ރައީސް ޓްރަމްޕާއި ނަތަންޔާހޫ ނޫސްވެރިންނާ ވާހަކަ ދައްކަވަނީ. --ފޮޓޯ:އޭއެފްޕީ
16 ފެބުރުއަރީ 2017 - 09:23
11 comments
ވޮޝިންޓަން (ފެބްރުއަރީ 16) - ދެ ދައުލަތް އުފައްދައިގެން ފަލަސްތީނު- އިޒްރޭލް މައްސަލަ އަށް ހައްލު ހޯދަން އެމެރިކާ އިން ޒަމާނުއްސުރެ ގެންގުޅުނު ސިޔާސަތު ރައީސް ޑޮނަލްޑް ޓްރަމްޕް ދޫކޮށްލައްވައިފި އެވެ.
އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫއާ އެކު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވަނީ މެދުއިރުމައްޗަށް ސުލްހަ ހޯދަން އާ ހުށަހެޅުންތަކެއް ހުށަހަޅުއްވާނެ ކަމަށް ވިދާޅުވެފަ އެވެ. އަދި ދެ ފަރާތުން ވެސް އެ ހުށަހެޅުމަށް ރުހެން ޖެހޭނެ ކަމަށް ޓްރަމްޕް ވިދާޅުވި އެވެ. ފަލަސްތީނުގެ މިނިވަން ދައުލަތެއްގެ ވާހަކަ ޓްރަމްޕް ވިދާޅުވެފައެއް ނުވެ އެވެ.
އިޒްރޭލާއި ފަލަސްތީނާ ދެމެދު 2014 ވަނަ އަހަރުން ފެށިގެން ސުލްހައިގެ ވާހަކަތައް ކުރިއަށް ގެންގޮސްފައެއް ނުވެ އެވެ.
މެދުއިރުމަތީގެ ސުލްހަ އަށް އެންމެ ބޮޑަށް ހުރަސްއަޅާ ކަންތަކަކީ ފަލަސްތީނުގެ ބިންތަކުގައި ޔަހޫދީންނަށް އިޒްރޭލުން ގެދޮރު އަޅަމުން ގެންދިއުމެވެ. ޓްރަމްޕް ވެރިކަމަށް ވަޑައިގެންނެވި ފަހުން އިޒްރޭލުން ވަނީ އިރުމަތީ ގުދުސް އާއި ހުޅަނގު އައްސޭރީގައި ޔަހޫދިންނަށް އެތައް ހާސް ގެއެއް އަޅަން ފާސްކޮށްފަ އެވެ.
ރައީސް ޓްރަމްޕް ނޫސްވެރިންނާ ވާހަކަ ދައްކަވަނީ. --ފޮޓޯ:އޭއެފްޕީ
ރައީސް ބަރަކް އޮބާމާގެ އަށް އަހަރުގެ ވެރިކަމުގައި އެމެރިކާއާ އެކު އޮތް ގުޅުމަށް ބުރޫތަކެއް އެރި ނަމަވެސް އިޒްރޭލުން އުއްމީދު ކުރަނީ ޓްރަމްޕުގެ ވެރިކަމުގައި ވައިޓްހައުސްއާ ވަރަށް ބޮޑަށް ގުޅުން ބަދަހި ކުރެވޭނެ ކަމަށެވެ.
ދެ ދައުލަތް އުފައްދައިގެން ސުލްހަ ހޯދުމަކީ 1967 ވަނަ އަހަރުގެ ހަނގުރާމައިގެ ކުރިން ފަލަސްތީނުގައި އޮތް ބިންތަކުގައި ފަލަސްތީނުގެ މިނިވަން ދައުލަތެއް އުފައްދާ އިޒްރޭލާ އެކު ސުލްހަވެރިކަމާ އެކު ދިރި އުޅުމެވެ. ޓްރަމްޕް ވެރިކަމަށް ވަޑައިގަތުމުގެ ކުރިން ދިޔައީ މި ސިޔާސަތަށް ތާއީދު ކުރަމުންނެވެ.
ދެ ދައުލަތް އުފެއްދުމާ ބެހޭ ގޮތުން ނަތަންޔާހޫ ވިދާޅުވީ ފަލަސްތީނުން ފުރަތަމަ ޖެހޭނީ އިޒްރޭލުގެ މިނިވަން ދައުލަތް ގަބޫލް ކުރަން ކަމަށެވެ. އަދި ސުލްހައިގެ ކޮންމެ އެއްބަސްވުމެއްގައި އިޒްރޭލަށް ސަލާމަތީ ގޮތުން ޔަގީންކަން ލިބިދީފައި އޮންނަން ޖެހޭނެ ކަމަށް ވިދާޅުވި އެވެ.
