކުރިއަށް ގެންދިއުމުގައި ފުރުސަތު ދެއްވައި އިތުބާރުކުރެއްވުމަށް. ތަރަައްގީ ކުރިއަށް ދާނެ. ލަހެއް ނުކުރާނަން -- މުއިއްޒު
އެމަނިކުފާނު ވިދާޅުވީ ލޯނު ނަގާއިރު އެ ފައިސާ ދިގު މުއްދަތަކަށް ބަހާލައިގެން ވީހާވެސް ލުއި ގޮތަށް ދެއްކޭނެ ގޮތެއް ވެސް ހޯއްދަވާނެ ކަމަށެވެ.
"ޗައިނާއާ އެކު [މި ސަރުކާރުން] މިވީ އެއްބަސްވުންތަކުގައި ވެސް މި ދެންނެވި ގޮތަށް ނޫން ގޮތަކަށް ނަގާނެ ލޯނެއް ނޯންނާނެ،" ރައީސް ވިދާޅުވި އެވެ.
— The President's Office (@presidencymv) February 18, 2024
ރައީސް ވިދާޅުވީ އެމަނިކުފާނު އައްޑޫއަށް ވެވަޑައިގަތް އެންމެ ބޮޑު ވައުދު ކަމަށްވާ ބްރިޖުގެ މަސައްކަތުގެ ޑިޒައިން ނިމި އަމަލީ މަސައްކަތް މި އަހަރު ފެށޭނެ ކަމަށެވެ. އަދި ދައުރުގެ ފަހުކޮޅަށް މަޑުނުކުރައްވައި ވީއެންމެ އަވަހަކަށް އެ މަސައްކަތް ކުރައްވާނެ ކަމަށް ވެސް ރައީސް ވިދާޅުވި އެވެ.
"އިގްތިސާދުގައި ބުންވަރު ޖައްސަމުން އިގްތިސޯދަށް ކުރިއެރުން ގެންނަމުން މަސައްކަތް ކުރިއަށް ގެންދާނީ،" ރައީސް ވިދާޅުވި އެވެ.
ރައީސް މިއަދު އައްޑޫގައި ކުދިންތަކަކާ ސަލާމްކުރައްވަނީ. -- ފޮޓޯ | ރައީސް އޮފީސް
އެމަނިކުފާނު ވިދާޅުވި ގޮތުގައި އިގްތިސާދީ ހާލަތު އޮތް ގޮތުން އުނދަގޫ ފިޔަވަޅުތަކެއް އަޅަން ޖެހޭނެ އެވެ. ކެމްޕެއިން ދުވަސްވަރު ވައުދުވެވަޑައިގަތް ގޮތަށް ފައިސާ ޗާޕުކުރުން ހުއްޓާލުމަކީ އެމަނިކުފާނު އަދިވެސް ގަބޫލުކުރައްވާ ގޮތް ކަމަށާއި ފައިސާ ޗާޕުކުރުމަކީ ބޮލަށް ޖެހޭ ދަރަނި އިތުރުވެ އޭގެ ސަބަބުން ރައްޔިތުންނަށް އެތައް އުނދަގުލެއް ކުރާނެ ކަމެއް ކަމަށް ރައީސް ވިދާޅުވި އެވެ.
ރައީސް ވިދާޅުވީ ދުބާއީގައި އޮތް ބައްދަލުވުމުގައި އައިއެމްއެފްގެ މެނޭޖިން ޑިރެކްޓަރާ ބައްދަލުކުރެއްވި ކަމަށެވެ. ފައިސާ ޗާޕްކުރުން ހުއްޓާލުމުގެ ނިންމުމާ އެކު ވެސް އެ ބައްދަލުވުމުގައި ވެސް އެ ނިންމުމާ އެކު ވެސް ރާއްޖޭގެ އިގްތިސާދު ކުރިއަރާނެ ކަމަށް އައިއެމްއެފްގެ މެނޭޖިން ޑިރެކްޓަރު ވިދާޅުވި ކަމަށް ރައީސް ވިދާޅުވި އެވެ. "މާނައަކީ އިގްތިސާދު ދާނީ ކުރިއަށޭ. އެހެންވީމަ ރައްޔިތުންގެ ކިބައިން އަޅުގަނޑު އެދޭނީ މި މަސައްކަތަށް އިތުބާރުކުރެއްވުމަށް، މިކަން ކުރިއަށް ގެންދިއުމުގައި ފުރުސަތު ދެއްވައި އިތުބާރުކުރެއްވުމަށް. ތަރަައްގީ ކުރިއަށް ދާނެ. ލަހެއް ނުކުރާނަން،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ފައިސާ ޗާޕުކުރުން ހުއްޓާލުމާ އެކު އެކި ކަހަލަ ސަބްސިޑީތައް ދިނުން ރަނގަޅު ނިޒާމަކަށް ބަދަލުކޮށް އެންމެ ބޭނުންތެރި ފަރާތްތަކަށް އެކަން ހަމަޖައްސައި ރަނގަޅު އިންތިޒާމާކަށް އަންނަނީ މަސައްކަތް ކުރައްވަމުންނެވެ. އަދި ސަރުކާރު ކުންފުނިތަކުގައި ހުރި ދަރަނީގެ މައްސަލައަށް ވެސް ހައްލެއް ހޯއްދެވުމަށް މަސައްކަތް ކުރައްވަމުން އަންނަ ކަމަށް ރައީސް ވިދާޅުވި އެވެ.
