ޓައިވާންގެ ކޯސްޓް ގާޑުން އާންމުކުރި މި ފޮޓޯގައި ފާހަގަކޮށްފައި އެ ވަނީ ޗައިނާގެ ކޯސްޓް ގާޑު އުޅަނދުތައް ޓައިވާން ކައިރިއަށް ދަތުރުކުރަމުން އަންނަ މަންޒަރު
14 އޮކްޓޯބަރ 2024 - 09:20
4 comments
ޗައިނާއިން ޓައިވާން ވަށައިގެން މަތިންދާބޯޓުތަކާއި މަނަވަރުތައް ރުކުރުވާލައި އަސްކަރީ ހަރަކާތްތަކެއް ފެށުމަށް ފަހު މިއީ ވަކިވެގަތުމަށް މަސައްކަތްކުރާ މީހުންނަށް ދޭ "ހަރުކަށި އިންޒާރެއް" ކަމަށް ބުނެފި އެވެ.
ޗައިނާއިން އެ ގައުމުގެ ބައެއްގެ ގޮތުގައި ބަލަމުން އަންނަ ޓައިވާންގެ ކޮންޓްރޯލް ހޯދުމަށް ބާރުގެ ބޭނުން ނުކުރާނެ ކަމަކަށް ނުބުނެ އެވެ. އަދި މި ފަހަރު ދިން އިންޒާރާ އެކު އިއްޔެ ފެށި ޑްރިލް އަކީ ވޭތުވެދިޔަ ދެ އަހަރުގެ ތެރޭގައި ބާއްވާ މިފަދަ ބޮޑު ހަތަރު ވަނަ ޑްރިލް އެވެ.
ޗައިނާގެ ޑްރިލް ފެށީ ޓައިވާންގެ ރައީސް ލާއި ޗިންގ-ތޭ އެ ގައުމީ ދުވަހުގެ މުނާސަބަތުގައި ދެއްކި ވާހަކައަށް ފަހުގަ އެވެ. މެއި މަހު މަގާމާ ހަވާލުވެ ވަޑައިގަތް ލާއި އަކީ ކުރީގެ ރައީސް ޓްސާއި އިންގް-ވެންއަށް ވުރެ ހަރުކަށިކޮށް ޓައިވާންގެ މިނިވަންކަން ދިފާއުކުރުމަށް ވާހަކަ ދައްކަވާ ބޭފުޅެކެވެ. މިކަމާ ޗައިނާ ރުޅި ގަދަވެ އޭނާއަކީ "ވަކިވެގަތުމަށް މަސައްކަތްކުރާ މީހެއް" ކަމަށް ވަނީ ބުނެފަ އެވެ.
ބުރާސްފަތި ލާއި ވަނީ ޓައިވާން "އަތުލައިގަތުމަށް ދެކޮޅުހަދާނެ" ކަމަށާއި ތައިޕޭ އަކީ "އެއްބަޔަކު އަނެއް ބައެއްގެ ދަށުވެފައިވާ" ދެ ތަން ނޫން ކަމަށް ވިދާޅުވެފަ އެވެ. މި ވާހަކައަށް ފަހު ޗައިނާއިން ވަނީ "ރުޅިއެރުވުންތަކުގެ" ނަތީޖާ ނުރައްކާވާނެ ކަމަށް ބުނެ އިންޒާރު ދީފަ އެވެ.
ރައީސްގެ ވާހަކައާ ގުޅިގެން އެއްވެސް ފިޔަވަޅެއް ނޭޅުމަށް އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކަން ޗައިނާއަށް އޮތީ އިންޒާރު ދެއްވައިފަ އެވެ.
ޓައިވާންގެ ފައިޓަ ޖެޓެއް މިއަދު އެއާ ބޭސްއެއްގައި ޖައްސަން އަންނަނީ. -- ފޮޓޯ: އޭއެފްޕީ
ޗައިނާގެ އަމަލުތަކަކީ ޓައިވާން ރުޅިއެރުވުމަށް ހިންގާ ހާލަތާ އެކަށީގެންނުވާ އަމަލުތަކެއް ކަމަށް ބުނެ އެކަން ޓައިވާނުން ވަނީ ކުށްވެރިކޮށްފަ އެވެ.
ޗައިނާއިން ބުނީ މި ހަރަކާތަކީ ޓައިވާނުން ހިންގާ "ވަކިވެގަތުމުގެ އަމަލުތަކުގެ ފަހަތުގައި" ތިބި މީހުންނަށް ދޭ ހަރުކަށި އިންޒާރެއް ކަމަށެވެ.
