ރޫޕޭ ކާޑުގެ ހިދުމަތް ފެށުމުން ރުޕޭ ކަސްޓަމަރުންނަށް ވަރަށް ފަސޭހަވާނެ: ބީއެމްއެލް

ރާއްޖޭގައި ރޫޕޭ ކާޑުގެ ހިދުމަތް ފެށުމުން ރޫޕޭގެ ކަސްޓަމަރުންނަށް ވަރަށް ބޮޑަށް ދެން ފަސޭހަވާނެ ކަމަށް ބީއެމްއެލް އިން މިއަދު ބުނެފި އެވެ.

ބީއެމްއެލް އިން ނެރުނު ނޫސްބަޔާނެއްގައި ބުނީ އެ ބޭންކުގެ އޭޓީއެމް އަދި ޕީއޯއެސް ޓާމިނަލްތަކުގައި ރޫޕޭ ކާޑު ބޭނުންކުރެވޭނެ ގޮތް މިހާރު ހަމަޖައްސާފައިވާ ކަމަށެވެ.

ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި)ގެ ޕްރޮޑަކްޓެއް ކަމަށްވާ ރޫޕޭއަކީ މިހާރު 300 މިލިއަނަށް ވުރެ ގިނަ މީހުން ބޭނުންކުރާ އިންޑިއާގެ ފުރަތަމަ ގްލޯބަލް ކާޑު ޕޭމަންޓް ނެޓްވޯކެވެ.

ރޫޕޭ ކާޑު ރާއްޖޭގައި ބޭނުންކުރެވޭ ގޮތް ހަދާފައި ވަނީ ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، ދެ ގައުމުގެ ރަސްމީ މަޝްވަރާތަކަށް ފަހު މިއަދު ބޭއްވި ރަސްމިއްޔާތުގަ އެވެ. އެ ރަސްމިއްޔާތުގައި ވަނީ ރާއްޖޭގައި ރޫޕޭ ކާޑުގެ ފުރަތަމަ ޓްރާންސެކްޝަން ހެދި މަންޒަރު ލައިވްކޮށް ދައްކާލައިފަ އެވެ.

މި ހިދުމަތް ފެށުމާ ގުޅޭ ގޮތުން ބީއެމްއެލްގެ ރީޓެއިލް، ބިޒްނަސް އެންޑް އެސްއެމްއީ ބޭންކިންގެ ޑައިރެކްޓަރު މޫސާ ނިމާލް ވިދާޅުވީ ރާއްޖޭގައި ރޫޕޭ ކާޑު ބަލައިގަތުން މަގުފަހިކުރުމަށް އެންޕީސީއައިއާ އެކު ބައިވެރިވެވުމަކީ އެ ބޭންކަށް ލިބޭ ވަރަށް ބޮޑު އުފަލެއް ކަމަށެވެ.

"އިންޑިއާގެ ރީޓެއިލް ޕޭމަންޓް ސިސްޓަމްތަކަށް ރޫޕޭގެ ސަބަބުން ފާހަގަކޮށްލަންޖެހޭ ފަދަ ބޮޑު ބަދަލެއް އައިސްފައިވާއިރު، ރާއްޖޭގެ އެންމެ ފުޅާ ބޭންކިން ނެޓްވޯކްގައ،ި ބޭންކް އޮފް މޯލްޑިވްސް އިން ރޫޕޭ ކާޑުގެ ހިދުމަތް ދޭން ފެށުމާ އެކު ރޫޕޭ ކަސްޓަމަރުންނަށް ފައިސާ ދެއްކުން ވަރަށް ބޮޑަށް ފަސޭހަވެގެންދާނެ،" އޭނާ ވިދާޅުވި އެވެ.

މުޅި ރާއްޖެ ހިމެނޭ ބޭންކިން ވިއުގައާ އެކު 20 އަތޮޅުގައި 39 ބްރާންޗް، 88 ސެލްފް ސާވިސް ބޭންކިން ސެންޓަރު، 143 އޭޓީއެމް، 7،000 އަށް ވުރެ ގިނަ މާޗަންޓުންނާއި ކޭޝް އޭޖެންޓުގެ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިންގެ ހިދުމަތާ އެކު ބޭންކުގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލްގެ ބަޔާނުގައި ބުންޏެވެ.

ރާއްޖެއަށް ރޫޕޭ ކާޑު ތައާރަފްކުރުމަކީ އެ ގައުމުން ރާއްޖެ އަންނަ ޓޫރިސްޓުންނަށް ފައިސާގެ މުއާމަލާތް ކުރުމުގައި ލިބޭނެ ވަރަށް ބޮޑު ލުޔެއް ކަމަށް ސަރުކާރުން ވަނީ ބުނެފަ އެވެ.