ރާއްޖޭގެ ދެކުނުން އޮންނަ ޗާގޯސްގައި އެމެރިކާގެ އަސްކަރީ މަރުކަޒު ހިންގަން ދޫކޮށްފައި ޑިއެގޯ ގާސިއާ އިން ރާއްޖެއަށް ޗާޓަރު ފްލައިޓެއް މިއަދު އަޅައިފި އެވެ.
ޑިއެގޯ ގާސިއާ އިން ރާއްޖޭގެ މައި އެއާޕޯޓް ވެލާނާ އިންޓަނޭޝަނަލް އެއާޕޯޓަށް މި ދަތުރުކުރީ ރާއްޖޭގެ ފުރަތަމަ ލަގްޒަރީ އެއާލައިން "ބިއޯންޑު"ގެ ބޯޓެއްގަ އެވެ.
ވެލާނާ އިންޓަނޭޝަނަލް އެއާޕޯޓުގެ އެރައިވަލްސް މައުލޫމާތުގައިވާ ގޮތުން ބިއޯންޑުގެ "B4 3101" ފްލައިޓު ޑިއޭގޯ ގާސިއާއިން ފުރައިގެން އައިސް ރާއްޖެ ޖައްސާފައިވަނީ މިރޭ އިރާކޮޅު 07:14 ގަ އެވެ.
އަސްކަރީ މަރުކަޒުން ރާއްޖެއަށް މި ދަތުރުކުރި ސަބަބެއް، އަދި ޗާޓަރު ކުރީ ކޮން ބައެއް ކަމެއް ވެސް އަދި ސާފެއް ނުވެ އެވެ.
ނަމަވެސް، "ބިއޯންޑް" އިން މީގެ ކުރިން ވެސް އެކި ބޭނުންތަކަށް ފްލައިޓްތައް ޗާޓަރަށް ދޫކޮށްފައިވެ އެވެ. ސީރިއާގައި ތިބި ދިވެހިން ގެނައުމަށް ދިވެހި ސަރުކާރުން މީގެ ކުރިން ވެސް އެ އެއާލައިންގެ ފްލައިޓެއް ޗާޓަރު ކޮށްފައިވެ އެވެ.
ޑިއެގޯ ގާސިއާއަކީ އިންޑިއާ ކަނޑުގައި ރާއްޖޭގެ ދެކުނުން 500 ކިލޯ މީޓަރު ދުރުގައި އޮންނަ ޗާގޯސް އައިލެންޑްސްގައި ހިމެނޭ 60 ރަށުގެ ތެރެއިން އެއް ރަށެވެ.
މޮރިޝަސްއަށް މިނިވަންކަން ދިނުމަށް ފަހު އޭގެ ބަދަލުގައި އެ ގައުމާ ޗާގޮސްގެ ރަށްތައް ވަކިކޮށް އިނގިރޭސިންގެ ބާރު ހިނގާ ގޮތަށް ބަދަލުކުރުމަށް ފަހު 1970ގެ ތެރޭގައި ޗާގޮސްގެ ރަށްތަކުން ގަދަކަމުން މީހުން ބޭލުވި އެވެ. ޗާގޮސްގެ މައި އަތޮޅު ކަމަށްވާ ޑިއެގޯ ގާސިއާގައި އެމެރިކާގެ އަސްކަރީ މަރުކަޒު ހިންގަން އެތަން ފަހުން ކުއްޔަށް ދިނީ އެވެ.