ޝަހުމް މަރަން ހުކުމްކުރި މައްސަލަ ދެ އަހަރު ފަހުން ސުޕްރީމް ކޯޓުން ފަށަނީ

މީގެ 12 އަހަރު ކުރިން މާލޭގައި ތޫނު އެއްޗަކުން ހަމަލާދީ މީހަކު މަރާލި މައްސަލާގައި ކުށް ސާބިތުވި އިބްރާހިމް ޝަހުމް އާދަމް މެރުމަށް ހައި ކޯޓުން ކުރި ހުކުމުގެ މައްސަލަ ދެ އަހަރު ފަހުން ސުޕްރީމް ކޯޓުގައި ފަށަން ތާވަލްކޮށްފި އެވެ.

ޝަހުމް މެރުމަށް ކުރި ހުކުމުގެ ސައްހަކަން ކަށަވަރުކުރަން ދައުލަތުން ސުޕްރީމް ކޯޓަށް ހުށަހެޅީ 2022 ވަނަ އަހަރު އެވެ. ހުކުމުގެ ސައްހަކަން ކަށަވަރުކުރަން ދައުލަތުން ހުށަހަޅާނީ ކުށްވެރިޔާގެ ފަރާތުން އެ މައްސަލަ އިސްތިއުނާފް ނުކުރުމުންނެވެ.

މި މައްސަލާގެ ފުރަތަމަ އަޑުއެހުން ބާއްވަން ސުޕްރީމް ކޯޓުން ތާވަލުކޮށްފައިވަނީ އަންނަ މަހުގެ ހަތަރު ވަނަ ދުވަހުގެ ހެނދުނު 10:00 އަށެވެ.

އެ މައްސަލަ ސުޕްރީމް ކޯޓުން ބައްލަވަނީ ފަނޑިޔާރު ޑރ. މުހައްމަދު އިބްރާހިމާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު ހުސްނުއްސުއޫދު އަދި ފަނޑިޔާރު އަލީ ރަޝީދު ހުސައިންނެވެ.

Shahum maran kuri hukum kashavaru kuran dhaulathun SC ah

The most trusted news source in the Maldives

Mihaaru

މަޖީދީމަގާއި އަލިކިލެގެފާނު މަގު ގުޅުނު ހިސާބުގައި 2011 ވަނަ އަހަރު ސ. ހިތަދޫ ވަރުދީގޭ އަހުސަން ބަޝީރަށް ހަމަލާދީ އޭނާ މަރާލި މައްސަލާގައި އިބްރާހިމް ޝަހުމް އާދަމް މެރުމަށް ހައި ކޯޓުން 2021 ވަނަ އަހަރު ފަހުކޮޅު ހުކުމްކުރީ އެ ހަމަލާއަށްފަހު އަހުސަން މަރު މަތީގައި އޮވެގެން ބުނި ބަހަށް ބުރަދަން ދީގެންނެވެ. އެއީ މަރު މަތީގައި އޮވެގެން ބުނި ބަސް (ޑައިން ޑިކްލަރޭޝަން) ރާއްޖޭގެ ކޯޓަކުން ހެއްކެއްގެ ގޮތުގައި ބަލައިގަތް ފުރަތަމަ މައްސަލަ އެވެ.

ޝަހުމްގެ އިތުރުން މއ. ވީނަސްތަރި ހަސަން ޝިމާޒް މުހައްމަދު ސުވާދުގެ މައްޗަށް 15 އަހަރުގެ ޖަލު ހުކުމެއް ވެސް މި މައްސަލާގައި ހައި ކޯޓުން އިއްވި އެވެ. އެއީ އަހުސަން މަރާލުމުގައި ޝަހުމަށް އެހީތެރިވެދިން ކަމުގެ ކުށުގަ އެވެ.

Maru matheegai bunaa bas varugadha hekkakah: Thaareekhee nimmumeh!

The most trusted news source in the Maldives

Mihaaru

ޝަހުމްގެ މައްޗަށް މަރުގެ ހުކުމް އައިއިރު އޭނާ ގެންދަނީ މަރުގެ އެހެން މައްސަލައެއްގައި އުމުރު ދުވަހުގެ ޖަލު ހުކުމެއް ވެސް ތަންފީޒު ކުރަމުންނެވެ. އެއީ 2010 ވަނަ އަހަރު މާފަންނު ޔޫތު ސެންޓަރު ކައިރީގައި ތޫނު އެއްޗަކުން ހަމަލާދީ މީހަކު މަރާލި މައްސަލާގައި ކުރި ޓެރަރިޒަމްގެ ދައުވާ ސާބިތުވެގެންނެވެ.

އެ މައްސަލާގައި ތުހުމަތުގައި ޝަހުމް ހައްޔަރުކޮށްފައި ހުއްޓާ 2011 ވަނަ އަހަރު ކްރިމިނަލް ކޯޓުން އޭނާ ބަންދުން ދޫކޮށްލީ ހެލްތު މިނިސްޓްރީގެ ލިޔުމެއް ނުލިބޭތީ އޭރުގެ ހެލްތު މިނިސްޓަރު ޒިންމާދާރު ކުރަން ކަމަށް ބުނެ އެވެ. އޭނާ ދޫކޮށްލިތާ ދުވަސްކޮޅެއް ވީތަނާ، އަހުސަނަށް ހަމަލާދީ މަރާލުމަށްފަހު ފިލައިގެން އުޅެނިކޮށް އޭނާ ހައްޔަރުކުރީ ފަޅު ރަށަކުންނެވެ.