އިޒްރޭލުގެ ބޮޑު ވަޒީރު ނަތަންޔާހޫ ނޫސްވެރިންނާ ވާހަކަ ދައްކަވަނީ. --ފޮޓޯ:އޭއެފްޕީ
އެމެރިކާ އެމްބަސީ ތެލް އަވީވުން ގުދުސް އަށް ބަދަލު ކުރުމާ ބެހޭ ގޮތުން ޓްރަމްޕް ވެވަޑައިގެންފައިވާ އިންތިޚާބީ ވައުދާ ގުޅޭ ގޮތުން ސުވާލު ކުރުމުން ވިދާޅުވީ އެކަން އެގޮތަށް ވާން ބޭނުންވާ ކަމަށެވެ.
ވައިޓް ހައުސްގެ ސީނިއާ އޮފިޝަލަކު ވެސް ވިދާޅުވެފައި ވަނީ މެދުއިރުމައްޗަށް ސުލްހަ ހޯދޭނީ ހަމައެކަނި ފަލަސްތީނުގެ މިނިވަން ދައުލަތެއް އުފައްދައިގެން ނޫން ކަމަށެވެ.
މިއީ އެމެރިކާގެ ރައީސް ކަމަށް ޓްރަމްޕް ހޮވިވަޑައިގެންނެވި ފަހުން ނަތަންޔާހޫއާ އެކު ބޭއްވި ސީދާ ސީދާ ފުރަތަމަ ބައްދަލުވުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އައްޔު
17 February 2017
ތިތަނުގައި އިސްރާއީލް އޮންނާކަށް ނުޖެހޭނެ! ތިތާ އޮނނަންޖެހޭނީ ހަމައެކަނި ފަލަސްތީން މިނޫން ގޮތެއް ޓްރަމްޕްވިޔަސް ހަދައިގެންނުވާނެ ސަބަބަކީ މިބިމަކީ ފަލަސްތީން އަދި ފަލަސްތީންގެ ބިންކަމައްވާތީ އިސްރާއީލުންނަކީ އެތަނައް އަތްގަދަކޮށް ގަދަބާރުން އެބިން ހިފައިގެން ތިބިބައެއް އެހެންކަމުން އަދުލް އިންސާފުން އެއްކިބާވެގެން ފަލަސްތީން އަށް ގައުމީ އެއްބައިވަންތަކަމާ ގައުމެއްގެ ދަރަޖައިގެ ފުރުސަތު ނުދީ ކަންކަން ނިންމައިގެން ދުވަހަކުވެސް އެއްވެސް ބަޔަކަށް ފައިދާއެއްނުވާނެ. ޔަހޫދީން ބޭނުންވާގޮތް އެއީ ހަމައެކަނި ޓްރަމްޕް ގެ ވިސްނުން މިހެންމިކަމެއްނުވާނެކަން ވޭތުވެދިޔަ 60 އަހަރު ތެރޭގައި އިސްރޭލުން ކިތަންމެބާރު ދެއްކިޔަސް ކާމިޔާބުވިތަ؟
ޓްރަމްޕް
16 February 2017
ޓްރަމްޕްގެ ސިޔާސަތުތައް ހިންގާލަނިކޮށް މުޅިދުނިޔެ އަމާންވާނެޔޯ
އަހައްމަދު އަހައްމަދޭ
16 February 2017
އެމެރިކާގެރައީސަކު ކޮންމެހެން ދެ ދައުލައް ހެދުމުގެ ހިޔާލެއްގަ ހުންނާކަށް ނުޖެހޭ 1960 ގެ އަހަރުތަކުން އެމެރިކާގެ ރައިސްކަން ކުރެއްވި ހުރިހާވެރިންވެސް ގެންގުޅުނީ ހަމަ ހިޔާލެއް އޭގެތެރޭގަ ފޮރުވިފައޮންނަނީ އެހެންގޮތެއް އެގޮތައް އަމަލުކުރަމުން ގޮސް އިޒްރޭލު ކިޔާ ތަންކޮޅު ބޮޑުވަމުންގޮސް ފަލަސްތީނު ކިއުނު ބައްރު އެއްކޮއް އެއޮއްގެން ހުސްވަނީ އެހެންވީމަ ޑުރަމްޕް ތިޔަބުނި ވާހަކަ އަދި ގޯހެއްނޫން ،އެމެރިކާއަށް އިންސާފްވެރިކޮއް މުސްލިމުންގެ ކަންތަކެއް ކޮށެއްނުދެވޭނެ، އެދުވަސް އަންނާނީ މުސްލިމުންގެ ތެރެއިން އެދުވަސްނެރުނީމަ،