ރައީސްގެ މި ދަތުރުފުޅުގައި އައްޑޫގެ އިތުރުން ފުވައްމުލަކާއި ގއ. އަދި ގދ.ގެ ބައެއް ރަށްތަކަށް ވަޑައިގެން ރައްޔިތުންނާ ބައްދަލުކުރައްވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަހުމަދުއަލޯ
19 February 2024
އެމްޑީޕީއިން ކުރި ހުރިހާ ވެރިކަމެއްގަ ތިމަމެންމެންނަކީ މާ މޮޑާން، ދުރުވިސްނޭ ބަޔަކަށް ހަދައިގެން ދިވެހިންނަށް މުޅިން ދޯކާ ދީފަ އޮތީ. ފެއްޓީ ޖީއެމްއާރުއިން. ދެން ތިއަޅަން އުޅޭ ބުރިޖު ނޭޅޭނެ ގިޔާމަތް ދުވަހު ހަވީރުވާއިރުވެސް. ބަލަން ތިބޭ!
ނާޑުވާ
19 February 2024
އަބަދުބެސް ކުރީ ސަރުކާރު. ކުރީ ސަރުކާރުން މި ޤައުމު އަރައިގަނެވޭނެބާ
އަބްސަލް މުހުސިން
19 February 2024
އަސްލުވެސް މިހާރުވެސް މުއިއްޒް ދުވެލީގައި ގޮސް ކަންކަން މިދަނީ. ތަރައްގީ މިދަނީ ހަލުވިކޮށް މިހާރު
އައްބާށް އަލީ
19 February 2024
ބަޔަކަށް ހީވެދާނެ މިސަރުކާރު ދަށޭ. ނޫން، ތާރީހުގައިވެސް 3 މަހުގަ އެއްމެ ކަންކަން ކުރި ވެރިކަމަކީ މި ސަރުކާރު. އަދު އެއްމެ ބިޔަ ޕްރޮޖެކްޓް ފެށި
ސާމް ނާފިޒް
19 February 2024
ހަގީގަތަކީ މިސަރުކާރަށް މިހާރު ދިމާވާ ދަތިތަކަކީވެސް ކުރީ ސަރުކާރުގެ ސަބަބުން އައި ދަތިތައް. މިހާރު މަޑުމަޑުން މުއިއްޒް ދަނީ އެކަމަކުން އަރައިގަންނަމުން
ރިޔާސާ އަލީ
19 February 2024
އިބޫ ވަނީ ހަގީގަތުގައިވެސް އަދަވަޅަކަށް ގައުމު ވައްޓާލާފަ. އެއީ ހަގީގަތަކީ
މަސީހުު
19 February 2024
އިބޫ މުޅި ދައުލަތް ދަވާލާފަ އެ ދިޔައީ. ގައުމަށް ކޮއްދިން ކަމެއް ނެތް ރައްޔިތުންގެ ލޯ މައްޗަށް ފެންނާކަށް. ހުސް ހުވަފެންތަކެއް. ބޮޑެތި ލޯނުތައް ނަގާފަ އަމިއްލަ ޖީބަށް ޖަހައިގެން އެ އޮތީ.
ނާފިއުު
19 February 2024
ރައީސް ޑރ މުއިއްޒު މި ގައުމަށް ތަރައްގީ ގެނެސްދެއްވާނެ ކަމާ މެދު އެއްވެސް ޝައްކެތް ނުކުރަން. މިގައުމު މިއޮތް ހާލަތުން ސަލާމަތް ކޮއްދެއްވާނެކަން ޔަގީން.
މިޒުއާން
19 February 2024
ވަގުތުން ވަގުތަށް ތަރައްގީއާ ގައުމުގެ ހާލަތު ނުދާނެ އަރައިގެނެއް. އެހެންވިޔަސް މި ގައުމު މިއޮތީ އަރައިގަންނަން ފަސޭހަ ހިސާބެއްގައެއް ނޫން. އަމިއްލަ ބޭނުމަށް މި ގައުމު ދަރުވާލީ އިބޫ. ރައީސް ޑރ މުއިއްޒު މި ގައުމު މިއޮތް އަނދަވަޅުން ސަލާމަތް ކޮއްދޭނެ.
އައިނަފް
19 February 2024
އިބޫ ނަގާފަ ހުރި ލޯނުތަކާ ޖައްސާފަ ހުރި ކަޓުތަކާ ހެދި މި ގައުމު މިއޮތީ ދިވެހި ތާރީހު ދުއް އެންމެ ފުން އަނދަވަށް ވެއްޓިފަ. އަދިވެސް އެއްޗެސް ތި ގޮވަނީ މި އަނދަވަޅުން މި ގައުމު ސަލާމަތްކޮއްދޭން އައިއްސަ ހުރި މީހާއާ ދިމމާއަށް.