"ޖޮއިންޓް ސްވޯޑް-2024ބީ" ގެ ނަމުގައި ކުރިއަށްދާ މި ޑްރިލްގައި "ސިފައިން އެކުގައި މަސައްކަތްކުރުމުގެ ގާބިލުކަން ޓެސްޓުކުރެވޭނެ" ކަމަށް ޗައިނާގެ އިރުމަތީ ސަރަހައްދުގެ ކޮމާންޑުގެ ތަރުޖަމާނު ކެޕްޓަން ލީ ޒީ ވިދާޅުވެފައިވެ އެވެ. އޭނާ ވިދާޅުވި ގޮތުގައި މި ހަރަކާތްތައް ކުރިއަށްދަނީ ޓައިވާންގެ އުތުރާއި، ދެކުނާއި، އިރުމަތީ ސަރަޙައްދުތަކުގަ އެވެ.
ޗައިނާގެ ކޯސްޓް ގާޑުން ވެސް ޓައިވާންގެ ވަށައިގެން "ބަލައި ފާސްކުރުމުގެ" މަސައްކަތްތަކެއް ކުރަމުން އަނަން ކަމަށް ވަނީ ބުނެފަ އެވެ.
ފަހަކަށްއައިސް ޗައިނާއިން ވަނީ ޓައިވާންގެ ވަށައިގެން އަސްކަރީ ހަރަކާތްތައް އިތުރުކޮށްފަ އެވެ. -- އޭއެފްޕީ
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ތަކުރުބެއްޔާ
15 October 2024
މިކަހަލަ ކޮންމެތަނަކަށް އެމެރިކާ ވަންނާނެ.. މުޅި ދުނިޔެ ފަސާދަކުރަމުން ދުވާ ބައެއް އެމެރިކާ އަކީ.. ޑިމްކޮރަސީ އޭ ހިއުމަން ރައިޓޭ ކިޔަފާ އަބަދު ކޮންމެވެސް ބައެއް ލައްވާ ހަނގުރާމަ ކުރުވަން އުޅޭނީ..
އިސްމާލި
14 October 2024
ޗައިނާއަށް ޓައިވާން އަކީ ރަޝިޔާއަށް ޔޫކްރެއިން ކަހަލަ ތަނެއް. ދެ ތަނުގައިވެސް އެމެރިކާ ގެ ޕަޕެޓު ރެޖީމް އިންދައިގެން، އެމެރިކާގެ މިލިޓަރީ ބައިތިއްބައިގެން ޗައިނާ އަދި ރަޝިއާއަށް ބިރުދައްކައި ފާރަލައި ޖެއްސުންކުރުމަށް ބޭނުންކުރާ ތަންތަން. ރަޝިޔާއިން ޔޫކްރެއިން އާދި ދެކޮޅަށް ހަނގުރާމަ ކުރިހެން ޗައިނާވެސް ކަންތައް ކުރަން އެބަ ޖެހޭ.
ލެއްގިކޮމިޝަނަރ
15 October 2024
ރަސިޔާއިން ޔުކުރޭނަށް އެރީމުން ވީގޮތްއެހުރީ ފެންނަން. 48 ގަޑިއިރުތެރޭ ޔުކުރޭންހިފާ ހަނގުރާމަ ނިއްމާލާނެކަމަށް ބުނެ ފޮނިކެޑި މީހުނަށް އެއުޅެނީ 3 އަހަރު ވާއިރުވެސް މިކަމުން ސަލާމަތްނުވެގެން. ގައުމުގަ ހުރި ހަތިޔާރު ހުސްވެގެން އިރާނާ އުތުރު ކޮރެއާއިން ހަތިޔާރު ހޯދަންވެސް ޖެހިއްޖެ. ހަނގުރާމަ ހުއްޓާލަން ބޭނުންވިޔަސް ދުނިޔޭގެ ލަދަށް އެކަން ކިރެވޭކަށްނެތް. ބޮޑުބާރުގެ ލަގަބު ގެއްލިދާނެތީ. ހަނގުރާމަވެސް ކުރެވޭކަށްނެތް ހަތިޔާރުތައް ހުސްވާތީ.
އީމަން
14 October 2024
ޗައިނާ، ޓައިވާން އެކީ އެކައްޗެށާް. ޗައިނާ އާމުނަށް ޗައިނީސް ކިޔާއިރު ޓައިވާންގެ އާމުން ބުނަނީ އަހަމެން ނަށް ކިޔަނީ ވެސް ޗައިނީސް. އެމެރިކާ އިގްތިސޯދު ބިނާވެފައޮތީ މަރަށް. އިތުރު ހަންގުރާމަ އެށް ނުފެސިގެން އެ މަސަކަތް ކުނީ.