ރާއްޖޭގައި ހެލިކޮޕްޓަރުގެ ހިދުމަތް މާޗް މަހު ފަށާނެ: އަމީން

ރާއްޖޭގައި ހެލިކޮޕްޓަރުގެ ހިދުމަތް އަންނަ އަހަރުގެ މާޗް މަހު ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

ރާއްޖޭގެ ނޭޝަނަލް އިމަޖެންސީ ސާވިސްގެ ހިދުމަތް ފުޅާކުރުމަށްޓަކައި އަދި ޓޫރިޒަމްގެ ދާއިރާގެ ބޭނުމަށް ހެލިކޮޕްޓަރުގެ ހިދުމަތް ދިނުމަށް ޝައުގުވެރިވާ ފަރާތްތަކުން އެކްސްޕްރެޝަންސް އޮފް އިންޓްރެސްޓް (އީއޯއައި) ހުށަހަޅަން ހުޅުވާލީ މިދިޔަ އޮގަސްޓް މަހު އެވެ.

ޓްރާންސްޕޯޓް މިނިސްޓްރީން ކުރިން ބުނެފައިވަނީ ހެލިކޮޕްޓަރުގެ ހިދުމަތް ރާއްޖޭގައި ދިނުމަށް ބޭރުގެ 36 ކުންފުންޏަކުން ޝައުގުވެރިކަން ފާޅުކޮށްފައިވާ ކަމަށެވެ.

ސަރުކާރަށް އެއް އަހަރު ފުރުމާ ގުޅިގެން ޕީއެސްއެމްގެ "ހަފްތާ 52" ޕްރޮގްރާމްގައި އަމީން ވިދާޅުވީ ރާއްޖޭގައި އެ ހިދުމަތް ފަށާނީ ސިވިލް އޭވިއޭޝަން އޮތޯރިޓީގެ ހުރިހާ މިންގަނޑަކަށް ފެތޭ ގޮތަށް ކަމަށެވެ.

މިނިސްޓަރު ވިދާޅުވީ ކުރިއަތް އޮތް ހެލިކޮޕްޓަރު އޮޕަރޭޓުކުރާ ކުންފުންޏަކާއެކު ކުރިއަށް އޮތް ދެ ހަފުތާ ތެރޭގައި ސޮއިކުރާނެ ކަމަށެވެ.

ޓްރާންސްޕޯޓު މިނިސްޓްރީން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަމީން ވާހަކަދައްކަވަނީ.--

މީގެ 22 އަހަރު ކުރިން ކުރިން ރާއްޖޭގައި ހެލިކޮޕްޓަރު ދުއްވިއިރު ހިތާމަވެރި އެތައް ހާދިސާއެއް ހިނގާފައިވާކަން ފާހަގަ ކުރައްވައި، އަމީން ވިދާޅުވީ ހެލިކޮޕްޓަރު ދުއްވުމަށް އެ ބިރު ކުރިން އޮތް ކަމަށެވެ. ނަމަވެސް އެ މަސައްކަތް އަލުން ފެށުމަށް އެނަލިސިން ހެދީ އިނގިރޭސިވިލާތުގެ ސީއޭގެ ރިކޮމަންޑޭޝަންތަކާއެކު ކަމަށް އަމީން ވިދާޅުވި އެވެ.

"މި ބަދަލަކީ ވެސް އިނގިރޭސިވިލާތުގެ ސީއޭގެ ރިކޮމަންޑޭޝަންތަކާއެކު، ސަލާމަތީ ގޮތުން ރާއްޖެއަށް އޮޕަރޭޓްކުރުމަށް އެންމެ ރަނގަޅު ފެންވަރުގެ ހެލިކޮޕްޓަރުތައް ރާއްޖޭގައި އޮޕަރޭޓް ކުރާނީ. އެއީ ރެގިއުލޭޓާއިން ކަނޑައަޅާ ވައްތަރެއްގެ ސައިޒެއްގެ ސަލާމަތީ ގޮތުން ރަައްކާތެރި، ވަކި ވައްތަރެއްގެ ހެލިކޮޕްޓަރު ފެށުމަށް މި ހުޅުވާލީ،" މިނިސްޓަރު ވިދާޅުވި އެވެ

އެގޮތަށް ހެލިކޮޕްޓަރުގެ ހިދުމަތް ފެށުމުން އެއް ރަށުން އަނެއް ރަށަށް ނުވަތަ މާލެއަށް ބަލިމީހުން އުފުލުމާއި ރޭގަނޑު ޓޫރިސްޓުން އުފުލުމަށް ކުރުމުގައި ހުރި ދަތިތަކަށް ވެސް ހައްލު ލިބިގެންދާނެ ކަމަށް އަމީން ވިދާޅުވި އެވެ.

އެމްއެންޑީއެފްގެ ކުރަނގި ހެލިކޮޕްޓަރުގައި ދ.ބަނޑިދޫގައި އޮތް ހާލު ދެރަ ބަލިމީހަކު ވައިގެ މަގުން މާލެ ގެނައުމަށްފަހު، އެބަލިމީހާ އެމްބިއުލާންސަށް އެރުވުމުގެ މަސައްކަތުގައި އޮފިޝަލުން ހަރަކާތްތެރިވަނީ.---ފޮޓޯ:މިހާރު

އަންނަ މާޗް މަހު ހެލިކޮޕްޓަރުގެ މަސައްކަތް އަލުން ފަށާއިރު، ކުއްލި ހާލަތުގައި ބަލި މީހުން އުފުލުމަށްޓަކައި ޑޭޝް 8 ގެ މަތިންދާބޯޓަކާއި ސީޕްލޭނެއް ވެސް އެއާ އެމްބިއުލާންސެއްގެ ގޮތުގައި ބޭނުންކުރަން މި އަހަރު ވަނީ ފަށައިފަ އެވެ.

ބަލި މީހުން އުފުލުމަށް އިންޑިއާއިން ރާއްޖެއަށް ހަދިޔާ ކޮށްފައިވާ ޑޯނިއާ މަތިންދާބޯޓާއި ދެ ހެލިކޮޕްޓަރު އޮޕަރޭޓް ކުރަން ތިބި އިންޑިއާގެ ސިފައިން އަނބުރާ ފޮނުވާލުމަށް ފަހު، އެ ގައުމުގެ މަދަނީ މީހުންނާ އެކު އެ ބޯޓުތަކުގެ ދަތުރުތައް ކުރިއެކޭ އެއްގޮތަށް މިހާރު ވެސް ރާއްޖޭގައި ކުރިއަށް ގެންދެ އެވެ.