ކޯހުން ފާސްވުމަށް އެސަސްމަންޓްތަކުން 50 ޕަސެންޓް ހޯދަން ޖެހޭ ގޮތަށް ބަދަލުކޮށްފި

މަތީ ތައުލީމު ދޭ މަރުކަޒުތަކުން ހިންގާ ކޯސްތަކުގެ އެސަސްމަންޓްތަކުން 50 ޕަސެންޓް ފާސްވާން ޖެހޭ ގޮތަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން އުސޫލަށް ބަދަލު ގެނެސްފި އެވެ.

މަތީ ތައުލީމު ދޭ މަރުކަޒުތަކުން ހިންގާ ކޯސްތަކުގައި ހަދަން ޖެހޭ އެސައިންމަންޓްތައް އެހެން މީހުން ލައްވައި ހެދުމާއި ގަނެ ވިއްކުމުގެ މައްސަލަ މިހާރު ވަނީ ވަރަށް ބޮޑުވެފަ އެވެ. އެކަން ހުއްޓުވުމަށް ފާސްވާ ޕަސެންޓް މަތި ކުރުމަށް އެމްކިޔުއޭއިން ނިންމާފައިވާކަން އިއުލާން ކުރީ މިދިޔަ ސެޕްޓެމްބަރު މަހު އެވެ.

"ގައިޑްލައިންސް ފޯ ޕްރޮގްރާމް އެކްރެޑިޓޭޝަން" އަށް ބަދަލު ގެނެސް މިދިޔަ އާދިއްތަ ދުވަހު އާންމުކުރި އިސްލާހުގެ ދަށުން ކޮންޓްރޯލް އެސެސްމަންޓް 50 ޕަސެންޓްގައި ހިމެނޭ ކޮންމެ ބަޔަކުން ފާސްވާން ޖެހެ އެވެ.

މަތީ ތައުލީމުދޭ މަރުކަޒުތަކުގައި ހިންގުމަށް ކުރިން އެޕްރޫވަލް ދީފައިވާ ކޯސްތައް ގެންދިއުމުގައި އެ އުސޫލުގައި ބުނާ ގައިޑްލައިނަށް އަމަލުކުރުމަށް ވެސް އެމްކިޔުއޭއިން ވަނީ އަންގައިފަ އެވެ.

އެކްރެޑިޓޭޝަން އުސޫލަށް ގެނެސްފައިވާ ބައެއް ބަދަލުތައް:

- ޕްރޮގްރާމްގެ ކޮންމެ މޮޑިއުލެއް ނުވަތަ ޔުނިޓަކަށް އެސެސްމަންޓަށް ބޭނުންވާ މިންގަނޑުތައް ސާފުކޮށްދީފައި ހުރުން

- ދަރިވަރުގެ ގާބިލުކަން ވަޒަންކުރެވޭނެ، މަދުވެގެން އަމިއްލަ އެއް މަސައްކަތް (ލިޔުމުން ނުވަތަ އެހެން ގޮތަކުން) ދަރިވަރުން އުފައްދަން ޖެހޭ

- މާސްޓާޒް ކޯސްތަކުގެ ރިސާޗް ފިޔަވައި ހުރިހާ ކޯހެއްގައި މަދުވެގެން 50 ޕަސެންޓް ސުޕަަވައިޒްކޮށް، ވަގުތު ކަނޑައަޅައި، ކޮންޓްރޯލްކުރެވޭ އެސެސްމަންޓް ހާލަތްތަކެއް އިމްތިހާން ތަކުގައި ހިމަނަން ޖެހޭ

- އެސެސްމަންޓުގެ 50 ޕަސެންޓަކީ އެއްވެސް މީހެއްގެ އެހީތެރިކަމެއް ނެތި ހަދާ އެއްޗަކަށް ވުން

- އޯޕަން ބުކް ޓެސްޓުތައް ހެދުމަށް ވަގުތެއް ކަނޑައެޅުން

އެސެސްމަންޓްގައި ހިމެނިދާނެ ބައިތައް:

- ޓެސްޓު ހެދުމަށް އާ ލިޔުމެއް ބޭނުން ކުރުން

- ފޮތް/ނޯޓްސް ބޭނުންކޮށްގެން ލިޔުމުން ދޭ އިމްތިހާންތައް

- ސުވާލާއި ޖަވާބުތައް

- ކްލާހަށް ގޮސްގެންދޭ ޕްރެޒެންޓޭޝަން

- އަނގަބަހުން ދޭން ޖެހޭ ޓެސްޓު

- ސުޕަވައިޒަރުންނާއެކު ބާއްވާ ބައްދަލުވުންތައް

- ލެބޯޓަރީ މަސައްކަތްތައް

- ކްލާހުގައި ދޭ ކުއިޒްތައް

އޭގެ އިތުރުން އެސައިންމަންޓުތައް ތައްޔާރުކުރުމުގައި ތިންވަނަ މީހެއްގެ އެހީތެރިކަން ނުވަތަ ބައިވެރިވުން މަދުކުރުމަށް، އެއްވެސް މޮޑިއުލްއަކުން ހުރިހާ އެސައިންމަންޓެއް ގޭގައި ހެދުމުގެ ފުރުސަތު ދީގެން ނުވާނެ ކަމަށް ވެސް ވެ އެވެ.

މީގެ ތިން އަހަރު ކުރިން 2021 ގައި އަމަލު ކުރަން ފެށި މަތީ ތައުލީމުގެ ގާނޫނުގައިވާ ގޮތުން މަތީ ތައުލީމު ފޯރުކޮށްދޭ މަރުކަޒެއްގައި ތައުލީމު ހާސިލުކުރަމުންދާ ދަރިވަރަކު އަމިއްލަ އަށް ފުރިހަމަކުރަންޖެހޭ މަސައްކަތެއް އެހެން މީހަކު ލައްވައި ކުރުވައިފިނަމަ 5،000ރ. އިން އެ ދަރިވަރަކު ޖޫރިމަނާކޮށް، އެފަދަ މަސައްކަތްތައް ކޮށްދޭ މީހުން 10،000ރ. އިން ޖޫރިމަނާ ކުރާނެ އެވެ.

އެފަދަ އަމަލުތަކަށް ފާރަވެރިވުމަށް ތައުލީމުދޭ މަރުކަޒުތަކުގައި ހަރުދަނާ ނިޒާމެއް ގާއިމުކުރަންޖެހޭ ކަމަށް އެ ގާނޫނުގައި ބަޔާން ކޮށްފައިވާއިރު، ޖޫރިމަނާގެ އިތުރުން ވެސް އެކަށީގެންވާ ފިޔަވަޅު އެޅުމަށް ހުރަހެއް ނެތް ކަމަށް ބުނެފައިވެ އެވެ. ނަމަވެސް މިހާތަނަށް މައްސަލައެއްގައި ފިޔަވަޅު އެޅިކަން އެނގޭކަށް ނެތެވެ.