ޝަހީދުންގެ އާއިލާތަކަށް އަލުން އެލަވެންސް ދީ، ބޯހިޔާވަހިކަން ހަމަޖައްސަނީ

ސިފައިންނާއި ފުލުހުންގެ ތެރެއިން ޝަހީދުވި މީހުންގެ އާއިލާތަކަށް އެލަވަންސެއް ހަމަޖައްސައި އެ އާއިލާތަކަށް ހާއްސަކޮށްގެން ބޯހިޔާވަހިކަމުގެ މަޝްރޫއެއް ފަށަން ނިންމައިފި އެވެ.

ނަސްރުގެ ދުވަސް ފާހަގަކުރަން ދަރުބާރުގޭގައި މިރޭ ބޭއްވި ރަސްމީ ޖަލްސާގައި ރައީސް ޑރ. މުހައްމަދު މުއިއްޒު ވިދާޅުވީ ނޮވެމްބަރު 3، 1988 ގައި ދިން ހަމަލާގައި ސިފައިންގެ އަށް މީހަކާއި އާއްމުންގެ 11 މީހަކު ޝަހީދުވެ އަދި ފާއިތުވި 40 އަހަރުގެ ތެރޭގައި އެކި ފަހަރުމަތިން ސިފައިންގެ 29 މީހަކާއި ފުލުހުންގެ ދެ މީހަކު ނިޔާވިއަސް އެ މީހުންގެ އަގުވަޒަންކުރަން ސަރުކާރުތަކުން އެއްވެސް ކަމެއް ނުކޮށްދޭ ކަމަށެވެ.

މި ފަހަކަށް އައިސް ޝަހީދުވި އާއިލާތަކުގެ އަގުވަޒަންކުރަން އެއްވެސް ކަމެއް ކޮށްދީފައިނުވާ ކަމަށާއި އެ އާއިލާތަކަށް މީގެ ކުރިން ކޮންމެވެސް ވަރެއްގެ އެލަވަންސެއް ދިނަސް ފަހުން އެކަން ވެސް ހުއްޓިފައިވާ ކަމަށް ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، އެއީ އެ އާއިލާތަކަށް ވެވޭ ވަރަށް ބޮޑު ބޭ އިންސާފެކެވެ.

ނަސްރުގެ ދުވަސް ފާހަގަކުރަން މިރޭ ބޭއްވި ޖަލްސާގައި ރައީސް ޑރ. މުއިއްޒު ވާހަކަފުޅުދައްކަވަނީ.-- ފޮޓޯ: ރައީސް އޮފީސް

އެހެންވެ، މި ސަރުކާރުން ވަނީ، ވަކި އުސޫލެއް ހަދައި، ޝަހީދުވި އާއިލާތައް އަދި އެ ދުވަހު ކުރި މަސައްކަތުގެ އަގުވަޒަންކޮށް މެޑަލް ލިބުނު ބޭފުޅުން ހިމެނޭހެން، އެ އެންމެންނަށް ދެމެހެއްޓެނިވި ގޮތެއްގައި އެލަވަންސް ލިބޭނެ ގޮތް ހަމަޖައްސަން ނިންމައިފަ އެވެ.

އޭގެ އިތުރުން ބޯހިޔާވަހިކަން ފޯރުކޮށްދޭނެކަން އިއުލާންކުރެއްވިއަސް، ހައުސިން ޔުނިޓުތައް އަޅާނެ ތަނެއް އަދި ވިދާޅެއް ނުވެ އެވެ.

"އަންނަ އަހަރުން ފެށިގެން، ޝަހީދުވި އާއިލާތަކާއި 3 ނޮވެމްބަރުގެ މެޑަލް ފޯ އެކްސެޕްޝަނަލް ބްރޭވަރީ މެޑަލް ލިބުނު ފަސް ފަރާތާއި މެޑަލް ފޯ ބްރޭވަރީ ލިބިފައިވާ 10 ފަރާތް ހިމެނޭހެން، މި ހުރިހާ ފަރާތަކަށް ކަނޑައެޅޭ، ގެޒެޓުކުރެވޭ އުސޫލެއްގެ މަތިން ސަރުކާރުން ދެމެހެއްޓެނިވި ގޮތެއްގައި ހާއްސަ އެލަވަންސެއް ދޭނެ ވާހަކަ އަޅުގަނޑު ދަންނަވަން،" ރައީސް ވިދާޅުވި އެވެ.

"ޝަހީދުވި އާއިލާތަކަށް ހާއްސަކޮށް، ޝަހީދުވި ފަރާތްތަކަށް ހާއްސަކުރެވިގެން ހައުސިން ޕްރޮގްރާމެއް، 'ޝަހީދުންގެ ހިޔާ'ގެ ނަމުގައި 50 ހައުސިން ޔުނިޓު ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމާ މި އާއިލާތަކާ ހަވާލުކުރާނަން."

ރައީސް ވިދާޅުވީ ސަރުކާރުތަކުން ކޮންމެ ކަމެއް ކޮށްދިނަސް އާއިލާތަކުން ކަޑައްތުކުރާ ހިތާމައެއް އަނބުރާ ނުދެވޭނެ ކަމަށެވެ. އަދި އެ އަބްތާލުން ކުރެއްވި ޖިހާދުގެ އަގު ވަޒަން ނުކުރެވުނަސް އެ ވަރު އެންމެ ކުޑަމިނުން ކޮށްދެވެން ޖެހޭނެ ކަމަށް ގަބޫލުކުރައްވާ ކަމަށް އެ މަނިކުފާނު ވިދާޅުވި އެވެ.