ބޫލް ބުލައްޔާ 3: އެންމެންގެ ސަމާލުކަން ވިދްޔާއަށް

"ބޫލް ބުލައްޔާ 3"ގެ ލީޑު ރޯލުތައް ކުޅޭ ވިދްޔާ ބާލަން އާއި ކާތިކް އަރްޔަން.

28 ސެޕްޓެމްބަރ 2024 - 07:06

ބޮލީވުޑްގެ ހޮރޯ ކޮމެޑީ ފިލްމް ސީރީޒް "ބޫލް ބުލައްޔާ"ގެ ތިންވަނަ ފިލްމުގެ ޓީޒާ ޓްރެއިލާއެއް އިއްޔެ އާންމުކޮށްފި އެވެ.

ގާތްގަނޑަކަށް ދެ މިނެޓުގެ އެ ޓްރެއިލާ ޔޫޓިއުބްގައި އާންމުކުރުމާ އެކު ދިހަވަރަކަށް ގަޑިއިރުގެ ތެރޭގައި ވަނީ 10 މިލިއަނަށް ވުރެ ގިނަ ވިއުސް ލިބިފަ އެވެ. އަދި ގިނަ ބައެއްގެ ސަމާލުކަން އެންމެ ބޮޑަށް ލިބުނީ ފިލްމުގައި މުހިންމު ރޯލެއް ކުޅޭނެ ވިދްޔާ ބާލަން އަށެވެ.

ވިދްޔާއަކީ "ބޫލް ބުލައްޔާ"ގެ ފުރަތަމަ ފިލްމުގައި ވެސް، މި ފިލްމުގައި އުޅޭ ޖިންނި މޮންޖޮލިކާގެ ރޯލު ކުޅުނު ތަރި އެވެ. ތިންވަނަ ފިލްމުގައި ވެސް އޭނާ ކުޅެނީ ހަމަ އެ ރޯލެވެ.

"ބޫލް ބުލައްޔާ"ގެ ތިންވަނަ ފިލްމުގެ މަސައްކަތް މި ފިލްމުގެ އުފެއްދުންތެރިން ކަމަށްވާ އަނީސް ބަޒްމީ އާއި ބުޝަން ކުމާރް ފެށީ ފުރަތަމަ ދެ ފިލްމަށް ލިބުނު ތަރުހީބު ބޮޑުވުމާ އެކުގަ އެވެ.

ދެވަނަ ފިލްމުގައި ލީޑު އެކްޓަރުގެ ރޯލު ކުޅުނު ކާތިކް އަރްޔަން ތިންވަނަ ފިލްމުގައި ވެސް އުޅޭނެއިރު، ހާއްސަ ރޯލަކުން މަދޫރީ ވެސް ފެންނާނެ އެވެ. އަދި މުހިންމު ރޯލަކުން ތުރިޕްތީ ދިމްރީ ވެސް ފެންނާނެ އެވެ.

މި ފިލްމު ސިނަމާތަކަށް ގެންނަނީ އަންނަ ނޮވެމްބަރު މަހު އެވެ.