ކުޑަގިރި ފަރަށް އެރި ބޯޓުގެ ޖޫރިމަނާ ދައުލަތަށް ދައްކަން ހުކުމްކޮށްފި

ކ. އަތޮޅު ތިލަފުށީގެ ކުޑަގިރި ފަރަށް އެރި އިންޑިއާގެ ބޯޓަށް ކޮށްފައިވާ ތިން މިލިއަން ރުފިޔާގެ ޖޫރިމަނާގެ ފައިސާ 14 ދުވަސް ތެރޭގައި ދައުލަތަށް ދެއްކުމަށް ސިވިލް ކޯޓުން އެ ބޯޓުގެ ވެރިފަރާތުގެ މައްޗަށް މިއަދު ހުކުމްކޮށްފި އެވެ.

"އޭއެމް އެމްއެސްވީ މަރިޔާ ސިންތަޔަތިރައި ރިޔަނަ" ނަމަކަށް ކިޔާ ބޯޓު ކުޑަގިރި ފަރަށް އެރީ މިދިޔަ އަހަރުގެ ޖެނުއަރީ 31 ގަ އެވެ. އެ މައްސަލާގައި އީޕީއޭއިން ވަނީ އެ ބޯޓުގެ ވެރިފަރާތް ތިން މިލިއަން ރުފިޔާއިން ޖޫރިމަނާކޮށްފަ އެވެ.

ނަމަވެސް، އެ ފައިސާ ދައްކަން ދިން މުއްދަތުގައި ބޯޓުގެ ވެރިފަރާތުން ފައިސާ ދައްކާފައި ނުވާތީ ދައުލަތުން ވަނީ އެ ބޯޓުގެ ވެރިފަރާތާއި ބޯޓުގެ ރާއްޖޭގެ އޭޖެންޓާ ދެކޮޅަށް ދައުވާކޮށްފަ އެވެ. އެ ބޯޓުގެ ވެރިފަރާތަކީ އިންޑިއާގެ ކުންފުންޏެއް ކަމަށްވާ އެސްއެމްޓީ. ޓ. ޖެސިންތަ އެވެ. އަދި ރާއްޖޭގެ އޭޖަންޓަކީ ބިގް ވޭވް ޕްރައިވެޓް ލިމިޓެޑެވެ.

މި މައްސަލާގައި ސިވިލް ކޯޓުން ހުކުމް އިއްވާފައި ވަނީ ދައުވާ ލިބޭ ފަރާތްތަކުގެ ޣައިރުހާޒިރުގަ އެވެ. އެއީ ދައުވާ ލިބޭ ފަރާތްތަކަށް ކޯޓުން ދައުވާގެ ލިޔެކިޔުންތައް ހަވާލުކުރި ނަމަވެސް ޖަވާބެއް ހުށަހަޅާފައި ނުވާތީ ކަމަށް ހުކުމުގައިވެ އެވެ.

އެހެންވެ، ކޯޓުން މިއަދު ހުކުމްކުރީ އެ ބޯޓުގެ ވެރިފަރާތުން މިއަދުން ފެށިގެން 14 ދުވަހުގެ ތެރޭގައި، ޖޫރިމަނާއަށް ވާ 3،098،710ރ. ދައުލަތަށް ދެއްކުމަށެވެ.

އީޕީއޭއިން ކުރިން ބުނެފައިވާ ގޮތުގައި، އެ ބޯޓު ފަރަށް އެރުމުގެ ސަބަބުން 130 އަކަމީޓަރުގެ ސަރަހައްދަކަށް އެކިވަރުގެ ގެއްލުން ލިބިފައިވާކަން ބޯޓުގެ ވެރިފަރާތުން ހިއްސާ ކޮށްފައިވާ ސާވޭ ރިޕޯޓުން ވެސް ފާހަގަވެ އެވެ.