ރައްޔިތުންގެ މަޖިލީހުގެ މި އަހަރުގެ ތިން ވަނަ ދައުރު، އަންނަ މަހުގެ 15އާ ހަމައަށް ދަންމާލައިފި އެވެ.
ދައުރު ދަންމާލަން ފާސްކުރީ މިއަދުގެ ޖަލްސާގައި 68 މެންބަރުންގެ ވޯޓުންނެވެ. ދެކޮޅަށް 11 މެންބަރަކު ވޯޓު ދެއްވި އެވެ.
ދައުރު ދަންމާލަން ނިންމިއިރު، ޖަލްސާތައް ބްރޯޑްކާސްޓް ކުރަން އާ ވީޑިއޯ ރޫމްއެއް ގާއިމް ކުރުމުގެ މަސައްކަތް ކުރިއަށް ދާތީ ބްރޯޑްކާސްޓު ކުރަން ދަތިތަކެއް ހުރުމުން މި ދައުރުގެ މަސައްކަތް ވެސް މަޖިލީހުގެ ފަށާފައިވަނީ ދެ ހަފްތާއެއްހާ ދުވަސް ފަހުންނެވެ.
ރައްޔިތުންގެ މަޖިލީހުގެ ގަވައިދުގައިވާ ގޮތުން ތިން ވަނަ ދައުރު ހިނގާނީ އޮކްޓޯބަރު އެކަކުން ނޮވެންބަރު މަހުގެ ނިޔަލަށެވެ.
ތިން މަހުގެ ޗުއްޓީއަކަށް ފަހު އަންނަ އަހަރުގެ ފުރަތަމަ ދައުރު ފަށާނީ ފެބްރުއަރީގަ އެވެ. އޭޕްރިލް މަހުގެ ނިޔަލަށް އެ ދައުރު ކުރިއަށް ދާއިރު، ދެ ވަނަ ދައުރު ކުރިއަށް ދާނީ ޖޫން މަހުގެ ފުރަތަމަ ދުވަހުން ފެށިގެން އޯގަސްޓް މަހުގެ ނިޔަލަށް ކަމަށް ގަވައިދުގައިވެ އެވެ.