އިންޑިއާއިން ރާއްޖެއަށް ކަނޑައަޅާ އާ ސަފީރުގެ މަގާމަށް ޖީ ބާލާސުބްރަމާނިއަން ހަމަޖައްސައިފި އެވެ.
އިންޑިއާ ސަފީރުގެ މަގާމުގައި މިހާރު ހުންނެވީ ނޮވެމްބަރު، 2021 އެ މަގާމަށް އައްޔަން ކުރެއްވި މުނޫ މަހާވަރެވެ. އޭނާގެ ދައުރު މިމަހު ހަމަވާނެ އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުނީ މިވަގުތު ނައިޖީރިއާގެ ސަފީރު ކަމުގައި ހުންނެވި ބާލާސުބްރަމާނިއަން ރާއްޖެއަށް ކަނޑައަޅާ ސަފީރަކަށް ހަމަޖައްސާފައިވާ ކަމަށެވެ. އަދި ވަރަށް އަވަހަށް މަގާމުގެ މަސްއޫލިއްޔަތުތަކާ އޭނާ ހަވާލުވެވަޑައިގަންނަވާނެ ކަމަށެވެ.
ބާލާސުބްރަމާނިއަނަކީ 1998 ވަނަ އަހަރުން ފެށިގެން އިންޑިއާގެ ހާރިޖީ ދާއިރާގައި މަސައްކަތް ކުރައްވަމުން އަންނަ ބޭފުޅެކެވެ.
އޭނާ ވަނީ މޮސްކޯ އާއި ބެންކޮކުގައި ހުންނަ އިންޑިއަން މިޝަންގެ ޑެޕިއުޓީ ޗީފްގެ މަގާމު ވެސް އަދާ ކުރައްވައިފަ އެވެ. އަދި ޔުނައިޓެޑް ނޭޝަންސް އިކޮނޮމިކް އެންޑް ސޯޝަލް ކޮމިޝަން ފޯ އޭޝިއާ އެންޑް ދަ ޕެސިފިކްގައި އިންޑިއާގެ ޑެޕިއުޓީ ޕާމަނެންޓް ރިޕްރެޒެންޓޭޓިވް އަކީ ވެސް ބާލާސުބްރަމާނިއަން އެވެ.
އިންޑިއާ އާއި ރާއްޖޭގެ ގުޅުން ބަދަހި ކުރުމުގެ މަސައްކަތް ދެ ގައުމުގެ ސަރުކާރުން ކުރަމުން އަންނައިރު އިންޑިއާގެ އެހީގައި ގިނަ މަޝްރޫއުތަކެއް ވެސް ރާއްޖޭގައި ދަނީ ހިންގަމުންނެވެ.