ކާޖޮލް އާއި ކްރިތީގެ "ދޯ ޕައްތީ" އަންނަ މަހު ނެޓްފްލިކްސްއަށް

"ދޯ ޕައްތީ"ގައި ލީޑު ރޯލު ކުޅޭ ކްރިތީ ޝެނޮން އާއި ކާޖޮލްއާ އެކު، ފިލްމުގެ ސްކްރީންޕްލޭ ލިޔުނު ކަނީކާ ދިލަން (ކ) އަދި ނެޓްފްލިކްސް އިންޑިއާގެ ނައިބު ރައީސް މޮނިކާ ޝެރްގިލް.-- ފޮޓޯ: ނެޓްފްލިކްސް

01 އޮކްޓޯބަރ 2024 - 05:56

3 comments

ކާޖޮލް އާއި ކްރިތީ ޝެނޮން ލީޑު ރޯލު ކުޅޭ ތުރިލާ ފިލްމް "ދޯ ޕައްތީ" އަންނަ މަހު 25 ގައި ގެނެސްދޭން ނިންމައިފި އެވެ.

ނެޓްފްލިކްސް އިން ވަނީ "ދޯ ޕައްތީ" ސްޓްރީމްކުރަން ފަށާ ދުވަސް އިއްޔެ އިއުލާންކޮށްފަ އެވެ.

މި ފިލްމަކީ ކާޖޮލް އާއި ކްރިތީ އެކުގައި ކުޅޭ ދެވަނަ ފިލްމެވެ. އެ ދެ ތަރިން އެކުގައި ކުޅުނު ފުރަތަމަ ފިލްމަކީ 2015 ވަނަ އަހަރު ގެނެސްދިން "ދިލްވާލޭ" އެވެ.

"ދޯ ޕައްތީ" ހާއްސަވާ އެހެން ސަބަބެއް ވެސް އެބައޮތެވެ. މިއީ ކްރިތީގެ އަމިއްލަ ޕްރޮޑަކްޝަން ހައުސް ބްލޫ ބަޓަފްލައި ފިލްމްސް އިން އުފައްދާ ފުރަތަމަ ފިލްމެވެ.

މިސްޓްރީ ތުރިލާ މި ފިލްމުގައި ކާޖޮލް ކުޅެނީ ފުލުހެއްގެ ރޯލެވެ. އަދި ކްރިތީ ކުޅެނީ ޑަބަލް ރޯލެކެވެ.

ހިންދީ ޑްރާމާތަކުގައި މަޝްހޫރު އެކްޓަރު ޝަހީރް ޝެއިހް ވެސް "ދޯ ޕައްތީ"ގައި މުހިންމު ރޯލެއް ކުޅެ އެވެ. އަދި މިއީ އޭނާ ކުޅޭ ބޮލީވުޑްގެ ފުރަތަމަ ފިލްމެވެ.

މުހިންމު ރޯލުތަކުން ދެން ފެންނާނީ ބްރިޖެންދަރު ކާލާ އާއި ތާންވީ އަޒްމީ އެވެ.

"ހަސީން ދިލްރުބާ" އާއި "މަންމަރްޒިޔާ" އަދި "ރާވަން" ކަހަލަ މަޝްހޫރު ފިލްމުތައް ލިޔުނު ކަނިކާ ދިލަންގެ ސްކްރީޕްލޭއަކަށް ހަދާ މި ފިލްމުގެ ޑައިރެކްޓަރަކީ ޝަޝަންކާ ޗަތުރްވޭދީ އެވެ.