މާލޭގައި އުޅޭ ބުޅާތަކަށް ސްޕްރޭ ޖެހުމުން ކަންބޮޑުވުން ފާޅުކޮށްފި

މާލޭގައި އުޅޭ ބުޅާތަކެއްގެ ޖަޔަށް ބަޔަކު ސްޕްރޭ ޖެހުމުން އެ އެއްޗެހީގެ ހައްގުގައި މަސައްކަތްކުރާ އަމިއްލަ ޖަމިއްޔާއަކުން ކަންބޮޑުވުން ފާޅުކޮށްފި އެވެ.

ފީލައިން ވެލްފެއާ އޯގަނައިޒޭޝަނުން ރޭ ފޭސްބުކްގައި ކުރި ޕޯސްޓެއްގައި ބުނީ، މެރީ ބްރައުން ކުރިމަތީގެ ޕާކިން ޒޯނުގައި އުޅޭ ބުޅާތައް ގަޔަށް ބަޔަކު ނޫ ކުލައިގެ ސްޕްރޭއެއް ޖަހާފައިވާ ކަމަށެވެ. އެ ސަރަހައްދުގައި އުޅޭ ބުޅާތަކަށް އެ ޖަމިއްޔާ އިން ގަވާއިދުން ކާންދީ، ބަލަހައްޓާ އަދި ބޭނުންވާ އެހެން ކަންކަން ވެސް ހަމަޖައްސައިދޭއިރު، މިއީ ވަރަށް ހިތާމަވެރި ކަމެއް ކަމަށް ބުންޏެވެ.

އެއީ، މާލޭގައި ވަރަށް ގިނައިން ބުޅާ އުޅޭ ސަރަހައްދެކެވެ. އެ ސަރަހައްދުގައި އުޅޭ ބުޅާތަކަށް ބަޔަކު ގަސްދުގައި ތަކުރާރުކޮށް އަނިޔާކުރަމުން ދާ ކަމަށް ފެލީން ޖަމިއްޔާ އިން ތުހުމަތުކުރެ އެވެ.

"މިއަދު އަޅުގަނޑުމެންނަށް ފެނުނީ ވަރަށް ގިނަ ބުޅާތަކުގެ ގަޔަށް ނޫ ކުލައިގެ ސްޕްރޭ ޖަހާފައި ހުއްޓާ، އެއީ އަނިޔާ ވެރި އަމަލެއް، އޭގައި [ސްޕްރޭ] ގައި ހުންނަ ކެމިކަލުން މި އެއްޗެހި ނުރައްކަލަށް ހުށަހެޅޭ،" އިނގިރޭސި ބަހުން ކުރި ޕޯސްޓުގައި އެ ޖަމިއްޔާ އިން ބުންޏެވެ.

"އެ ބުޅާތަކުގެ ކާނާ އަޅާފައި ހުރި އެއްޗެއްސަށް ވެސް ގެއްލުން ދީފައި ހުރުމުން، މިއީ ހަމަ އެ އަށް އަނިޔާކުރުމުގެ ގޮތުން ކޮށްފައި ހުރި ކަމެއްކަން އެނގޭ."

މި އަމަލުތައް ކުށްވެރިކޮށް، ފެލީން ޖަމިއްޔާ އިން ބުނީ ބުޅާތަކަށް އަނިޔާކުރާ މައްސަލައެއް ފާހަގަވެއްޖެ ނަމަ އެކަން ރިޕޯޓްކޮށް ދިނުމަށް އެދޭ ކަމަށެވެ.

މާލެ ސަރަހައްދުގެ މަގުތަކުގައި ބުޅާ ގިނަވެ، އާންމުންނަށް އުނދަގޫވާން ފެށުމުން މާލޭ ސިޓީ ކައުންސިލާއި ސަރުކާރު ގުޅިގެން ވަނީ ހުޅުމާލޭގައި "އޮޅުހިޔާ"ގެ ނަމުގައި ބުޅާތަކަށް ހާއްސަ ފެސިލިޓީއެއް ހަދައިފަ އެވެ. އެ ފެސިލިޓީ ހުޅުވި ނަމަވެސް، މަގުމަތީގައި އުޅޭ ބުޅާތައް އެތަނަށް ގެންދަން އަދި ނުފަށަ އެވެ.

މަގުތަކުގައި އުޅޭ ބުޅާތައް "އޮޅުހިޔާ" އަށް ބަދަލުކުރުމުގެ މަސައްކަތް މާލޭ ސިޓީ ކައުންސިލުން މިދިޔަ ހަފުތާގައި ފަށަން އުޅުމުން ދިރޭތަކެއްޗާ ބެހޭ މިނިސްޓްރީން ވަނީ އެ ފެސިލިޓީގައި ހުންނަން ޖެހޭ ހުރިހާ ހިދުމަތެއް ފުރިހަމަ ނުވާ ކަމަށް ބުނެ ކަންބޮޑުވުން ފާޅުކޮށް، އެ މަސައްކަތް މި ވަގުތަށް ހުއްޓާލަން އަންގައިފަ އެވެ.

އެ ފެސިލިޓީ ހިންގުން ދިރޭތަކެއްޗާ ބެހޭ މިނިސްޓްރީގެ ދަށަށް ބަދަލުކުރަން ވެސް ސަރުކާރުން މާލޭ ސިޓީ ކައުންސިލަށް މިދިޔަ ހަފުތާގައި ވަނީ އަންގައިފަ އެވެ. ނަމަވެސް، ސިޓީ ކައުންސިލުން ބުނީ އެ ފެސިލިޓީ ސަރުކާރާ ހަވާލުކުރެވޭނީ އެތަން ހަދަން ސިޓީ ކައުންސިލްގެ ބަޖެޓުން ކުރި ހަރަދު އަނބުރާ ލިބޭ ގޮތަށް ކަމަށެވެ.