ޒާ
16 February 2017
ޓްރަންޕަކަށް ނޭނގޭނެ މުސްލިމުންގެ ބިންތަކުގައި ދައުލަތް އުފައްދަންވީމާ އުފައްދަން ވާގޮތާއި އަދި އުފައްދައިގެން ނުވާނެކަންވެސް. އެއީ މުސްލިމުންގެ ހައްގެއް. އެމެރިކާ އެހާ ބާރު ގަދަނަމަ މިހާރު އިޒްރޭލް މީހުން ބޭނުންވާގޮތަށް އެމައްސަލަ އޮތީހީ ނިމިފައި. އަހަރެމެން މުސްލިމުން ޓްރަމްޕްގެ ބަހައް ނުހެއްލޭނެ. އެކަމަށް ފުރުސަތުވެސް ނުދޭނެ. އަދި އެގޮތަށް އިޒްރޭލު ހިތްހަމަޖެހިގެން މުސްލިމުން ބިކަކޮށްފައި އިޒްރޭލް އޮަންނަށް ފުރުސަތެއް ނުދެވޭނެ. ޓްރަމްޕަށް ވަރަށް ބޮޑަށް އޮޅިގެން އުޅޭހެން ހީވަނީ. އެމެރިކާތެރޭގައި ތާއީދު ނެތް މީހެއް ދުނިޔޭގެ ބޮޑެތި މައްސަލަތައް ހައްލު ކުރާކަށް ނޭނގޭނެ.
ވިސްނާމީހާ.
16 February 2017
އިރާދަކުރެއްވިއްޔާ މާދުރުނޫން މުސްތަޤުބަލެއްގަ ފަލަސްޠީނުގަ އޮންނާނީ އެއް ދައުލަތް. އެއީ ފަލަސްޠީނުގެ ދައުލަތް އެކަނި. އިޒްރޭލަކީ ދައުލަތެއް ނޫން. ފޮރުއްޕާނެއް.
ފާތުމަ
18 February 2017
އިޒުރޭލުގަވެސް އުޅޭ މުސްލިމުން
ރުޅި
16 February 2017
ހާދަނުބައިމީހެކޭދޯ މިއީ. ތިޔަމީހާގަނޑުގެ ބާރު ﷲ ގެ އިރާދަފުޅުން އަވަސްފުރުޞަތެއްގައި ނެތިކުރައްވާށި.
ދިސްވޭ
16 February 2017
އިޒްރޭލް ފަލަސްތީނު މައްސަލަ އަށް އަންނާނީ އިރާނުން ފަލަސްތީނަށް ފާ ކޮށްގެން އުޅޭ ހަމާސް އާއި އަދި ހިޒްބުއްލާ އެތަނުން ފައްސާލައިގެން ނެވެ. ބާރުގެ ބޭނުން ކޮށްގެން ނަމަވެސް ހަމާސް އާއި ހިޒްބުއްލާ ފަލަސްތީނުން ފައްސާލާ ފަލަސްތީނުގެ ޑިފެންސް ގައި ތިބި ސިފައިންގެ ފަވްޖް ވަރުގަދަ ކުރަންވީއެވެ. މިނޫން އެއްވެސް ގޮތެއް މިކަމުގައި ނެތެވެ.
ދޮންދޮނާ
16 February 2017
އޭރުން އިޒުރޭލުން މުޅި ފަލަސްތީނައް ވެރިވެގަންނާނީ.
ހަޖަމް.
16 February 2017
ކަލޯގެ ސިކުނޑި ޓެސްޓުކުރަންފެނޭ.
ނޮޓް މީ
16 February 2017
ފަތަަހަ، ހިޒްބުﷲ، ހަމާސް ނެތް ނަމަ މިއަދަކު، ފަލަސްތީނުގެ ދައުލަތެއް އުފެއްދުމުގެ ވާހަކަވެސް ދައްކާކަށް ނުޖެހުނީސް. މުޅި އެ ސަރަހައްދު ވާނީ އިޒްރާއީލްގެ ދައުލަތަށް. ފަަލަސްތީނު ވާނީ މާޒީގެ ސޮފްހާއަކަށް.